К 100-летию ДАССР посвящается
Къинады САИД

«ДАГЪЫСТАН» ДУР КИХЬИД ЭСИР

1.
«Дагъыстан» тарих – деринды сир,
Веш сен ад мамзил виъи эсир.
Урус халкь, йик1ь ра1гьимдид къумши,
Кумаг гьывыр, у1ху1р ихьды ч1ир.

2.
Ти, хырыдад, гьа1пхы1д ва1ъдие,
Юкьсур дуьнье ад га да1ъвийе,
Сывымыд халкьбыр ай дерийе,
Игитвалды ховкьур гьавыйе.

3.
Туран, Иран, Усман, – гьар паччагь …
Къиллиндж гъукур эбырдид рангаа,
Выъыр диш джу сада хьва гунагь,
«Ирды» гардана а халкьдид агь.

4.
Тарих йиъи деринды дерйагь,
Джвёр джусды дишир далда-дайагъ,
Хыляа сигырдиш капыр, ярах,
Беденмыы, йик1иы гъад яраа, дагъ.

5.
Мид веш сен – хьура гид вахт-са1ъа1т,
Урус шукван выъыр мы1сла1ъа1т,
Иджлас выъыр, сывт1ыр джа1ма1ъа1т,
Халкьдис овгур эсирдид мырад.

6.
Сталин йиркьыр, выъыр йес хабар,
Ленинадаа хана ихтияр,
Агъ гьыъыр игит халкьмыд хиял –
Уьлке вишир гьукумат, са хал.

7.
Син Дагъыстандис гьишир ра1гьа1т,
Сывымыд ма1гькам вишир са1ргьа1т,
Му1къма ливк1ур ы1лимдид чирагъ,
Гьар са хал хьва – диплом ад «уджагъ».

8.
Ватан вишир эч, т1ымыл гъад багъ,
Ч1абал, давар, — суьрибыр гъубагъ,
Балугъ ховыркьад геми, дерйагь,
А1а1лимвалид дур-ун ад дамах.

9.
Са шумуд веш сен, шумуд агъзыр,
Вахтдид мамзил диш «эвел-эхир»,
Вешды сыдыд тарихде ад сир –
«Дагъыстан» дур уу кихьид эсир.

10.
Ми йыгъбыр йиъи ихды дамах,
«Джагварды халыы» уу гъад пайдах,
Игит эскерашды капыр, къагъ,
Гьар са му1къкъа1 а эркек, къуччах.

11.
Эдемиешис веш сен – дерйагь,
Тарихдис эсир – баалад сийагь,
Ми дуьнье йес-вес виший а1сла1гь,
Йа1гъ дилег, гьихьаъ «Шукур Аллагь!»

19-21 января 2021 г.

Эсир – век;
Къиллиндж – сабля;
Къагъ – ножны (для ношения холодного оружия на боку);
Ярах – оружие;
«Джагварды халыы» — тут — Белый дом Правительства РД;
Ы1лим – знание;
А1а1лим – ученый;
Иджлас – собрание;
Туран, Иран, Усман – названия стран-захватчиков;
Паччагь – царь, глава империи.
Геми – корабль;