11 апрелес Мыха1д райондид Администрациедид актовый зала выгыр ай иджлас. Гьади иштрак гьыъыр райондид кьухьние Ибрагим Ибрагимова, Махачкалда йиркьыд Дагъыстан Республикадид Халкьдид Маджлисед депутат Давуд Сулейманова, райондид кьухьнийды заместителеше Арсен Кулиева, Насир Раджабова, сельсоветмыд седрийше, идарамыд кьухьдыбише ва журналистеше.
Сиене сыт1ана иджласа хьуъ гет1ир ай 5 суал. Гьамыкла контрактный службадид ва хьадид призывад суал бадана йыркьыр ад йиъий республикадид парламентед депутат. Гьадис гюре иджласад гвалах ачых выъыда райондид кьухьние Ибрагим Гусейновиче, сахьусды кьул, сиене иштракчийшды суруула хош-бешбыр, сагъул-варулбыр гьыъыр Давуд Амаевичес районди йыркьыр хьур. Хьели ч1ел выри джуду заместителес по безопасности Насир Раджабовас агъмиш гьаъара ад суалад бадана.
Насир Меджидовиче йик1иы лихъивир ягъмишдишибишис 1 апрелес кувч1ур ад ва 15 июля йыхы1р викисды хьадид призыв. Хьибды райондид военкоматад планахьван ихьды Мыха1д районда дагъа1ре а 100 призывник ва са ки 57 контрактник. Гъийгъад йыгъахьван лап ц1ам диъи дыхьыр ад военкомата повестка йыдкьыр призывникер, гьухьур Насир Меджидовиче. Гьа рухьуд ч1ел виъи, сельсоветеше ва ВУСмыра выгыр адиш лазим виъид кал джуьхьды гвалах. Гьац1ара, баласды джигьил гадиер хырыда а къазамишбыр гьаъара, сасадбыр студентер диъи, едедбыр ки а, сасадбишис повесткабыр йыдкьыр а джва1р контрактникер диъине ки гъийгъа. Гьадыла еринды ха1р мукъу1д поселениеди ВУСмыра сельсоветед седриер ки хьура гине ва участковыйшихьван сыт1а вац1ара выъыр йыгара ад агьвалат — выш йили ади, шумур призывник ади ха1р поселениеди, гьухьур гьание.
Гьадыла хъуъ гьазыр гьыъыр йыгара справка, гьагва гьыъыр, выш едед йиъиди, выш студент йиъиди, выш хырыда гъаъ суруу ади ва шумур сиене сыт1а ади призывник, дыхьыр йыгад военкомата повесткадихьван. Гьасад справкабыр лийкьа гьыъыр йыгара военкомата ки ва райадминистрациеди ки, вац1ын бадана виъид ерынды агьвалат.
Ибрагим Гусейновиче хуткур, йис джывыр ади гьасад справкабыр мидийкьама ВУСмыра ва сельсоветед седрийше. Гьабыр гьазыр йишир йыгад ий хьур гъийгъа ад иджласайыкьама.
Сахьусды писды агьвалат анивиъи хьуланды поселениема: меселла, Н. Борч – анидиъи призывад ешди ад 52 инсан, повесткадихьван секки военкомата йыркьыр адиш; Мыха1 173 гадиекла, повесткамыхьван дыхьыр а военкомата сиене сыт1а 6 джигьил. Са Сыназыра и агьвалат йыхды — 48 призывникехьла 5 дыхьыр а военкомата повесткамыхьван — гьа йиъи 10 %. Эгер гьа1р поселениеда 10 % йишихьвна, райондид план призывникешды гъийкьара, гьухьур Насир Меджидовиче.
Генеки Насир Раджабова хайиш гьыъыр, кьаъды сходбыр йыгыр му1къма, кьуле еде хьур дидабар, нинабар, гьабишды хынимер, шыв джет1инвалдыбыр йикисды армидикла дагул дишибишис.
Республикадид Иджласад депутат Давуд Сулейманова йик1иы лихъийир, гьа1р са инсанад 18 сен йишида бырдж йиъид армиди йыхьын. Гьа священный бырдж йиъи ихьды Россиядид Конституциедик кид, гьухьур гьание. Гьадыла гьа гвалах джат1ур выгыр йыгара ха1р поселениеди, эдир йыгара инсанар кьуле, шыв агьвалат ади гъийгъа ихьды ху1кимете, шууна асыллы йиъиди быгады йыгъ яла — ха1р са инсындыла. Гьыъыр йыгара ачых фондбыр, кюмег высды констрактникешды, мобилизованныйшды ва добровольцыйшды хизынмыс. Контратный службади дыхьыйне, шыв хыл-худ, кюмегбыр гьаъарди ху1киметере гъийгъа.
Райондид кьухьние суалад ихтилатбыр бегьем руъуда генеки хайиш гьыъыр сиене сельсоветмыда, ВУСмыда ва участковыйшда хьадид призывад гвалахбыр мааки йыхана гыргаъ хьур, ва мирджед иджласа вишин бадана ачыхды, йыхды агъвалат гьа суалад бадана.
Гьадыла хъуъ хьуъ гет1ир ай йикисды субботникед суал, налогмыд ва маддыбыр.
Б. МыхаIды
