Авал-авал ай адиший Силийман пайгъампар. Гьанийис вац1ад йиъий хьва сиъине ха1йванмашды ч1ел. Са наха1н Силийман пайгъампарас гьа1ян гьаъара: Магърукьди рыш рухур а, Мишракьди дух гьухур а.
Силийман пайгъампара сырат1ал гъы1хда сыт1а гьаъара сиене ха1йванмар, гьади ваъара иджлас. Магърукьди рухуд рышед не Мишракьди гьухуд духарды арыди гьаъ нека1х, рухьура гьеми пайгъампара ха1йванмашде.
Ха1йванмар ерибыр рази йишири, ерибыр нерази йишири.
Симиргъуе ха1джет гьыъыр, нека1х йикисдиш хьур.
Силийман пайгъампара гьухьури: «Ц1ухьудды сыдыла ева1 маа гьемиди гъы1хда ягъмиш хъидикис».
Бала гьухьус диш, ц1ам гьухьус диш, гьаадхы1ри ц1кьва1д ц1ихьибыд сен.
Симиргъуе гьеми ихтилат йик1иы хакьыр, ха1ля хьуъ ливчир вуруъура рыш ад суруу.
Ха1р багьанадыхьван, Симиргъуе гьеми рыш дагул раъара, хылимы ларгъур, хъувгъу1ре джуду э1кволе. Э1кволь ки ай эли дарымы лидкьыр ад хукумыд арыди. Рыш гьемидире баше-дуламиш раъара джухьван.
Йоква1с выхьыр улесды як, ми-ти хахъына наха1н хъувгъу1рей. Са сыда гьеми рыш гьемиди э1кволе баше рыъыр.
Хабар гьила выс, хабар гада гьухуд Мишракьдид суруула.
Гьемиди хьиды ливирхьвара суруш, сурушере гьеми гада гыргара рыш ад дериди.
Са йыгъа рыш эла саъ гаркъыд, аа джилы гинийиъи илсындид къаралт. Рышере эла саъ хаабгъура са га1ри, эли ки илсан ад гьац1ын бадана. Гада лаъ гакъыд, эли са рыш а. Гада ки сукур лаъ ка йыхьыри, рыш ки эла саъ ка йиркьыри. Мибыр са сыныйихьван далгыри. Рышере гьухьури: «Миди дид хъикьаси, гьанийис илсанугълыед ил йишихьвна, гьание вы илес. Вы дагул йиш, сабыйды девиед джандака джац1ын бадана». Гьемисе рухьура, генеки са сен литхьури. Ми рышере дид хъибкьыйне, рухьура, аа гид девиед джандак халды йыкьа1хда хагъв. Рышере гада ки лаъ гыргыр, хьала гид джандака гирк1а рухьура. Дидыла дагулана гьеми рышере гадаки гьади уху1ре.
Ц1ухьудхьусды сыда Симиргъуе рухьура: «Миди хала илсанугълыед ил а». Гьа арыди гьеми рыш не гада ки са сыныйихьван гюрюшмиш дишири.
Симиргъуе рухьура рышеде: «Зы на вы сырат1алдид гъы1хда лехъечир хъу1дгъу1сды, хьулан кьадар вахт маба».
Йыгъ йыгъна ха1саб гьаъара гьемидире.
Рышере рухьура: «Ва хылимы девиед джандак ки лихьа1ъ, зы ки гьади ари суркьуси, джишийне зас хылимы уу гич1ере».
Рышере джандакад хьуъна лирхьере джуду мес, гъу1д, хъуъна гирк1а гьаъара гьеми гада. Хылимы ла1хъа1ч1ур гьемибыр лехъдерчере.
Сырат1алды гъы1хда Силийман пайгъампара сиене ха1йванмар сыт1а хъыъыр, эвели кал сыхъы1кьы1р а, Симиргъуй гюзет ваъара. Гьа арыди ливчир лихъвиркьара Симиргъуй.
Аа сувкьур, гьемидире рышед хыл хакьыр девиед джандака гъаъ рыгыргара, гьеми рышехьван гада ки хыл хакьыр ара гъаъ йиркьыр. Рыш ки, гадкъыд, гъилы юкьа1 риъи. Гьа гедене Симиргъуе ваъара эккед лал. Ери ха1йванмар йикьире гьемидид лалад ун йишийне, ерибыр алгара. Джуду ха1джет кьуле джидкьыйне, Симиргъуй ливчир гьапхы1ри кьилды банахда на кьахды сывахда.
Ве гьади мадай, е миди хъидкьыр. Зада гьадады хахъый къизилед афтуфа, гьа ки ара ры1къе Ха1джирасула ху1хъу1вшур.
Бийжет-ришид мизыла ми махвбыр кихьид
Исрафилова Зарема
ва Казиева Мира
