Гьурхьури зы
Са быт1рад захда гаркъыр,
Улдире гьурхьури зы,
Бала идене ларгыр,
Мизире гьурхьури зы.
Ара хывхад:
Ухьтанвалды хьесымад,
Ц1инды вазырды гьум ад,
Шыв гьыъыйхь са залымад,
Рышере гьурхьури зы.
Улдире гьурхьури зы,
Мизире гьурхьури зы,
Шыв гьыъыйхь са залымад,
Рышере гьурхьури зы.
Са агъу джийран риъий,
Зы джу у гьейран йиъий,
Йик1 изды виран йиъий,
Йик1ире гьурхьури зы.
Ара хывхад:
На1гьни кихьир дурухда,
Ларкъыримихь сурухда,
Йикьир а зы улихда,
Улдире гьурхьури зы.
Ара хывхад:
Хъу1мару1гъ суруда
Садад хьур зада хуткухьвна,
Марад вышди, йикьид вышди,
Эгер са йик1ис гьацыхьвна,
Вы рыгара — вас йыгад вышди:
Ара хывхад:
Хъирыкьас маъ вы изды суруда,
Хырыда риш вы изды йик1ида.
Гьамыъ ва ки, сада хьур зы хуркур,
Вы ки зы кал, рурхьа хырыда.
Гагь рад йиш, гагь джан ваъара
Арцара ва зы мизихьван.
Едед йик1ихьван вы лурхъара,
Аргаси эхир са вы вахьван:
Ара хывхад:
Селминаз
Гъу1ля за ул ливири, Селминаз,
Йыкьа хьур, хыл лийири, Селминаз,
Гьад лы1хды улабара, Селмиаз,
Белиди зы ийири, Селминаз.
Ара хывхад:
Гъу1либыр гъигъе хъамаъ, ай гуьзел,
Хъу1гъу1ма решес мараъ, ай гуьзел,
Вы сартас диш- хъикьаси, ай гуьзел,
Маннийис ч1ел выс мываъ, ай гуьзел.
Лала быч1быр майдана, Селминаз,
Чуьт хыдрабыр гардана, Селминаз,
Вахьван гьалгас йишир диш, Селминаз,
Хъархы1ри ха1срат ана, Селминаз.
Ара хывхад:
Банбыр быч1ид йиъийдин, Селминаз,
Лугъур, кьы1чид йиъийдин, Селминаз,
Зы дуьнйадид бахтывар йикисий,
Вы зас рич1ид риъийдин, Селминаз.
Ара хывхад:
Шафи Амсари
Рыкьа гуьзел
Выды улабыр са дерягь виъи,
Мугъаматмыйк кид, са сегягь виъи,
Захда гакъара, мысна саджалхъа1д,
Изды дженде ад, мыкьды агь виъи.
Ара хывхад:
Вы джагварды шал гъана,
Рыкъа1 рыкьа, гуьзел,
Ч1арыма юц1ал ана,
Рыкъа1 рыкьа, гуьзел,
Вазырды джамал гъана,
Гьаргва раъ, гуьзел.
Вы захда гаркъыр, йик1 эгъет1ири,
Выш гьаатхы1р гергыр, ха1л кьат1 йишири,
Джендихда изды ма аман мабдиш,
Ширинды накьбыр зада ха1шури.
Ара хывхад:
Бахтид накьышбыр, х1адиймыйклады,
Суьрмидид къашбыр, ейухмыйклады.
Ай Гьинчид савкьат, зазбыр гъад мугъарт-
Саджатхыд вышбыр, махвалмыйклады.
Ара хывхад:
1.Сегягь (туърк.)-туьркешды гъаваа (мугам).
2. Джамал (туьрк.)-ухьтанвалды, быт1равалды.
Пери
Ми дуьнйады са рыш гъа,
Т1ылабырмы гымыш гъа,
Йы1кь га1дды, алагуьз Пери.
Ла1гьли каалды улабыр,
Гьарай, вас джуда хабыр,
Сургас мараъ задаа Пери.
Ара хывхад:
Мару1гъ вы перишан, Пери, Пери,
Изды бахтид лышан, Пери, Пери,
Дуьнйадид ярашыгъ, Пери, Пери,
Айванад сармашыгъ, Пери Пери.
Ми дуьнйады са рыш гъа,
Сес выъыйне гуьруьша,
Ры1хъбыр гьаъара ва, Пери.
