ПАРТИЯ

Партиедид гьунар бала гуджлид и,
ХаIдиймыхьван лаъ кеепIид ихьды пайдах,
Партия Совет халкьдид виригъ виъи,
Лап гьахълына ЦКдиде ха дамах.

Гъалат джыъыр Ленинед рыкъаI дуьзды,
Джанга ана неразивалды адиш,
ХуIрмитдид, саваIлид лышан лейихды,
Са чIилы йидкьын йиъи выды хаиш.

Партиедид нацIурмыд хьед дерин и,
Деринды нацIур дерйагьайк кувчIуси,
Гьад нацIурды хьидид сес ширин виъи,
Сафды йикIимыд хьура видж гувчIуси.

Кьин гьаъара ми дуьнйады викисдиш,
Вала гъайри бегьем, уьткем партия,
ИнтагьаIммыс вы гьеч гьаIджиз вишид диш,
Джангыма вишири маIхкем, партия.

Къанна кьуIне вы съездмыйк сытIа вишир,
Къанна кьваIб хаIдий ес ливкIва выъыри,
ЗаIхметкешер выды джыбра са дишир,
ЦIинды гьуIмир, маIхкемды раIхъ сивири.

Гьад рыкъаI вы мысга хьура гид виъи,
СалатI вишид мыкь, тIурфан терг ваъара,
Гьад рыкъаI сиъинбыр дыкьасды диъи,
АзадваIлид мырад герчек ваъара.

Выды йаIкв джишихьвна изды беденди,
ЙикIе ара тIурфан на хар йикиси,
Вахда за наIгьни джурухьуд арыди,
Изды чугурас синбыр дар йикиси

1. Джанга — ара йытхыlн, борьба

ХХII-СЪЕЗДЕС

НаIгьни гьухьус гаф выгара,ХХII-съезде,
Хьуъ геетIес гьунар йыгара,ХХII-съезде.

ГьаIзиз дустар,хабар а ваIс-
Волгады сихьид цIинды ГЭС,
Гьад лейих йиширдишме бес,
ХХII-съездес.

Гьатхыд хаIлбыр митIуIгъ гьыъыр,
Титовды дур йишир машгьур,
Таликь гьыъыри гьунарбыр,
ХХII-съездес.

МаIгьлумды хабар викиси,
Кремлиди дур руъуси,
Космонавтара хыл выси,
ХХII-съездес.

Сыва чубан, чулди лежбер,
Гене ки артух гьаъ бегьер,
Сес ваъад вишир а тегьер,
ХХII-съезде.

ЛЕНИН

АзадваIлид рыкъаI-кьула,
Дыгыри ва е, джан Ленин,
СаIчIури ихьды йикIыла,
Гъам на гьиджран бала, Ленин.

Хырыдад, бегдед, деринды,
Йыхды, пис, дыкьыIл, ширинды,
ХаIр выъыри джилид, хаIлды,
Ачых выъыр ара, Ленин.

Партия, ихьды са регьбер,
Вы а хьур шад диъи эллер1,
Са дженде ад йикI не джигер2,
Гьал гьаъаси джура, Ленин.
Вы ихьды, гъийгъа, а йикIе ,
Бан кал лузур халкьдид дерде,
Гьад пайдахад нур а дженде,
Спутникмыд мыхра, Ленин.

1. Эллер (туьрк.)-халкь.
2. Джигер (туьрк.)-лакь

МОСКВА

Виргъире нур вылцIара саъ накьудис,
Ва нур вылцIара накьудис, Москва,
Кремлида геледжекдид сахьвармыс,
РыкъаI ивир а ихьды халкь, Москва.

Вада,выды халкьдиде ха дамахбыр,
Сывыма нур гъад йиъи выды йаIквбыр,
ЗаIхметкешешды букIамыйк ки йаIхъбыр,
Ихьды хошбахт хьесыма гывакъ, Москва.

Партиедиде йыгъ-йыгъала лаъ ха,
Урус халкьдис шубаI диъи — дамах ха,
Ихьды йикIбыр са йиъи, са хал-лах а,
Ленинед пайдах лаъ хывакь, Москва.

АслахIвалды увурхуIре лувза вы,
Халкьдис дуьзды раIхъ гьувга ваъ-гувза вы,
Накьуды йаIкваIд хаIдий кал ливкIва вы,
Совет халкьдид умуд, даях, Москва.

МОСКВАДИ ДИЪИНЕА Е

Геледжекдыы лихьир гъаIбыр,
Шин сагъуIре ад диъи е,
Накьвуды цIинды йаIкв сагъур,
ХаIля далгадбыр диъи е.

Е банбыр дегиш гьаъара,
НацIур хылы хаIр ваъара,
ЦIинды муIкъ къурмиш ваъара,
Накьуды гъадбыр диъи е.

ХуIрмитдид наIгьни рухьура,
Шад виъи халкь, гине хьура,
Дыгыр мыхра адубгъура,
Партиедидбыр диъи е.

Сывымылад йаIквбыр хана,
ЭслаIхваIлид лирхьвмар хана,
Юбилейдид бычIбыр хана,
Москвади диъине а е.

ИЗДЫ БАНБЫР

Гъилабыр гаIдды, назик1джийранмашды,
БытIрад, хуш макан йиъи изды банбыр,
ЛыкьаIшихьван ледгир ад илсанашды,
Къуччахад майдан виъи изды банбыр.

