Сиенебишис гьац1ара джала хьуъды атабабыед гьа1датмыхьван шууна даватбыр руъурайди, шумды йыгъа ярара, дустара гьа даватмыйк шууна иштрак гьаъарайди. Дават беслемиш выъыд йыгъала хъуъ ха1р джуду умуд кид илсындиде рухьурай, гьал шыв гвалах кьуле выгыргасди, ха1р ера саса са1х1иб сабгъурай. Гьис хьурди эвелди даватбыр руъурай йывды йыгъа на йывды выше. Дават беслемиш выъыд йыгъа сес ваъарай арады таликьдыбишихда меслягьа1тбыр гьаъасна — язна гьал гыргасди, джарга гьал гьаъасди, хунче шумуд йихисди, ва хъидкьыд мийманашды гьал ваъасди. Гьаса нече шудаъды къайгъубыр руъурай дават ваъасды иессияхда.
Эвела атабабыере рухьуд йиъий «Са хылида гап вич1ед диш». Гьа рухьуд ихтилат йиъи, сиене яр-дуст, выды тухумад, цихилед, таликьдыбыр ара ха1ч1ур ваъарай дават, ха1рние джва1ршида руъуд хыл-худ вырыхы1ре.
Нагагь рыш рывылц1ад мизан йишийне, ха1рние сукуед, халычедид, къеднед кюмег вылц1арай, гъу1диген виъи хьур. Кетхуда калды ришбишис, ад-ахъыдбыр дишийне, гарыват калды, уст1ул калдыбыр ки киерей.
Даватад сухьра рухьуд йиъинехъун, джалахьуъ гьамыъды калды илесдыбыр ад диший, гьа девирди гьаъад йиъий са дуьк1ид табак, эккед са синийе эгъеп1ир йыкьа1 фар выъыр ха1ред аъарай., ха1рние джуду хала дур ки хъултуха ивхьир дуруъурай. Джыбрана ка ц1ысбыр на якбыр гилхьирей, ха1р илсындис са гап хьыва у са тике якыдид ки лихьир пай гьаъарай сухьруды гъадбишис.
Гьамыъды гьаъад даватбыр гьагухьна, ад-ахъыние джухда тедерег а ва1лире юкьа1не, кьухьана, гич1идхьыд дават ваъара. Къудас, къузабас ки гьаса ху1рмет ваъара. Сусус йихид карбыр, къизилбыр, гымышбыр, шубамыла ва дубленкамыла лакыр йихире. Нагагь ти кьула адишнехъунди ки сусды суруула, гьабише хьыв хъиджилъир, у валыг лыхъджыъыр, кредитбыр лешур дават ваъара, рышес лейихды мебель, кар-куш кийис хьур, гьис хьурди, рухьура, валлагь, илсанаше гьа1йиб даъас рышед кьуля кикад шывга хадиший хьур. Дават бегьем вишида хъуъ шумдиъди сыдырмыхьван кредит хъывылц1ара гедылгара. Бес хизындире хьыв хъилъэсдишме, валыг лахъасдишме? Ад-ахъыние джуьхды адид хьесым гьаъара, адишды калды касиб-кусуб чалыш руъура, гьабишыла алчахды дават ваъасиме хьур.
Джалахьуъ сусу дывах ийед йиъий — ирды гендже не джагварды харыдид шал, гьис хьурди сусды хьесым гьалысга гьамаругуй хьур. Гьамыъ гьабыр мадиш, вешды гьагъзырад ухунбыр лебшура са йыгъа лывъасдыхъаъ, дидды, нинды джанды гъад лиъ эгъелъэре, гьис хьурди тинийы гъанивиъи — зас ки выгара хьур.
Гьамыъды сухьрымыд усул! Сашешун выды ерлид ералады шывга мадиш, сиене мадды ху1киметма вихид ер-емиш, улед-рагъад йиъи йывды кьимитдид. Ание ки лебшура а, адишды ки чалыш йиъи — гьанийды сухьрыдыла изды сухьра алчах, икал йикисиме хьур. Са атабабыед гьа1дат, нубат мадиш ва я секкиние гюзет хъаъардиш, касиб илсан шудаъ гудже ибхьурди — халкьад залмыд багьавалды, гьади ари кине музыкантар, официантар, павырар, камерабыр, сусмешды фотосессиябыр, таматыер ва мадды, мадды харджибыр…
Эвела мисаладыхьван рухьуд йиъий, «ха1р илсындире джуду мес виъид ка гъил сигаъ хьур». Кьа1сды, кьухьнийихда ху1рмет, ха1зат хъаваъара адиш, гъийгъад йыгъахьван ешемиш диъи, быгады йыгъад фикир хъаваъардиш. Са саныйила лаъ дикис чалыш диъи, хьесымахьде амхыр, сюмег, бизарвалды, ч1ийинвалды гинивиъи, адишва1лире, дишва1лире гудже абишды.
Гъийгъа гьагуд илсан быга гьахъабгур диш, дуьнйады гъад кьву1нды йыгъа ху1рмет ваъ са сынийис, хатирбыр гьаъ, шадвалдыбыр гьаъ, шиви еве гьеми дуьнйадыла йихире ад.
Ва1с йишид даватбыр нубараг!
Мира Казиева,
Насир ибрагимов
