Изды нин са
Дженнет риъий,
Г1а1ле ад миз
Шербет виъий.Нин хьур ваа дур
Быт1рад гъад,
Вы йик1иыла
Гьеч уджрурхад.

Гъайиб Иллаги!
Гьеми та1ла1х
Зас кивхьири —
Вахтсыз кьат1а
Нин эгъеръири.

Нин балыед
Пергер виъи,
Нин адишды
Дердисер риъи.

Валлагь зас зы
Рац1адаа хъуъ,
Алалаъ ул
Ливидаа хъуъ,
Хъыргар диший
Секкинийис,
Бала ква1ч1е
Риъий дидис.

Вы хыле хад
Виъий са ча1к,
Гьагурдиш гьеч
Зас са йыгъ, йок.

Хизындире
Рыъыр ай къул,
Ришир ай са
Закла ч1умул.

Хьыв улерей
Авгъуехьван,
Йыгъ сиргарай
Къайгъуехьван.

Захьвандыбыр
Дюлхъерей,
Изды мысга
Уле нагъв ай.

Ти риши са
Ханум, бике,
Йикий нинды
Йик1ик леке.

Гвалахмыд зы
Геререй к1еъэ,
Убра ад ун
Валхуд келле.

Са залым шу
Ай захда,
Хъирхьуй выдж
Кьахды сывахда.

Шивди за
Мибишис гьыъыд,
Гьал иди зы
Къанды хъырвыд.

Гъу1нала парч
Ситхьур диш,
Гъилыла галыш
Игъитхьур диш.

Лейих диший
Зас тик-дабан,
Лазим диший
Ришин уфтан.

Душманад кал
Лат1ури джан,
Бес зы ки риъий
Джигьил-дживан.

Изды йик1 кал
Амый гьутхьуд?
Валыг лаъарай
Сиъин ситхьуд.

Миз ана зы
Ришир ай лал,
Зиндан йиъий
Дидды хал.

Гьай, дур сыхы1р
Выъыйне лал,
Лыкьын сип1ир
Кьалкьарай хал.

Зы гьаргуйне,
Гурурзарай,
Уле эбир
Лувурзарай.

Вийир руръус
Йыгарай кьул,
Игъипхьуй гьа
Нинды шеве ул.

Джурхуд нин диш —
Са фендигар,
Йип1кьыр сывхы1д
Йилдындид бар.

Гъы1лд йидкьыйне,
Сыва эререй.
Кьы1д йидкьыйне,
Вихьихда хъеререй.

Аъ кувгъур диш
Гьеч изды ч1ел,
Гьаса яцад кал
Рыхы1рей ба1л.

Ха1ле лерч1ус —
Ха1л гьатхыр ай,
Ч1ире а1рч1ус —
Ч1ир ч1идк1ыр ай.

Эхир леркьыри
Зы са ешды,
Ихтилат за
Джаъас хъа1шды

Первердигар!
Ми шыв илсан
Риъиди, яраб?!
Гьутхьур джан
Йишири кабаб.

Выг1лис рывыр,
Эгъерири хала.
Сырхы1ри маа
Са юхсула.

Гиме йыхьыр
Т1ыма етерей,
Хала хъиркьыр
Заа ч1ел сивтерей.

Джурхуд нинис
Гьаргур джыгад
Дидис выды
Къан хаджалат.

Дид сагъ ине
Етим риъий,
Гьу1мирдыхьван
Нукар риъий.

Йыгъ выйне,
Виригъ вырдиш.
Йыван выйне,
Майдан вырдиш

Дерд выйне,
Дава вырдиш.
Багъ выйне,
Бегьер вырдиш.

Гьей, ми шуду
Дуьнйа виъи?
Сынийис — девран
Сынийис — виран.

* * *

Нигебанад гьатхынвалды,
Хьадид гыблид серинвалды,
Рыкьа на вы сайир гьаъас
Сабтана на ва хайинвалды.

Зас кал йиъи, валлагь, джус ки,
Йик1яна ридж рурхьвара а,
Гьай, ул ливир гакъыйне,
Эй еришдид уфтанвалды.

Гьай, гьурхьури, зы гьурхьури,
Лап дерде-къама ирхьури.
Бейвефа яр ядас ришир,
Ватандыла игъирхьури.

Гюльзада Аль-Рутулли