Эвела хъуъ ки ва гьамыъдыбише ки, дама дыхьыйне, сыт1а гьаъара улесдымык ва чиек кахад ха1р джура укьбыр. Ха1р укьухда джуды ягъмиш гьаъад вахт а. Уула хьад ачых йишийне, сахьусды руъура сурбыр. Гьабыр джулана сетхыр, гьаъара гьамыкла гьухьуд ч1иргъин.

Масты на1кыдыхьва1н кыйхыйне, ч1иргъин бала иштагъды гъахьун йиъи. Ч1иргъин гьаъас руъуд йиъи тебирг1анмыкла ки. Тебиргъанбыр липхьуд йиьи лам ад джигыди, былахмыд бегеде. Тебирг1анмыд на сурумыд гьаъад йиъи бала иштагъды йикьцарбыр.
Кекутбыр на ц1ынтарбыр ягъмиш гьаъас ки ихьди инсанар бала дуруъура. Гьамыкла руъура быт1рад ил хъуд, быт1рад дад кид чей. Гьадыла саваенди, кьы1нне мыкьа-мыса йишид вахтинды, гьабыр гьазамна ка кыъыд тюнты чей рагъара дарманасна. Ц1ынтарбыр каъас руъуд йиъи якыдид улесдымык ки. Джубрады сыдырма мадды районма ва шермаадыбыр йидкьыр мыха1бышды банымыла сыт1а гьаъара кекут-ц1ынтар. Гьис хьурди ихьды мидады ха1р са емишед ки, укьуд ки, итед ки ва мадды гъахьунмыд ки дад гъами виъи. Ама хъуъдире хъуъ ц1ынтарбыр бала джетинене алгара, гьис хьурди инсанаше гюзет ваъардиш ц1ынтарбыр сыт1а гьыъыр йигад вахт. Сук саъ сувч1усмады, гъваба лаъ агъаъара. Гьадире сен-сыдыла ц1ам руъура ани йиъи гьа дарманад укь. Гьадыла гьа ягъмиш гьаъади, уула хьуъ гьат1ур йигара, гъваба ыгъджыъыр, ва яки гюткир йигара сук ваъамады.
Чиек каъас сывашыдыкь на шыдыкь ки бала ягьмиш гьаъара инсанаше, гьамыра ки чей иштагъ гьаъара.
Укьмыла саваенди чиек кахад, ва тисе улед дамаа ягъмиш гьаъара ха1р джура дамыд емишбыр: некъебыр, сынбыр, ч1иринекъебыр, хьурбыр, хьутбыр, к1ашк1албыр, мезелийбыр, мухьуйбыр, сынбыр, хьачбыр, гьа1джие эчбыр, ч1арахуйбыр ва мадды гьасад емишбыр бала йиъи яхда. Гьабыр ихьды девле виъи, гьаса йишийне, гьабыр йе уху1р йигара, сен-сыдыла маа ки бала йикисне.
Ху1рметли газетед юлдашер, эгер ва1с гьац1ад дамыд укьбыр, емишбыр ана йишийне, дарманас лазим руъуд ва ва гъийгъа йе миди гьагва джыъыр ад, хайиш йиъи, сигаъ яхда гьамыд дурубыр ки ва шууна гьамыкла кар келъэрди ки. Йе гьа сагьа1т гьабыр газета лийис.

Зарема Исрафилова