Базарад йыгъа, 13 августас Дагъыстанад Правительствадид Седри Абдусамад Гамидов йыхьыр ай Дербентди, Генрих Гасановды кучиди ад хал гьа1зыр гьаъара а гьулкьара халма ад илсанашис высна. Ихьды ху1кийметед Президент Владимир Путинды маес игъийир ад Указахьван гьа къайгъубыр кьуле йыгыр йигад йиъи 1 сентября йикьама 2017 сыда.
Гьа халыхда гакъад гедене, премьер-министре эккед сагъвалдыбыр гьыъыр ООО «Строй универсал» устарашис бала уфтана гволах кьуле выгыр хьур.
Ц1инды хал вахтинды илсанашис вылц1ара ад йиъи, гьис хьурди сахьусды сентября йикьама илсанашис ва хынимешис раха1т йишин бадана. Гьадыла 25 августас гьабишда йикис ц1инды халма джу1хьду кар-куш ки йихир сыкьы1с. Халбыр ки гьаса гъеблир, уфтанна гьыъыр а, сигъын хакьасды гъу1любыр лихьир а, ремонтбыр гьыъыр а аъ сурула»,-гьухьур Гамидова.
Халбыр кьуле гыргад программабыр шумдиъиди шегьерма кьабыл гьыъыр ай: Махачкалди, Дагестанские Огниди, Дербентди, Южно-Сухокумскади ва Тарумовский районди.
Кьву1нды сыдыд арыма 2016-2017 сыдырма РД-над 5 муниципальный образованиемыд еримы высды йиъи 68 гьулкьара ад халмыхъаъ ц1индыбыр, гьамма ешемиш диъи 3140 илсан (987 хизан). Гьа программадид раие виъий илсанашис тангыдид кюмег вын ва гьулкьара ад халма ад илсанашис ц1инды халбыр вын.
Гьа йыгъа мадана Дербентдид администрациедид зданиеди вишир ай ха1силвалды республикади премьер-министрад инициативный группадыхьван, гьади хьуъ гет1ир ай суалбыр илсанар гьилды халма гьили сидигасды ва садгъусды.

Мира Казиева