Шиъирбыр, наIгьнибыр, теснифбыр, газелбыр, рубаибыр, бейтибыр
Нубарак йишихь…
(Амцурдылад «Имандай» Гьа1лимды духарды даватайк гьухьуд тост)
Эй, джамаха1т! Шадды йыгь и- убур хъац:
Изды мукъа1 шадды йыгбыр кам ма1гъу1йхь,
Ми даватайк гьубгур а кьва1б зурбад яц-
Давата у мысна гыблид лам ма1гьу1йхь.
Сус йиркьыр Мыха1ды — джийранад бала,
Кьа1се, кьы1чи рикихь — аслан ад хала.
Шадвалды, мук1, макьам, тостбыр а зала,
Амсар мукъа! даватбыр гьеч кам ма1гъу1йхь.
Тамада! Гаф вийаъ йиркьыд мигьманас,
Йыха1ъ макьам йыхды, мук1ад устарас.
Сифриды ул гъана ваъ, хьывад кам ма1гъу1йхь,
Ми маджлисди пашмалды мигьман ма1гъу1йхь!
«Имандай» Бабад виъий мырад, метлеб:
Гьа1лимыхда, хал ац1ыр, вишир куьлфет.
Гьа1лимды, Набатды — увц1ур а «буфет»,
Духарыс на сусус джва1р гъам мадугъу1йхь.
Мигьманар йидкьыр етесды рак йишихь,
Сусды рыкъа1 лугъуд быч1, йипак йишихь,
Джигьилешды хала хынхыд йа1хъ йишихь,
Ц1инды хала ва1 хайираа гьадагьуйхь!
Хъаф Тайир
Мыха1д райондид балинцеди захьван са
палатади кут1ур ад мыха1шура-
Хъаф Тайирде за, ху1рмет ана, гьухьуд
гафбыр.
Девир, девран йивигыд гьумурдихьван,
Къайима а1бч1уд лыдже гъырчешихьван
Рубадыла эккед андах ад Тайир,
Вада ха гъийгъа хъафашды тах, Тайир!
Увц1уйхь духреше хъафашды лах, Тайир!
Мабдиш ва Мыха1 джывыъыд иш-пеше,
Гиме-гут1а гъа халкьдихьван ха1ммише,
Гъы1рчер йик1иы гьана лепчид сур выше,
Мадиш чаллакды гъилабыр, Хъаф Тайир!
Кьа1сды къари йик1иы рыъыр сах, Тайир!
Кьасдыбишды лешур ва уюн, гьа1мал,
Балинцеди йахара вы сатыр хал,
Руб йывхы1сды кимаабдиш вайк «шагь дамар»,
Ха1штата гъа, эджелала йах, Тайир!
Дуст-мийманас ачыхды хал-лах, Тайир!
Хайлинды махвалмыхда зы хъацыри,
Давление изды лап сухъувгури,
Зы на вы ху1рмитдихьван сахъдалхури,
Гьахъадгуси даватмыйк е, Хъаф Тайир!
Йывхы1си тамбакуес чахмах, Тайир!.
Ешемиш йиш хъафашды дуруд кьухьды,
Выр ады рази йиш — духрешда тухды,
Духтур рышес савкьат вияъ артухды,
Йиниш куьмег, гъы1рчехъан-къуччах Тайир!
Шафид ч1илы выгыр ад дамах Тайир!
1 Х1аштат (туьрк.)-Мы1йц1ыр)
Хъаф Тайирыла хъуъ за та1гьрифбыр гьыъыри духтур-ришид — медсестрыед, гьади амарана)
Духтур-риши
Кьва1б ч1ел гьухьус йыгара зас йик1яды,
Вада, ай джагварды халат гъад риши,
Гьац1ара, риъи вы эсил, Мыха1ды,
Джагварды лирхьвадид либас гъад риши.
Ухьданва1лихда выды кьадар адиш,
Руб вырыхы1ди выды хыл кьалкьардиш,
Рази дикихь ваала га1нин, гаг-ка1шиш,
Рирхьади гвадирды юруш хад риши.
Улис гьувгур выгардиш хесдехана,
Кут1ас йыгара зас, вы гьади ана,
Хьели са эккед быч1ид десте хана,
Зы йыкьаси, «йик1 едере ад», риши.
Гъийгьа зы сихъигыр а духтурара,
Миннет виъи, ва гьад бала маъ ара,
Зы маа кут1ас хъикьаси — адиш чара,
Изды «едед» йик1ис дарман хад риши.
Зы йыгь йидкьыд йиъи, са «хесде» Шафи,
Вышдихь выды дур: Часи, Рафи, Мафи?
Гьалыс кьисмат рикисдихь вы, Иллаги?
Кефсызнийды ба1лы хыл гыргад риши!
Изды, хъыгад дуст, магьа1лим, Йирек мукъа1ды шаир Ха1джи-Юсифды, за музыка кивхьир ад, халкьдид гъад шиъирбыр.
