Хьадид вахтинди культурадид сурады гвалахбыр мысга ки ц1ине хъаъара, гуджли хъу1гъу1ре.
Апрель-май вазырмыд арыди гьабыр гуджли гьаъара. Гьадис гюьре творческий коллективмыд джурба-джурад смотрбыр, конкурсбыр, фестивальбыр арыди гыргара, гьис хьурди ми вахтинди гьаъад, сиене хъуъ гелъэд гьакьасабырмыд натиджа виъи 9 Майес Гъалиб дишид Йыгъ. Гьа1р са мероприятиеди усул виъи йигитва1лид, ватан хъывгынид, ватан къурамиш выъынид, халкьдид йигитва1лид нур ва усул. Гьабыр ки, пайдах кал хьура хакьыр, аала лаъ хъуд хынимешис ва джегьилешис гени ки ашкара гьаъара ждухьды йик1е ана у1ху1н бадана.
Мыха1д райондид кьухьнийды распоряжениедихьван районди гьаъара а гьа1зырвалдыбыр Дагъыстан Республикадид Миннацара кьуле гыргад «Шув гьа1л йиъи, къумши?» (Как живешь, сосед?) рухьуд проектед рамк1ама ана, МР «Рутульский район»-ди ки гьасад мероприятие гьаъас хьур.
Ихьды районди ад гьа гвалах кьуле выгыргад къуллухчиер дыхьыр а Мишлеш ва Лучек му1къма, гьади телевидениедид работникеше джурад миллетмыклады дид-нин ад хизанмыд съемкабыр гьыъыр а, гьабишды гьу1рмитдид ва му1гьу1батдид быт1равалды джамагьа1тдис усул викисне, халкьмыд арыди ад гьу1рметдис гьувга ваъас чалыш диъи. Гьадыла саваенди, театральный искусстводид фестиваль-конкурс кьуле выгыргара а ми йыгъырма. Гьади иштрак гьаъара а Дом культурамыд ва мехьтебырмыд художественно-драматический кружокмыд телебиеше.
28 апрелес Мыха1 гыргас хьур а ми элаа гьухьуд мероприятие ва гьади иштрак гьаъас дыкьасды диъи Махачкалыда министерствамыд кьухьдыбыр, СМИ-ыд работникер, дур-ун ад общественный деятелер ки хъуна.
Гьа йыгъа Мыха1 викис хьур а эккед байрам — гьади йыкьасды и сиене му1кьмады халкьмыд майданбыр, йикисди и выставкабыр, гьагва гьаъасди и халкьмыд улед-рагъадбыр, гьадатмыд усулбыр.
Мийманашды ры1къа1 дыхьыр ихьды райондид саргьа1та, суннымыхьван-накьрымыхьван гьабыр кьабыл даъасды и. Хьели Мыха1д мукъа1 гъараа аъ кудубч1уд джыгыди гене ки кьабыл даъаси байрамак диъид му1къмады мийманар.
«Шыв гьа1л и, къумши?» хьур фестиваль кувч1уда хъуъ, мийманар ва кьухьдыбыр, быч1быр хад хынимер ки хъуна, дуруъусды и Киче му1къа1 гьади ад Да1види дыркьыдбишды хатирес сихьид монументеде, т1екьийкьедид гийтхьинвалды ваъас хьур ва быч1быр лихис хьур.
Районди ад сиене идарамыра гьаъара а мисед чалышвалдыбыр джама1гьа1тдид арыди шадвалды, гьу1рмет ва му1гьу1бет вишин бадана гене ки бала, йе-ве ки дикис, дыкьа, чалыш гьа гвалахбыр, генеки уфтанна йишин бадана.
Къинады Саид
