Шиъирбыр, наIгьнибыр, теснифбыр, газелбыр, рубаибыр, бейтибыр
* * *
Джуды сафарды йиъид са илсанаа,
Нагагь,- хала вите, хьур вы сыхы1си:
Йили кибт1еси,-хуткуйне,- йиван за?
Мизик кибт1е,- рухьуд йыгъ ваа йыкьаси.
* * *
Маджлисди йыхьыр, сукьусды вишихьвна,
Сукьусды ер гуьзет выъыр кал сукьа, Кьа1сды-кьухьнийды ер ва кееп1ихьвна, Ригизана сукьуси, гивир чуха.
* * *
Буюр-вишихьвна вахда маджлисди,
Сукьур гьалгасды, хъацысды гуьзет гьаъ,
Салат1 йишихьвна гьеч гиджийхьисды, Кьва1дси убур джуды «хыле выр» сатаъ.
* * *
Бейхабарды инсан тахаа самаругъ-Ха1лмыла лаъ ла1ч1ус чалых йикиси.
Етим йыгыр, хвабыхда гьеч самаругь-Гакъара йиш, папрыма эч1ирхьаси.
* * *
Хьады, гъы1лды, хумухды шад диъи е,
Йа1ква1с, дадалад унды шад диъи е, Гьу1мир виъидиклаа ес хабар адиш,
Сыдыд эхир-кьы1ды ки шад диъи е.
* * *
Выъыд джавац1ыд къанмазас хъымываъ,
Г1ар вишир гьад, ухнухда хъу1вч1уси маа,
Бала ки, ва убул хылы у ха1р ваъ,
Эхир гьад хъавахасды виъи дама.
* * *
Шудаъ выъыр ки гьаъ на маъ хынхыда,
Хынхыра ес хыныхвалды ваъаси.
Эхир, лийкьыйне, хъацыс диш гьад яхда, Йик1е ивидбыйды выъыр саптаси.
* * *
Йик1 ихьды- эккед, хазна ад лакь виъи, Гьадыы саламатды гуьлег йыгара.
Лакьаа макъыетдыбыр лап гьакь диъи-Гирхьунийис джаваъад лакь ашгара.
ТЕДЖНИСБЫР
Мусурманас выд виъи къайгъу халды-лахад,
Магьу1йхь са мусурман адишды хал дылах ад,
Мигьманас х1урмет ваъ, эй халды лах ад,
Гьаммише викихь вахда къайгъу халды-лахад.
* * *
Дават ваъади хьуъ геет1е, к1ар хьарад-хьвад,
Бала йишихь ва1хде даватбыр хьар ад, хьыв ад,
Ц1инды хала сухьра гийаъ, хьарадад хьыв гъад,
Шадды йыгъа дерде дикихь ва1, хьарад-хьывад.
* * *
Дават гаапхы1д гьапхынвалды ми сывад, банад,
Йик1ис хушды ухьданвалды ми сыв гъад банад,
Ми деридид серинвалды, лаъ сыв гъад, бан гъад,
Гьу1мир гьаапхы1ри гирвыма, ми сывад-банад.
* * *
Зы йиркьыр а, хъыргад вахда, са хабар хана,
Ац1ыр, лац1ыр, х1урмет хана, быч1ид бар хана,
Ва телесых на гьухьури,- сукьа бар хана, Гьац1ара йиш, вахда зурбад, са «Хабархан» а.
* * *
Мисде кьы1дид кьир везири, за хамды хуе,
Берекетдид йикихь сатыр ад хамды хуе, Хумухдис кал сус рыкьаси, хам «духуйис» е,
Даватас кьисмет викихь кьир, ад хамды хуе.
* * *
Къасабади йыхьыри зы, гьа1раба хана, Гьац1арай зас, гьади изды дуст Гьа1рабхан а,
Ихьды шеркь суру эввелды гьа1раб ай, хан ай,
Йакьинне ми къасабади дуст Гьа1рабхан а.
* * *
Ха1ммише викихь берекет вы, халадана, Йыхды, халды иессиед хала, дана а,
Бала йукьа1, кьухьа ма1гъв вы, хал ад-«дана»,
Йешемиш йиш, йигит илсан, хал-лах бадана.
* * *
Мываъ ва зас йыхвалды, «хала хатирмыхьван»,
Не сес мываъ ва захда хала — хатирмылхьван,
Арарса мараъ рыгыр хала хатирмыхьван,
Лукаси, гуджехьван гьыъыд хал, хатирмыхьван.
* * *
Са къайгъуед дерде йыхьыд, кьана-кьул гьаъас,
Ла1ч1ур диш зада, дердиед, кьана-кьул гьаъас,
Дерди видж ки диший, ва рухьуд, кьан ад, кьул ад,
Гьадыла выдж ки гебгыри, кьана кьул ана.
1. Рубаи-четверостишия.
2. Теджнис-ч1илды уйунмыд шейирбыр.
3. Дылах (устар)-халды йыкьа1хдад.
4 .«Духуй»-лакъаб.
5. Къасаба- (ер, юрт), поселение.
6. Шеркь-виригъ лывхад сур.
Изды Халкь
Вы ана — зы ешемиш и,
Вы ана — зы гуямиш и,
Вы ана зы — туьремиш и,
Сагьул, аферин, ухьданды изды халкь!
Вы адишне, зы вышне диш,
Вы ана, Валлагь, дишне диш,
Выды мизы гъадишне диш,
Кьул лаъ хывкьыр ешемишды, изды халкь!
Нигикдид этекеде хад,
Йила агыд дур и «Мыха1д»?
Мысна шад мываъ «Къаргьа, Хъа1д», Мыха1быр,- хьур хьесым лизды, изды халкь!
Надир шагьас мит1у1гь дживч1ид,
Бегес не ханас лык1 джившид,
Ламысдихьван лыдже джившид,
Ха1ле гаатхы1д банбыр ухуд, изды халкь!
Варлы, варлыехьван ад и,
Кесиб, кесибеде хад и,
Лухма хьывад — мысга ад и,
Гуямишды, дуламишды изды халкь!
Куьр Раджаб выды дух йиъий,
Джамесеб, Нура1ма1д диъий,
Юсиф, Сакит шуба1 диъий,
Гьашыкь адишне абгыд диш, изды халкь!
Къалма-къал «куше» сапта ваъ, Дамбыр нахджирмашис сатаъ,
Нинды ч1ел гивирк1а мываъ, Ч1илихьван дур хъуъ гедгаси, изды халкь!
Шафи бырджлыд и накьудис,
Нинды дурус, сафды йик1ис,
Йах1, ламыс сапта куьлфитдис,
Дур, ун багьад, видж лап ц1амды, изды Xалкь!
Амин!
Шафи АМСАРИ