Ха1ле увц1уд ваз гъана,
Билбилед ешел ана,
Гуьзет раъара вы, Пери.
Ара хывхад:
Ми дуьнйады са рыш гъа,
Мелаикед йуруш ха,
Дженнетда саъ са1рч1уд Пери.
Дуьнйа адиш умуд гъад,
Кьва1д йыгь йиъи ес выр ад,
Рыкьа изды ч1илы, Пери.
Ара хывхад:
1. Мару1гъ перишан (туьрк.)-пашмал мару1гъ, фикирдид мару1гъ.
2. Сармашыгъ (туьрк.)-Айванмы ла1бч1уд быч1быр, ларшанагбыр.
3. Гуьруьш (туьрк.)-са-сынийис гъадгвас дыхьын,свидание.
«Джинед рыш»
Изды гьу1мурди са ха1дий ливк1ур а,
Хьесым гемелиъ ва заала, «джинед рыш»,
Йыгь, выш вы гуьзет раъара сукьур а,
Хьесым гемелиъ ва заала «джинед рыш».
Ара хывхад:
Дустар, ихьды мукъа1 са рыш а,
Кемера у къизил, гымыш гъа,
Рирхьади джийранад йуруш ха,
Йик1е а1рч1ур а изды, «джинед рыш».
Быт1рад рышба1 дуьнйады бала диъи,
Сынийы у вешнийды ул гъад виъи,
Инамиш риш, вы рыгад са зы йиъи,
Ширин джан гемелиъ заала, «джинед рыш».
Ара хывхад:
Кьы1дид мыкбыр хъиц1ир, гъаъ хъад хъикьаси,
Гуьзет гьаъ, за ригиы илчи сигаси,
Джирч1ийне, къин гьаъара, сараха1си,
Гьу1мур гимилвиъ ва заала, «джинед рыш»
Авторад ма1гълумат: «Изды кихьинбыр кьыле гъаъадбише, изды на1гьнимыхда хъадабцыдбише, изды поэзиядис къимет вылц1адбише задаа кид-кине хулкара:
-Йис выды на1гьниек кид га1диере, джус рыгад рышахда рухьура, — «Джинед рыш»?
Йис хьуйне гъад рышере, гьадухъун ридж рыгад га1дия, джирч1ир, йыгъ гыргара, йик1 гьутхьва гьаъара — джинед рышере кал.
Биче рыш
Выды хыле за быч1 выр а,
Хьадид майданала луудкьуд,
Выды хыле за йик1 выр а,
Ц1ай китхьуд джанда угъудкьуд.
Гаракъ захда, быт1рад биче,
Сеп1е хьесымала личек.
Ара хывхад:
Ми дуьнйады е йидкьыр а,
Мигьманар на, мигьманар на,
Задаа вы хырыда мару1гъ,
Шикил уву1х аманат на.
Гаракъ захда быт1рад биче,
Сеп1е хьесымала личек
Хьадид йыгьа вы гьаргуйне,
Йик1иыла гьеч уджурхур ай,
Гьад севгидире ла1шуйне,
Зы выды джыбра руъурай.
Язухъ гьаъ ва изды биче,
Хьед саъ лик1уд джанды биче.
Ара хывхад:
Хъыргад, за сес выъыр ана,
Рыкьа вы быч1е ад багьди,
Билбилед сес убра ана,
Йыгъ лийиси е дженнетди,
Гаракъ захда, быт1рад биче,
Сеп1е хьесымала личек.
Бахтлы риш
(Сус эгъреръед хала гьаъад на1гъни).
Ми йыгъ бала шадды йыгъ и,
Ала гуьзли, вы бахтлы риш,
Быт1рад биче, вы бахтлы риш.
Эдкур ки ц1ыдды йыгъ и,
Бала джийран, вы бахтлы риш,
Маъ зы гьейран, вы бахтлы риш.
Дидды, шуд бармак увуху1д,
Вазырды нур, вы бахтлы риш,
Быт1рад гъад дур, вы бахтлы риш.
Нинды йик1ис ва ц1ай джыхы1д,
Къашбыр лы1хды, вы бахтлы риш,
Данбыр ирды, вы бахтлы риш.
Вы бахтлы риш, вы бахтлы риш.