Ихьды шаир
Шаир Ха1джи-Юсифды
75 сен йишид юбилеес
Са чапра ад мыха1бишды гьавыди
Выды ха1дий ливк1ур а, гьа1зиз шаир,
Йийц1ыр на хьуд сен йишир ки гьу1мурдид,
Йик1 джигьилне ехьван ад, хъыгад шаир,
Инсанва1лид ватанды дур ад шаир.
Якьинне вас хыныхвалды вац1ыд диш,
Хыных на вы дидды кьвакьы сукьуд диш,
Гьаса ки нагьакьды рыкъа1 а1ч1уд диш,
За1хмитдид мехьтебе йыхьыр ад шаир,
Ху1рмитдид йик1 дженде лик1ур ад шаир.
Мыха1бишды ч1ел а1хънекде вишири,
Йик1иы, мизы гъад «руху1кде» вишири,
Аферин, Фатима ханым дерде ришири,
Гьамыъ элдихда Юсиф- хьур ад шаир,
Базган сывахда «ешере» ад шаир.
Шукур, Куьр Раджабды лампа сапхъы1р диш,
«Хьед ад былаха, хьед хъиджидкьыр мадиш»,
Шаиреше гьуч1елес хьед гьабгъуд диш,
Ч1илды гуьзелва1лид пай выр ад шаир,
Джандид, сагъва1лид пай гьап1т1ур ад шаир
Йирекды курды выды шугьа1рбыр гьа,
За1хметкеш халкьдид хылид бегьербыр гьа,
Выды къадри вац1ынид тегьербыр гьа,
Шейирмыд лейсан гьугъара ад шаир,
Дуст Сакитис Инсан йишир ад шаир.
Вас гимийич1 Шаир рухьуд дуруула,
Бес! Элдире рухьура йиъидыла,
Курухмиш ма1гъв вы сурхъу1рды джандыла,
Шад, гуямиш йиш, духрешды дид шаир,
Юбилей вас мубарак, устад шаир!
Выды халкьдире рухьура, «Аферин!»
Сазахьван, ч1илихьван йик1 гьаъад секин,
Вас кьимет выс зы — Шафис йиъи четин,
Гьу1мурдихьван сабыр йик1е ад шаир,
Поэзияды ха1лды нур гьад Шаир!
Саз вырыхы1д гедене
Дустар, ва1 ки убур хъас,
Саз вырыхы1д гедене,
Дженде вишихьне ха1вас,
Саз вырыхы1д гедене.
Хьуъ лешаъ пулов ад къаб,
Сухьруды йишихь кабаб,
Йик1иы гьаъ гьашыкь Раджаб,
Саз вырыхы1д гедене.
Гьашыкь, йы1х шадды макьам,
Шадвалды викихь муддам,
Бегеде магъу1хь дерд не гъам,
Саз вырыхы1д гедене.
Ва хъа1л мываъ, гирамиг,
Нагъв сымываъ, гирамиг,
Лурза мук1 ваъ, гирамиг,
Саз вырыхы1д гедене.
Лала быч1
Быч1имыйк бала быт1рад,
Гьай лалабыч, лалабыч1,
Аман ваа магъу1й салат!,
Бедназар, гьавала быч1.
Муштуллугъ, лалабыч1, вас,
Кикара ирды ухнас,
Ширинды джандыла зас,
Гирамигды лала быч1.
Са арзуман а захда,
Джагварды мугъвартахда,
Мигьманна йыкьа йахда,
Ц1инды хала лалабыч1.
Бала быт1рад Зарифа,
Суга маъ нинды джафа,
Варагъыр а Юсифа
Гьашкьдид са пияла, быч1.
1. Мугъварт-некъидид быч1-(роза)
Наздихьван
Назлы дилбер буйламиш риш,
Гемзаъ наздихьван, наздихьван.
Лешаъ къвазырды йуруш,
Гемзаъ наздихьван, наздихьван.
Мугьвартахда миннет ваъад,
Зы билбил виъи нагьв сывъад,
Гьад гьашыкь ва дели гьаъад,
Гемзаъ наздихьван, наздихьван.
Имынды рыкьа инсаф гьаъ,
Вахда марухьуйхь бейвефа,
Гъариб билбила т1аваф ваъ,
Гемзаъ наздихьван, наздихьван.
Севгилиес муштуллугь вий,
Зы выды улихда йикьий,
Лышнед у1б лывъыр т1илия,
Гемзаъ наздихьван, наздихьван.
Зерхара гьивилбир курсус,
Кирикара ц1инды сусус,
Юсиф хала шуна сукьус:
Гемзаъ наздихьван, наздихьван.
1.Буйламиш риш (туърк.)-хьурахда лаъ риш, къул лаъ хывакъ.
2.Бейвефа (туьрк) — инсаф дишды,
3.Зерхара (туьрк) — гъизилехьван рыт1а гьыъыд парче, хара.