Каспийдыла ливийне йаIкваIc виригъ,
Сес ипхьур, чулбыр йикиси са саягъ,
Сумах сивид кал гьабгура дере-дагъ,
Емишмыд ватан виъи изды банбыр.

Гакъыд, юкьсураа гьагвара суьруьбыр,
Былахбыр кал ахмиш йиъи хаIредбыр,
Дирибаш и дояркыед гъилабыр,
ХаIбаIхъаIн ваIс хан йиъи изды банбыр.

КьваIб билбил-кьваIб ара хана гьалгара,
Бала хъуд гъыlрч къайимыла гьувгара,
Йыгъ-выш сывыма гьуIмир лывырсара,
Дердимыд дарман виъи изды банбыр.

КьваIб ул выгара тухкемаъ гакъасды,
Шаир йыгара деринне гьалгасды,
Джамесебе джуула саз лаъ хывкьасды,
ЙикIид арзуман йиъи изды банбыр.

МИ СЫВЫМА

Шыв бытIрад йиъи йыгъ хьадид,
Шилды майдан виъи бычIид,
Ирды ялов липхьур виргъид,
ЙаIкв ликIур а ми сывыма.

ЙаIкваIд хаIдий кимабана,
Билбилед авазбыр ана,
ХаIбаIхъаIнешды тутлара,
Сес ивир а ми сывыма.

Кьулы гъана шала бармак,
Шалбузада ха лап дамах,
Бала йигит, бала къуччах,
Илсанар а ми сывыма.

Гакъыд руъура магьаIтIал,
Гьагуйне къайимыд хъутIан,
КъыIбды, ирды, ранг- йагъаIд кал,
Лала бычIбыр а сывыма.

ЙикI ачых и улабыр тух,
ХаIр са наIгьмет виъи артух,
Былахмыхъаъ йиъи буллух,
Езед наIкбыр ми сывыма.
Былана, дурула сиргад,
БычIимыд ил хъуна лилкьад,
Ватандид юкь сура леркьад,
Багъдид бегьер а сывыма.

Берекетдид увцIур тепе,
Гьулхъара а гелер куьрпе,
Хьыблихьван рыхыIре лепе,
Кьирид ешбыр а сывыма.

Джамесебды йикI и секин,
Ватан хъу хьур джухда эркин1
Играми Кремлидид, метин2,
Ирды йаIквбыр а сывыма.

1. Эркин (лезг.)-эркек, гуджлид.
2. Метин (туьрк.)-саджатхъаIсды.

САМУР

МаIдды хьедбыр шип ширинды,
Нарзанад йиъи хьед Самур,
Дериди аяз серинды,
Изды йикIид мырад Самур.

ХаIр са былах дарман виъи,
Гьадыла вы хъывгад виъи,
Сывбыр выды ватан виъи,
Зар гъана виш, дур ад Самур.

Вы вухуд виъи сывымыс,
Кемер виъи вы банымыс,
Хьед кивий бычIе ад багъмыс,
Я бахтывар азад Самур.

Дагъыстандыхда а чулбыр,
Выды хьед рагъад миллетбыр,
Хумухдид былды бегьербыр,
Уьлке викихь абад Самур.

ХаIр йаIкваIс теменбыр хана,
Шей-шурук йибкьыр шадана,
Ришбишды парч гъуIнаа гъана,
Битмиш ваъ ва мырад Самур.

КЪАЕБЫР

НаIх и — виригъ шейид виъи,
Ми зас гьагуд накьбыр диш,
Нинды Ватан ширин виъи,
ВаI йикIис къаебыр диш.

Фикир, гичI хырыда виъи,
ВаI гьагуйне, зас йикIе,
Нин кал зас вы иде виъи,
Къайимыд изды уьлке.

Выйхьды дух и, шак ана
Гьамаруг зы бенде кал,
Изды улабас гьагвара,
ВаI зас тIитI кывыд нин кал.

Ми сур къае, ти сур езел,
Гуьл махмырад дамбыр и,
Гьабыр йигитешис эзел,
Нуьсрет выд мамыйбыр и.

Нагъвбыр кал гьагвара улид,
Выйхьды мыхра былахбыр,
Къаебыр диш ваI Ватандид,
Дамахбыр и дамахбыр.

Выйхьды йыкьаI экке дишид,
Ламысдихьван илсанар,
Са шума рыкъаI эхъедид,
Сес джывыъыд мигьманар.

Изды йикI са лакь виъийден,
За ваIс ачых ваъасий,
Шудаъ ваI багьа йиъийди,
ВаIс гьад лакьа гьагусий.

Джан къаебыр, гьал гьухьуд и,
ВаIхде: «писды дагьарбыр»,
Диш, гьад са фитнидид худ и,
Я ки йиъи хабарбыр.

ХупI ухьданвалды хадишме,
БычIимыда ришбишис,
ВаI макан вишир адишме,
ЛыкьаIшис не гъыIрчешис.

Виргъид нур кийкьыр мадана,
Гьабыр уях йикиси,
Сыва кIатIар наIгьни хана,
Ес маджлисди йыкьаси.

Велед хьуйне нинды йикIе,
Дагьар-духул викисдиш,
Къайимыхда: «дагьрад тике»,
Рухьуд намерд йикисдиш!