Амцурдыды сельсоветед чалышвалдыбыр

IMG_8212-19-04-18-06-08

Амцурдыды сельсоветмы гъа, ара ки ква1б му1къ — Амсар ва Кала. Гьади ад администрациедид кьухьды йиъи джигьил эдеми Суракат Курбанов.Ми джибради вахтинди гьа йиъи чалыш геники джуды гвалахбыр гуджли гьаъара. Шесне гьание джухьды му1къа1ды аъ-гъаъ кид илсанашихьван выъыр месла1гьа1т ва гьа патриоташды кюмгихьван Амсар му1къа1 да1види дыркьыд йигитешды ц1ырымыд хатирес сихьид памятник гьегъийкъат йигад кал ц1ине хъыъыри, гьадид аа-уу гид ма1гьле ки дуьзгин хъывыъыр, заборбыр ки ц1ине хъыъыр.
Мистед сыда ки амцурдибишды администрациедид кьухьды чалыш йиъи мааки сасад джуды хыл ливиркьад джыгыма ц1инвалдыбыр гыргас хьур.
IMG_8661-19-04-18-06-08

Му1къ1 ад Дом культурадид тамашемыд зала гьаъара ад ремонт – гьади лыт1а гьаъара гьамыъ стройматериалмыхьван гъараа хьуъды масбыр усул хъывгара.
«Гьадыла саваенди, — рухьура а С. Курбановара, — зас йыгара гъара аъ дуруъуд джыгыди уфтанды файе ваъас ва гьади масаллык ки кеткьвас да1види дыхьыд ветеранашды ва му1къа1ды таарихди дур-ун ад илсанашды шикилбыр. Гьади гьаъасды гвалахмыд мамзил ки виъи 260 м. К1аълиде му1къа1 мидийыкьамаъ адиший да1види дыркьыд йигитешды хатирмыс сихьид шывга памятник.
Гьадыла джуьхьды сельсоветед администрациедид кьухьды Суракат Курбанова гьыъыд и гьади ад инсанашихьван, месла1гьа1т, коч1ус хьур К1алидебишды мехьтебед улихьде гид майдана мисед памятник луза гьаъара.
Ивир бин, гьыъыр титанахьван ма1хкам, лаъна гьаъара а памятник. Гьади, ишлег гьаъас хьур, гьалаки лешур а мисед стройматериалбыр: 20 мишух цементед, 30 метри йилагад (профилед), 5 лист шиферед, ГВЛ 29 м керамогранитед, 15 лешух плетед ва са ки да1види дыхьыд ветеранашды дурубыр кихьисды мраморад плита…
Ми памятник сихьир бегьем гьаъас хьур нийат а 9 мая йыкьамаъ, ва гьадыд бегьемвалды йыгара а ачух ваъас сиени районди ад дур-ун ад илсанар сес выъыр, ва гьада К1алида аъ гъаъ ад дур-ун ад алсанар ки мийманва1ли сес хъывыъыр.
Виъине ки, ми гвалах виъи лап сахьусды сывабдид, ва аала лаъ диъид джегьилешис ки патриотический услахьван тербие вылц1адис таликьды.
Гьадыла зас гьухьус йыгара: «Вас сагъул, джигьил сельсовет, ва гьаъара ад йыхды гвалахмыд сураа!

Къинады Саид