Умует
Лап джигьилды вахтбыр хъа1гьа1ре,
Изды йик1ире, Умует,
Гьурхьара, зы бирян гьаъара,
Гьиджрандид ц1ире, Умует.
Са вас гьац1ыйхь, са ки феклекес,
Йикисды йишир а, Умует,
Адгаси таа кьийаматас,
Йик1иы гъад йара, Умует.
Вы Ху1ри риъи, зы ки Раджаб,
Вы виригь виъи, зы Тураб.
Аман, зайклаа маъ ва кабаб,
Имынды рыкьа, Умует.
Ва захьван йис ваъара хъа1л,
Вас джавац1ыр изды а1хвал,
Юсифды дженде мабдиш хъа1л,
Сурма улире ,Умует.
Мыха1ды рыш
Бахтлы ришихь вы гьаммише,
Мыха1ды рыш, Мыха1ды рыш.
Ч1арымыйк кит1аъ беневше,
Мыха1ды рыш, Мыха1ды рыш.
Ц1ийлахъанад дере дженнет,
Лалаъанад хьед са шербет,
Ха1лал виъи выды за1хмет,
Мыха1ды рыш, Мыха1ды рыш.
Хьесыма вазырды нур ад,
Лы1хды къашбыр улабаа гъад,
Банаа лиркьад быч1кал быт1рад,
Мыха1ды рыш, Мыха1ыды рыш.
Адиш вахда инсаф, иман,
Джан,- рухьура, ла1пшуре джан,
Мыс рикиси вы ес мигьман,
Мыха1ды рыш, Мыха1ды рыш.
Джан кьурбан и вы бадана,
Вы шам виъи, зы первана,
Юсиф маъ дели дивана,
Мыха1ды рыш, Мыха1ды рыш.
Майик мири
Гьухьуси ва на1к виъи, кубук литхьуд,
Гьам набат и гьам шербет, Майик мири,
Хьад йидкьыйне ришбише сейир гьаъад,
Эшг агьлийишды муху1бат, Майик мири.
Хьидихда кьимет адиш — марджан, марджан,
Севгилим ва ки рагъ, сагълам йишихь джан,
Вас хабар адишийме, назлы джийран:
Гьам девлет вы, гьам шо1гьлет, Майик мири
Гъы1нне банымыра быч1ид дун лаъад,
Юсифды арзу, хиял ширин гьаъад,
Джендире нуш гьаъад, йик1 серин гьаъад,
Гьам на1гьмет3 вы, гьам леззет, Майик мири.
1. Эшг агьлиер (туърк.)-дыгадбыр.
2. Шо1гьлет (туьрк.)-дур, унад.
3. На1гьмет (туърк.)-берекет, девлет.
Базган
Гъы1нне хьибды вазыра,
Вы хы1быд шуьгьлет, Базган
Серинды былахмыра,
Вылц1ара лезет, Базган.
Былахмыы гьейран и зы,
Умудбыр вайк ки изды,
Элдид девлет виъи вы,
Вар Базган, девлет, Базган.
Быч1имыйкла либас лаъ,
Дусташды гуьгьуьл шад гьаъ,
Быч1 гьу1мур кьа1се мываъ,
Кывыр хаджалат, Базган.
Уфтан виъи Гугазды,
Гъы1рчешды суьруь гьади,
Гьай изды дженнет калды,
Джан Базган, дженнет Базган.
Хумухд йиъи гъаъ гене,
Махьв гъугъара йиз кине,
Юсиф хъу1гъу1ре дагьа,
Абга саламат, Базган.
Шаир, кьа1се ма1гъв
Кьа1сва1лире шад гьаъас диш,
Кьа1се ма1гъв, шаир, кьа1се ма1гъв,
Джигьилвалды ыхъывгас диш,
Кьа1се ма1гъв, шаир, кьа1се ма1гъв.
Гардан выды ч1увукаси,
Улабырмаа нагьв сувкаси.
Мич1ри йизиры сукаси,
Кьа1се ма1гьв, шаир кьа1се ма1гъв.
Эй дуст, а1хдиет йиш бала,
Намерд ма1гъу1й ва гьавала1,
Шейир маба кивхьис гьала,
Кьа1се ма1гьв, шаир, кьа1се ма1гьв.
Хыла а симирвихь кьалам,
Шейир кивихь ва ес муддам,
Гуьзелеше высдиш салам-
Кьа1се ма1гъв, шаир, кьа1се ма1гъв.
Гьам мискин, гьам гъариб йиъи,
Юсиф ч1илда кесиб йиъи,
Телесых ма1гъв, гьала к1ыб и,
Кьа1се ма1гъв, шаир, кьа1се ма1гъв.
1. Гьавала (туърк.)-джуда выдж хьур хад, дамах хад инсан.
2. Мискин (туърк.)-Г1а1ле т1или ивхьийне сыс джаваъад, язухъ.
