Гьеми йыгъырма Дагъыстанад Кьухьды Рамазан Абдулатипова иштрак гьыъыр ай «Дагестан против террора» хьур республиканский митинге, Махачкалди ад джама1хтихьван сыт1ана сиене шегьерма гыргара ай гьадис лейихды митингбыр Санкт-Петербургди выъыд взрывас гюре.
Гьемисед киджикад зарар-зиян джывын бадана, гьадид хьура сур хакьынис гюре сыт1а дишир ай 17,000 агьалиер. Гьа мерекат ачых выъыри Российский Федерациедид Дагъыстанди адухъунды театрмыд Союзад седри, артист Айгум Айгумова.
Джуду суруула гьание гьухьури: «Сыт1а хана — гьа ихьды кьуве виьи. Джама1хтид савалды вишир, ари ха1ч1ур джуьхьды кьуве гьувга выъыри дагъыстанадбише 1999 сыда. Сиене урусашды эскереше ки, Российский къушумаше ки ари ха1ч1ур дагъыстандыбише йихъидгыри ихьды накьудыла душманар. Россиядис ки Дагъыстандис ки гьабише выгыргара ад чапхынчива1лид не эдемисызва1лид ихтилатбыр кьабыл руъурдиш».
Дыркьыбишды ру1хмыс гюре гьабыр лаъ люздюр са т1екийкьеды гийдхьир.
Гьадыла хъуъ дыркьыбишды ру1хмыс бахч йишин бадана далгыри джама1хтид не динмыд организациемыд представителер.
Всероссийский общественный «Матери России» хьур движениедид регионад отделениедид седри Таиса Магомедовара джигьилешды дурухда гьухьури: «Ве шыв гьыъырди ки, шыв леч1ур ди ки, ве гьили дыхьырди ки, шыв гволахбыр гьыъырди ки, вы лиркьыд джыга суга джыъыр, эдемива1лихьван аъ-гъаъ дыкьа, са халды хизан ка ватан йик1иыла упха джывыъыр. Еве диъи са эккед хизан».
Гьанийила хъуъ ч1ел выри дибирешды кьухьнийды заместитель Идрис Абдулаевас. Гьание джуду ихтилатмыхьван мисе гьухьури: «Дуьню-дуьнйады йы1х-йикьинбыр бала йишир а, миди зиян-зарарбыр вылц1ара джама1хтид эбиред юхбыр гейис чалыш диъи — гьа эккед гунагь виъи. Аллагь-таллара, Мухаммад пайгъампарара (с.а.в.) гьухьури, джама1хтис гудж-басбыр маъ, йы1х-йикьинбыр герек диш, диндире ягъа1д ка аъ-гъаъ дыкьас чалыш диш шуба1-ришиймар ка».
Гьанийыла хъуъ ч1ел выри Махачкалдид не Грозныед хачбаразашды церковад кьухьды Иоанныс. Гьание ч1елбыр гъыъыр дыркьыбишды дуруу, гьабишис ра1хмет выъыр Махачкалдид ва Грозныед Епископ Варлаамды сурула. Митинге иштрак гьыъыдбишды дуруу сигыр ад обращениедик кихьир ай, алчахва1лид ва вакьиемыра выр ад зиянбыр на гудж-басбыр террористеше гич1 гивес йигара абыр и. » Ес, гуджлид Россиядид халкьдис гич1 ливес йикисдиш. Ихьды джама1хтид савалды вишихьна, яа гьалдына кар гъадиш, гьис хьурди ихьды темизды йик1ид наятмыхьван, джама1хтид сава1лихьван е аъ-гъаъ диъидбыр диъи».
Гьадыла хъуъ лалгыри Дагъыстандид писателешды Союзад Седриед заместитель, Халкьдид шаир Марина Ахмедова.
Гьание гьухьури: «Терроризмадире ихьды джандымыс ки фикирмыс ки гудж-бас ваъас йыгара а. Питерди метроди йишид гволахбыр гьагуйне, Дагъыстандид джама1хтис эккене джигара йишири, гьис хьурди дагъыстанабыр гьади бала анидиъи. Гьади сихьир а памятник Расул Гамзатовас, гьади йихире быч1быр лирхьире а джама1хтире. Зас йигара миди кьыле гьаъас дур ад шаир Расул Гамзатовды стихотворение «Уду1х хынимер» хьур («Берегите детей»), гьис хьурди гьа метроди анидиъий балад джигьилер , вы1хьды таймар, ва гьабишихьван сыт1а дыркьыр ай дюхуьс мадад хынимер ки. Уву1х дуьнйа! Увуьх Дагъыстан! Удуьх хынимер!»
Хьеликана гьалгыри джавыдашды общинадид седри Валерий Дибияев. Джуду суруула гьание гьухьури: «Йиггад миллет, выш йиширди ки, ми террористеше гьаъад киджикад вакьиебыр секкинийис кьабыл диш. Гьадис гюре сиенебыр ари ха1ч1ур ху1киметмыд кьухьдыбишды ч1ел са вишир йигара, эдемива1лихьван ешемиш дишир йигара.
Россиядид ва Азиедид Олимпийский чемпион заслуженный мастер спорта Магомед Ибрагимова мисе гьухьури»: «Еде мысга рухуьуд йиъий, чемпионар джидшийне ки, сахьусды кьуль е эдемиер не адгыр йыгара. Дагъыстана гудж-басбыр бала йидкьыри, амма гьамыъ правоохранительный органмыд кюмгюхьван нагьакьвалдыбыр мадиш.
Митинге генеки иштрак гьыъыри РД-над Халкьдид Иджласад Седри Хизри Шихсаидова, РД-над Кьухьнийды ва Правительствадид Администрациедид Кьухьды Исмаил Эфендиева ва мадды кьухьдыбише.
Гьасад митингбыр гыргас ният аниъи мадды шегьерма ва районма ки.
Мира Казиева
