23 апрелес Дом дружбади РД-над Росгвардиедид Управлениедид ОМОН-ад контртеррористический операциема дыркьыд эскерешды бегедебишис выр ай госнаградабыр. Гьа операция йишид йиъий 17 июнас 2016 сыда Ерси му1къу1д бегеде Табасаранабишды районди ад. Гьа мероприятиеди иштрак гьыъыр Дагъыстанад врио Кухьды Владимир Васильева, Российский Федерациедид нацгвардиедид гъушуммыд кьухьды генерал-полковник Сергей Меликова, Северо-Кавказский Федеральный службадид округад нацгвардиедид къушуммыд командующий, генерал-лейтенант Сергей Корнюшкине, СКФО-ди ад Российский Федерациедид полномочный Представителед заместитель Валерий Попкова ва маддыбише.
Мероприятие ачых ваъади, республикадид врио кьухьды Владимир Васильева гьухьур: «Ха1юф, йыхдыбыр еда дихире а. Гьа илсанар йигитва1лид абыр виъи маддыбишис, ва гьабишихда гадкьа1ре кьуфа дуруъура а ихьды джигьилер. Гьабишды гьунардыхьван лаъ руъура Россиядид ва Дагъыстанад дур. Эдемивалды, йигитвалды, патриотизм сахьусды национальный характеред чертабыр йиъи дагъыстанабишды ки ва россиянашды ки. Гьабишды йигитва1лис гюре еда леч1ур а балад гвалахбыр гьаъас Дагъыстана ва, сахьусды кьул, безопасностед сураа.Сиене гьабыр гьаъара ад йиъий Дагъыстан лаъ-хьуъ вишин бадана, гьадихьван сыт1а яшайиш йыха йишин бадана ихьды халкьдид. Ихьды бырдж — гьабыр гьу1мирди йик1иыла утха джыдыъын».
СКФО-дид Полпредед заместитель Валерий Попкова сагъул-варулбыр гьыъыр правоохранительный органмыд къуллухчийшис СКФО-дид полпред, Россиядид Йигит Олег Белавенцевад сураа гьабише кеп1ид гвалахас гюре – халкь увуху1н.
«Сагъул ваъара сиене дидабашис ва нинабашис хынимешды, гьу1мир сивхьид Дагъыстана мир вишин бадана. Ихьды йигитер гъийгъа гьухьус йикиси са дараджие люздир а да1вие Москва на Сталинград бадан джан сихьибишихьван. Гьакьдыкьул гьабишила и гъийгъад джигьилеше пример лювшур йыгад» — гьухьур гьание.
Йик1иы хадкьыр ва сагъул выъын йигитешис – ихьды сиенебишды бырдж йиъи, гьухьур Российский Федерациедид нацгвардиедид къушуммыд главнокомандующий Сергей Меликова.
«Зас сагъул ваъас йыгара сиене миди иштрак гьадбишис ихьды верховный главнокомандующий Владимир Путинды суруула кьуле гыргынис гюре ихьды бырдж, ва е гьа кьуле гыргара йик1 сихьир. Балад вахт гьабхы1р а ихьды йигит гадиер дыркьыдыла хъуъ гьу1мир выр Дагъыстан бадана. Гьабишды гьунарахьван гъийгъа сагъ-шад диъи илсанар республикади ки ва сиене ху1кимете ки. Генеки сагъул рухьура илсанашде, гъийгъа гьагвалах ваъара ад», — гьухур Меликова.
Нацгвардиедид къушуммыд кьухние генеки гьухьур, гъийгъа Дагъыстан гьувгара дегиш вуруъура а: гьа дегиш вуруъура а сыдырмыхьван ваъ, вазырмыхьван ки.
Гъийгъа Дагъыстан сакал виъи сиене республикамыхьван ихьды ху1киметед: хынимер гич1 адишне мехьтебе диъи, джигьилер спортахьван мачхул диъи, илсанар кучима гадгъа1ре а, гьидылана гич1 джывыъыр, гьа гьунар йиъи сиене халкьдид, а ч1ирид вышне каджабгъуд. Гьа силовикешды гьунар йиъи, ч1ирид гвалахмыд кьул хывыркьад. Амма гъийгъа сагъул ваъара джан сихьибишис Дагъыстан бадана, ихьды яшайиш бадана», — гьухьур гьание.
Гьади Ордена Мужества выр ай полициедид старший прапорщик Султан Абакаровды къариес — Лейла Абакаровас, полициедид старший сержант Халалмагомед Курбановад нинис — Зайнаб Тагировас, старший сержант Хасбулатов Тагирды къариес — Зульфият Хасбулатовас ва полициедид прапорщик Бийсолтан Хайбулаевад шус — Темирсултан Хайбулаевас.
Гьади йыхана эскервалды выгыргара ад Дагъыстана Росгвардиедид военныйшис ки выр ай наградабыр.
Республика Дагъыстанад внутренний гвалахмыд министр, полициедид генерал-лейтенант Абдурашид Магомедовас выр ай медаль «За боевое содружество».
