Гьарбад йыгъа, 17 майес, администрациедид актовый зала Мыха1д райондид кьухьние Ибрагимов Ибрагим Гусейновиче выгыр ай совещание. Гьа совещаниедид повесткади кий кьва1д суал – хьадид призывад агьвалат шууна виъиди са ки контрактный службадид суал. Ми уже хьибхьусды совещание виъи гьа суалмыд бадана выгыргара ад райондид кьухьние.
Агъмиш гьаъас гьа суалбыр сес выъыр йыдкьыр ай му1къмыд сельсоветмыд седриер, гьабишды заместителер ВУСад (военно-учетный столад) гвалах выгыргад, райондид ОВД участковыйшды кьухьды майор полиции Фазил Шахбанов.Иштрак гьыъыр ай гьа совещаниеди хьибды райондид военкоматат комиссара Магомедов Рафик Гаджиагаевиче не райондид кьухьнийды заместителе Кулиев Арсен Амраховиче ки.
Ачых выъыр иджласад гвалах райондид кьухьнийды заместителе Раджабов Насир Меджидовиче. Гьание джикана таныш дыъыр ягъмишдишибыр гъийгъа ад районди хьадид призывад агьвалатахьван. Гьание гьухьур, саламатана выгыргара адиш секки сельсовете ва гьама ад ВУСмыра призывад гвалах. Эдере адиш кьуле призывак китхьур ад джигьилер ва гьабишды дид-нин, шыв джетивалдыбыр йикисды, эгер призывала дагул дишир военкоматма повесткамыхьван вахтинди джидкьыйне. Выгыргара адиш хьур гвалах ВУСмыд работникеше райондид участковыйшихьван сыт1а, гьыъыр адиш секки призывала хъуъ лузунийла акт. Гъийгъа гьадыла йиъи лап ц1ам диъид военкомата повесткамыхьван дыхьыр адбыр.
Хьели ха1р му1къмыд поселениеди шыв агьвалат ади ва шумур призывник повестка выр дыхьыр ади Насир Меджидовиче ихтилат гьаъас ч1ел выр Рафик Гаджиагаевичде.
Гьание сиене 17 сельсоветед дур сырхы1ре гьухьур, гьилды му1къаа1 шумур призывник йидкьыр ади военкомата хьадид призывад повесткадихьван.
Гъийгъа шикил гьа гвалахад мисед виъий — йывыр инсан Мыхаа1, 4 Сыназыраа ва мадды му1къма — хьибыр, кьва1р, са, ва сасад поселениема секки адиш гьалаки военкомата дыхьыр ад повестка лийкьыр.
Гьа агьвалат вац1ыйне, эккене нерази йишир райондид кьухьды Ибрагим Гусейнович. Гьание ха1р са седри сельсоветед джурана лаъ луза гьаъара, джываб ягъы1р, йис иди мидийкьама гвалах сиджип1ир ад лазим виъидкал. Шыв себеб вишир ху1киметед Указ кьуле саламатна джывыргара ад, шыв ади мышат гьаъад гьа призывад гвалахас.
Сельсоветмыд седрийшды ихтилатмыхьван, баласды повестка йыдкьыр абыр студентер диъи, сасадбыр джва1р котрактникер диъине ки, призывак китхьур а, сасад инвалидешис ки йыдкьыр а повесткабыр, амма повестка лешус джидч1ед дидабар-нинабар ки джигьилер ки а, сасадбише рухьур диш, гьилиъне ади джуьхьды хынимер, вылц1ардиш гьабишды адресбыр, телефонбыр – балад джигьилер а гъа суруу хырыдад джигима гвалахбыр гьаъад. Сасадбишихьван йишир а телефона далгас – ваъ рухьурдиш, хъидкьыр гъы1лд руъума дуруъус рухьура армиди.
Эгер джидч1ебыр, ваъ рухьубыр ана йишийне, гьыъыр йыгара гьабишыла актбыр комиссиедыхван, кедир гьадик участковыер ки. Хьели гьабишды гьакьасаб гьаъаси правоохранительный органмыра. Гъийгъады йыхы1р секки акт адиш. Гьаса йишийне, багьанабыр гьаджагвур, секкинийды хатир адга гьаъас руъуъурдиш хьур джухьур, ми шурад ине, тимбыйды бегед ине, выгыр йыгара ВУСмыра, сельсоветеше, лазим йишийне, участковыйшихьван сыт1а призывад суалмыд гвалах саламатна, гьухур райондид кьухьние.
Хьели военный комиссар Рафик Гаджиагаевиче контрактный службадид суал агъмиш гьыъыр. Гьание ки, райондид кьухьние ки хайиш гьыъыр, юкьсура хъие хьур баннербыр на плакатбыр, кьуле адхад, шыв къазан-къазамиш хиназ бадана ади, йикисди контрактникешихда. Гьасад баннербыр хъие хьур сиене сельсоветма, идарама ва инсанар бала ягъмиш дуруъуд джигима.
Б. МЫIХАДЫ
