17 июлас Дагъыстанад Кьухьды Рамазан Абдулатипова иштрак гьыъыр РД-над внутренний гвалахмыд Министерствадид коллегиядид иджласа. Агьмиш гьыъыр ай сахьусды полугодиеди выгыд гвалахад суалбыр ва кьва1дхьусды полугодияди 2017 сыда гьаъасды гвалахбыр.
РД-над внутренний гвалахмыд министр Абдурашид Магомедова гьади гьухьур, баласды регионад агьвалатас джетинвалдыбыр гьаъара ху1киметала гъаъна хъуд террористический организациемыра: «МВД-дире выгыргара ад гвалахара республикади ад агьвалат контроля хывкьыр а, баласды направленияма министерствадид гвалахмы дюзгинды сдвигбыр ки а. Гьабхы1д вахтинди бандподпольядис выр а эккед зиянбыр. Гьад гьунар йиъи сыт1а выгыргад ихьды Дагъыстанад УФСБ-дихьван, Россгвардиедыхьван ва мадды правоохранительный структурамыхьван гвалахад…
32-ды МВД-дид къуллучиес йыхды гвалахад бадана выр а сур сыдыд арыди эккед правительствадид ва ведомствадид наградабыр»,- гьухьур Абдурашид Магомедова.
Сахьусды хыл йиъи 20 сыдыд арыди мистед сыда секки йыхы1р йикьид къуллухчи адиш. «Гьад йыхды агьвалат виъи,- гьухьур гьание, — амма 5 сотрудник яраллы дишир ай. Криминальный агьвалат республикади джетиндине маба, гьадыла е т1екьикьеды ки секин дишир йыгардиш»,- гьухьур гьание.
Гьа коллегиядид иджласа Дагъыстанад Кьухьды Рамазан Абдулатипова вирзир, йыхана хывкьыр силовой блокад гвалах.
«Правоохранительный структурамыд йигит къуллухчийшды гвалахад гьунурдихьван республикадид агьвалат эслях хъившир а…
Ихьды республика хасаб ваъас йикис сахьусды эсляхды субъект на Российский Федерациеди. Ес гьагвара а, йыха руъура ад порядок ва ц1ам руъура а нагьакьды гвалахбыр джама1хтид арыди. Илсанашис джалахьуъ ка гич1валды мабдиш…
Майес 2017 сыда уфтанна кьуле выгыр республикади Гъаалибва1лид байрам, са нагьакьвалдыбыр джишир…
Амма шыв гьаъасды джац1ыйне, хъиджишийне, гьамыъ кал кьаъды гъалма-гъалмыс, илсанашды арыди руъуд, сасадбыр чалыш диъи выс национальный ранг.
Правоохранительный органмыра йыхы1р йыгара гьамыс убур, са гьасад гьакьасабас ра1хъ джывыр.
Лазим йиъидкал выгыргара адиш гвалах муниципалитетмыхьван, гьади ад органмыс бегеде диъи илсанар, йыхана гьац1ара гьабишды къавгъу-дердибыр…», — гьухьур Рамазан Абдулатипова.
Терроризмады гъами дишин е республикади йиъи правоохранитльный структурамыд гвалахад муниципалитетмыд органмыхьван, халкьдихьван сыт1а выгыргара ад.
Джуду суруула Абдулрашид Магомедова сагъул выъыр Рамазан Абдулатиповас вылц1ара ад кюмгид бадана правоохранительный блокас.
«Зас гьац1ара, ва1 ва1дя руъуд сиене гьаъас, Дагъыстан вишин бадана сахьусды эсляхды регион Российский Федерациеди»,- гьухьур Рамазан Абдулатипова.
А. Махмудова,
студентка-практикантка ДГУ.
