Махачкала, 18 декабрь РИА «Дагестан» «Ес хъывыр ад генеки тангымыд кюмегдыхьван еда бегьем гьаъас йикиси мистед сен бырджбыр гъадишне. Гьа бырдж йиъине абыр йиъи сен сыды гъана шумдиъиди сыда, гьабыр йишир абыр йиъи Республикадид газовый сетьбыр кьуле гыргас джишийне», — гьухьури Дагъыстанад Врио Кьухьды Владимир Васильева.

Йик1иы лихъийис йигара, Россиядид Президентед фонда мистед сыда уу гъана хъывыр а Дагъыстандис 3,2 млрд. манут.
Гьадис лазимды распоряжениеды ху1кийметед Кьухьды Владимир Путине къул диъир ай.
Республикадид врио Кьухьние доклад гьаъади 4 декабрес шыв ха1ле ади социально-экономический а1хвалат региона дилег гьыъыри Россиядид Президентахда манутмыд сура кюмег вын бадана еда хъывыс йикисне дуллухмыд бырджмыд на социальный харджибыр.
«Гьа выр ад кюмегдыхьван декабрь вазыра еда хъывыс йикиси бюджетный сферади ад къуллухчийшис сиене дуллухад бырджбыр мистед сыдыд бюдждетед Закондыхьван (Сасад бюджетникешис выси декабыред аванс — кедгыбыр хъывыси январес 2018 сыда).
Кьуле гыргас йикиси социальный ва коммунальный обязательствабыр, лешуси руб-дава, хынимешды улесдыбыр ва выс йикиси гьабишды пособиебыр. Гьадыхьван сыт1ана еда кьуле гыргас йикиси сиене бюджетный обязательствобыр», — гьухьури Васильева. Гьание выъыри эккед сагъул Президентес, джуду резервный фонда ес выр а хьур 3,2 млр манут.
«Сыдыд аахирес ес выр а эккед кюмег, гьа рухьуд ихтилат йиъи Дагъыстанад кьухьдыбишик умуд кинивиъи хьур. Гьамыъ ихьды къайгъу виъи са, гьа выр ад танга лазим йиъид ка ишлемиш гьыъын, дагъыстанабишды лаъвалды вишин бадана»,- джубра гьухьури В. Васильева.