Хьадис литхьуд са лала быч1,
Майдана гъад къваз, бахтлы риш,
Йа1ква1д ха1дий, вы бахтлы риш.
Ат1ласайк кид гымышед к1ыч1,
Кьваб ул ц1ыдды, вы бахтлы риш,
Йик1ис идды, вы бахтлы риш.
Вы бахтлы риш, вы бахтлы риш.
Йибкьыр а риге джамаха1т,
Лурза хъыргад, вы бахтлы риш,
Нагъвбыр самаъ, вы бахтлы риш,
Хайирдид йикихь сен-сагьа1т,
Ц1инды лахад иесси риш,
Йывды духарды вы нин риш.
Вы бахтлы риш, вы бахтлы риш.
Безетмиш рыъыд ц1инды сус,
Элдис хъыргад, вы бахтлы риш,
Дженнетдид ху1ри, бахтлы риш.
Хана рырых абыр, ламыс,
Мерди-мердане бахтлы риш,
Шадды теране бахтлы риш.
Вы бахтлы риш, вы бахтлы риш.
Сусды дамахбыр
Убур хъац нинихда, джан дух,
Суса зада шыв йагьа1рди:
Рыхьы1б тув на юкьуд балкун,
Юкьсур гьа1йнебенд ягьа1ре.
Йийц1ыр къат валгыд багьад,
Импортный махмыр йагъа1ре,
Гъилыдыбыр берламутад,
Къизил- брилиянт йагьа1ре.
Шыв йагьы1рди гьазыр йикихь,
Зы ки джус къаравуш рикихь,
Италйански мудна палаш,
Багьад шуба гьазыр викихь.
Йили ад «Волга», «Жигули»,
«Чайка» ригиде вагьа1ре,
Сервиз, хурустал, халыче,
Ха1ляды ха1дий вагъа1ре.
У1лесдикла далгыхьвна,
Шейед, шуркуд на1к вагъа1ре,
Къизил балугъ, кат1 на пылыв
Лурзур сур выше йагьа1ре.
Хьибды гьавыды рази диш,
Мансарда къавы йагьа1ре,
Ха1ят, магьа1д мраморад,
Охрана ригы йагъа1ре.
Дух за базара сигыйне,
Па1ч1ды емиш хъивихире,
Гьад емишед дад выъыйне,
Дуьнйадид лезет викьире.
Нине сиъинбыр рухьур диш,
Тама1хмыд гьеч кьадар адиш,
Мисед ишдагъ на гьакьал ад,
Залымад рыш а1гьра1бч1ур диш.
Па1ч1ды емиш хъувургъа ваъ,
Халды дур дунйадис агъ маъ,
Са джийранад шарак йибкьыр,
Кьа1сды нинды ва йик1 шад хъаъ.
1. Къаравуш (туьрк.)-халдыбыр гъаъас хъур харкъыр ад рыш-служанка.
Сахьусды быт1рад изды
«Самая красивая» рухъуд дагъыстандид
шансонад тарджума-перевод.
Гъийгъа вы сахьусды быт1рад риъи,
Вы1г1лешды улабыр са ва гьа1й,
Ришбише ки рухьура — бахтлы риъи,
Пехилене йа1хъбыр гьаъарай.
Ва ки, ры1хъды, бук1амыйкла йа1хъ гьыъыр,
Пашмалды дуьнйа шад ваъарай…
Ара хывхад:
Сахъусды быт1рад изды,
Йинчид бахтывар изды,
Лерчир, сырхы1р ки изды риъи.
Сахьусды быт1рад изды,
Быт1рад бахтывар изды,
Йик1 вас выр а, вы изды риъи.
Ракбыр ресторанад ачых йикиси,
Сыкьы1си дыхьыр е гьади кьва1р,
Бокалбыр джарагьыр ихьды гедгаси,
Мук1 ваъаси хыл хыле выр, яр.
Ва ки ры1хъды бук1амыйкла йа1хъ гьыъыр,
Мук1 ваъади, йик1 шад гьаъаси…
Ара хывхад:
Югьлад нагьумыхьван е кьат1 хъитшири,
Мадды йиркьыр вы хала хъыргас,
Хъырырых, вас гьад йыгара йишири,
Бала къайгъу адиш гъадид зас.
Вы хъу1ргъу1си выше гъац1ад ра1хъбырна,
Ч1улурды хукумыд кьанекде…
Ара хывхад:
Шафи Амсари
