Х АI Б АI ХЪ АI Н
Шала бармак кьулы гъана,
Ха вада дамах хаIбаIхъаIан,
Илсанашды арыди ад,
Мерд, йигит, къуччах, хаIбаIхъаIн.Гьатхыд банбыр, гегьендж чулбыр,
Халкь гьыъыр а тек вы а хьур,
Вы йиъи Ватандид абыр,
Уьлкуьдид чирагъ, хаIбаIхъаIан.
КьыIнне руъуд ГьаIштарханди,
ГьыIнне хъуIгъуIд Дагъыстанди,
Багьа йиъи ихьды халкьдис,
Колхозад даях, хаIбаIхъаIн.
Са хала маджлис вишихьвна,
Илсанар йыгъмиш дишихьвна,
Лезет адиш йак джишихьвна,
Сухьрудид чирагъ, хаIбаIхъаIн.
Литедикла хал гьаъара,
БылваIлис хиял гьаъара,
Выды элдис мал гьаъара,
Йыгъ-выш уяхды, хаIбаIхъаIн.
Сиъинбишда лаIгъуIд кар диш,
Вахьван гьеч вышне леркьардиш,
Амаа ва дамах ваъардиш,
Гъеблийне къаймах, хаIбаIхъаIн.
Партиедид рыкъаI ана,
Халкьдид метлеб йикIиы гъана,
Хывкьа гьаммише лаъ хана,
Ленинед пайдах, хаIбаIхъаIн.
Г Ь А I З И З В А Т А Н
Гьадхыд банбыр, дерин дере,
БычIбыр лилкьад гьагъзыр джуьре,
Вахда рухьура элдире,
ГьаIзиз Ватан, гьаIзиз Ватан!
Деребыр ад лап деринды,
Гьавабыр ад хупI серинды,
Былахбыр ад шаб-ширинды,
ГьаIзиз Ватан, гьаIзиз Ватан!
Мугьуды гъад рыш-чалахъан,
Гелешыхьван гьулхъад чупан,
ХаIр са бычI гъа-дердес дарман,
ГьаIзиз Ватан, гьаIзиз Ватан!
ХаIр са кардис улихьде гид,
Рус-халкьдыхьван шу на виъид,
Кремлидид виргъихьде гид,
ГьаIзиз Ватан, гьаIзиз Ватан!
Выды дур и бычI Дагъыстан!
Ихьды йигит халкьдид Ватан,
Е ки диъи бахтлы вахьван,
ГьаIзиз Ватан, гьаIзиз Ватан!
Г А Д Ы Й И Ш И С
Дуьнйа выйхьды, ваI — дуьнйадид,
Сий дуьнйады багъ, гадыер,
ВаI джитшихьвна ливиркIвардиш,
Маджлисма чирагъ гадыер!
ВаIхде вишихь гьакьал-камал,
Писды кардымыс маъ хиял,
Ми дуьнйады асланар кал,
Дишихь ваI уях, гадыер!
Дидабашды рыкъаI ана,
Быгаады йыгъ йикIиы гъана,
Дыкьа ваI хыла хана,
Ленинды пайдах, гадыер!
ВаI диъи дуьнйадид мырад,
Ихьды халкьдид ихтибар гъад,
Джамесебды улабаа гъад,
ЙаIкв вылцIад чирагъ, гадыер.
Б Ы Ч I И Д Д У Р Г Ъ А Д
БычIид десте хыле хана,
ХупI дамах хадишме вада,
БычIид гьуIмир цIамды виъи,
Шууна гьухьус бычI за вахда?
Хъарац захда, хъарац захда,
БычIид дур гъад, бычIид дур гъад.
ГуьзелваIлид ухшербыр ад,
Къашкъарад укI хьесымаа гъад.
Халычедыхда суркьуйне,
Гьагъзыр джуьре бычIбыр хырхад,
Гыргырмар гид джагварды гвад,
БычIид дур гъад, бычIид дур гъад.
Кьулуу хара, гъилы кIалыш,
Гвад кал рирхьад мыхаIды рыш,
Вы майдана аIгъаIрчIуйне,
Ваъара гвадирды юруш,
Вы риъи билбилес таныш,
БычIид дур гъад, бычIид дур гъад.
ПIызымыйкла йаIхъ гьаъара,
Къашбыр на улабыр лыIхды,
Дженнетди мелек анахъун,
Вы гьанийыла ки йыхды,
Эдеб, хаIайадис артухды,
БычIид дур гъад, бычIид дур гъад.
ГуьзелваIлид кьадар адиш,
Мыхыр гьаIйне, гардан-шуьше,
ХупI дишийме гуьзелвалды,
Абгырийден вы гьаммише,
Къизилгуьл, Лала, Беневше,
БычIид дур гъад, бычIид дур гъад.92
ДУХТУР РЫШ
Бала гьаlзам вахт виъи,
Лаlшур ад зы дердере.
Вас шыгыет гьаъара,
Джанда ад йикl едере.
Припев
Дуьзне йихьяъ, адишме
Ми дердес са дарман, рыш?
За ми наlгыни гьаъара,
Вы бадана, духтур рыш!
Джагварды халат гьана,
Йикlины убур лихьяъна,
Гьадире шив рухьурди,
Выды йикlик кихьяъна.
Припев
Выды маlдды йиlихьван,
Изды йикl ки лепчире,
Арабир вы бадана.
Къафасды эгъепчире.
Шафи АМСАРИ
