19 октябрес Мыха1 культурадид Центра вишир ай эккед маджлис, гьили халкьдис гьагва гьыъыр ай ц1инды китаб мыха1бишды шаир-ашыкь Джамесеб Саларовад, гьили ц1инене гьанийды йырг ч1илылад шиъирбыр илсанашис гьагва гьыъыр ай джуды, нинды мыха1д ч1илыла.
Гьанийды китаб гъитхьуд йиъий йырг ч1илыла сифтене, хьурагинды вахтинды. Мыха1д ч1илыхда адишдыла письменность, ашыкь маджбыр йишир ай джуды шиъирбыр кихьис ва гьухьус чунгурахьван лезги ч1илыла, ва дур ки лихьир ай гьад китаба «Чунгурдин симер».
Ми бейденед вахтинди мыха1бишды дур-ун ад шаир ва композитор Шафи Амсарире (Ибрагимов), сыт1а гъыъыри Джамесеб Саларовад шиъирбыр. Гьание лешур услас гьанийды лезги ч1илыла ад китаб ва мадды гьанийды на1нибыр, гыъыри гьабыр ругъа ихьды мыха1д ч1илы.
Шафи-муалимере выъыри лап тарихди абгасды гвалах. Гьание рухьура а: зас ми китаб чапаа игъийис (напечатать) куьмег выри Дербентди ад Социально-педагогический институтад учредитель Имамедин Агабалаевара (гьа йиъи Гьахтид районди ад мыха1бишды Хинед мукъа1ды), гьадид верстка ва дизайн гьаъас – республикадид «Нур» газетед коллективере Байрам Абдуллаев кьуллы гъана.
Мыха1 ми «Чугурад синбыр» рухьуд шиъирмыд китаб халкьдис гьагва гьаъад гедене, далгыри мисед юлдашер.
— Къинады Саид (Сулейманов) — шаир, журналист, депутат. Гьание ми шиъирбыр сыт1а гьыъыд китабад сураа выъыри сахьусды гаф, ва гьухьури, яни гъийгъад йыгъ йикиси гьасаба гьаъас Джамесеб Саларов Мыха1 къиркьыд не, гьис хьурди ц1инене джуды нинды мыха1д ч1илылад китаб гьанийды къизилед гафбыр кине гьабгура а джуды мыха1д халкьдис.
— Шафи Амсари, шаир ва композитор, китаб перевод гьыъыд язычи. Гьание гыъыри ихтилатбыр, шууна джу ми китаб мыха1д ч1илы ругъа гъыъырди, гьал джус куьмег гьыъырди ва гьыъыри кьыле сасад шиъирбыр ми китабады (гьанийды статья ки е ливир а миди).
Гьади презентациедид маджлисе далгыра ай гене ки Мыха1ды агъсахъал Музафер Джелилов халкьдид культурадид геледжагъад сураа, дур-ун ад культурадид къуллухчи Мирзабег Азизханов, мехьтебырмыд телебиер, Джамесебды шиъирбыр кьыле гьаъара.
Гьадыла саваенди, миди маджлисе на1нимыд ва шиъирмыд майдан йишир ай:
— Шафи Амсарире гьыъыри чугурахьван ашыкь Джамесебды «Бахтывар» рухьуд на1ни;
— Мирзабег Азизханова, уу ашыкьад валгыд дун лыъыр, Джамесеб Саларовад сесахьван кыхы1р «Хьибыд быч1» хьур на1ни, выъыри ашыкьад на1ни гьаъад курус (гьа йиъи ми ашыкьад хыдыл ва балане ка гьанийик кикаре а). Миди зала ад илсанаше лап артухана гап сувгъури ми артиства1лид номерес;
— мехьтеб телебийше кьыле гьыъыри «Бахтывар», «Хынимешис» ва «Хьибыд быч1» хьур дур гъад шиъирбыр, гыр-гыр калды сесахьван, шадана ва уфтанна;
— Вели Шахбанова ашыкь Джамесеб Саларовад ришиймашихьван ва хыдылашихьван сыт1ана гьыъыри на1ни «Духтур рыш»;
— Зарема Майсаровара, Лучекды культурадид Цетрад директорара, гьыъыри лап уфтанне «Изды Ватан» рухьуд Джамесебды ч1ельмыхьванды на1ни, ва маддыбыр.
Ми мероприятиедид арыди генеки, ч1ел выр, гьалгыр ай Саид Сулейманов — гьание хабар выъыри Москвади ч1апана игъитхьуд Россиядид поэзиядид Антологиядид китабак тарихдид арыди ц1инене мыха1д ч1ел ва мыха1бишды шаирер кедир адид, профессор Светлана Махмудова кьулы гъана. (Гьадыклады хабар е мирджеж газетмы ваъаси).
Гьадыхьван ми презентациедид уфтанды маджлис бегьем вишири.
Къинады САИД
