Эвела са валаетди анидиъий бала дин иман ад, абыр ха1я ад хизан, юкьур дух на дид, нин. Хынимер джуле диъий гьемибышды дид ра1хметдис гьархы1йне. Эккене четин йишир гьеми хьыдынийис, хизан увуху1с, хынимер удуху1с, ху1киметед гволаха ки гъана агъырана экке даъара ай джуду хынимер. Са йиъид ка диш, кьва1р диъид ка диш, г1а1лис диъи юкьур выг1ылды хыных, амма гьабишис ваъад за1хмет, ваъад ху1рмет, лаъад кикарана валыг, ухьне тухды хьыв, илсындик лейихене аъ-гъаъ дыгыргас бала четин диъи. Шудаъ гволахала гьеми хьыдылды ыхьа1 хъиркьырди ки, хынимешис мес-гъу1д гивир, гъил-хыл сидгъыр темизва1лихьван ара са гадгъур сатха даъарай. Быгады йыгъа лаъ лурзур, гволаха руръусма, улесды-рагъасды, лаъасды, гъилыды-худады гьа1зыр гьыъыр хьели хала гъаъ а1гъра1ргъ1урей. Гьа юкьур хыных бадана джу джуду джан на ил лешур, га1ше мыкьа джыъыр удуху1ре ай. Гьаса, гьаса ха1р багьанадыхьван экке дыъыр, кьыле ваъас кидхьуйне, нинды йик1 шад руъурай. Шууна йиширди ки, гьеми нине гьеми хынимешис дават выъыр эвлемиш-гуямиш дыъыр, халды хизындид иессиер дыъыр.
Гьа са сен, гьа кьва1д сен, гьеми хьыдылды кьа1се ришир са рыдж арыргара. Джигьилва1ля гьыъыд гволахбыр, диъид джахьвабыр гьеми хьыдыныйды джандымыкла кехъелъэре. Паралич ришир месе ирурхьвара.
Йыгъырмыкла са йыгъа сыт1а дишир юкьур дух меслягьа1т гьаъара, нин гьалыхьван сартасди, гьал эйлуг раъасди.
Эхир меслягьа1т йишир к1аъды духарыхьван сартасна.
Йыгъ йыгъала гьемибишды нин саъдире саъ гирипхьура, хъалалгас ки хъу1рирдиш.
Сюсмеше елли ул вырыхы1рдиш, миние бела ришир а рухьура, тимбыйние мыс рикьис рухьура. Нин гирхьир хыных ка хьесыма гаркъара ч1ел хъаваъас, джываб хъывыс джишир хьа1п-хьа1пхьире решере герыргарай. Йыхды выъынийды хьесыма гарыркъарай, писды выъынийды джубра гарыркъарай. Гьа1джиз ришир, уджуз ришир, джуда рыдж хьур хад хьыдылды риъий, алчах, икал ришир куше саргъур ай.
Хумухун ыхьа1д калды вахтинди, йыгъырмыкла са йыгъа, гьеми к1аъдыбыйды духарыхда на сусыхда сес ваъара гьалдиъди давата. Мибишды хала ивирхьура да1ви, нин гьили раъасды джарац1ыр, джва1р гъаъ дыхьыйне гадкъасды вышга адиш. Эхир к1аъды духара званук гьаъара к1ухьдыбыйды шухда, валлагь рухьура, нин вахьван сартас хьур. Амма кьухьды духара рухьура, зас маджал адиш гьанийихьван сукьусды, захда гьанийихъаъ лаъ хъуд къайгъубыр а. Гьемибишды телифуна хьуъ эккед къалма-къал вуруъура. Эхир ки к1аъды духара нин аргъур машине рыгыргара кьухьды шуд ригихда. Рак етере, етере, ара шура ачых гьаъардиш, эхир ки гьемиди ригиде сартыр хъугъу1ре. Нине, ригиде суркьуд джигиди, хар-хар ка нагъв ки сывъара, джу гьыъыбыр хынимешис, джу йидкьыбыр, джу лет1ибыр йик1иы хыгара. Яраб гьемисе удуху1рийме за хынимер. Йикьыд-йикьыние ч1ел сивтере, са ч1уб гъад хыдылаше ки кине хатирбыр адга гьаъара ханириъий. Суьсмешис улис гьаргур йигар диший, валлагь, рухьурай вы1хьды нин риъи ва1 уру1х, е вырды рышбе диъи, е заамин диш.
Ха1рне, гьеми нин ригихда йоква1йикьама герыргара. Йоква1с кьухьды духара лаъ лузур гъаъ ха1ятди руъус хьур рак ачых гьыъыйне, ригихда рикьир ад нин ахърыргара. Гьада сыт1а дыъыр тимбыйды шуба1 ки гьайвыр кирхьир бегьем раъара.
Са нин юкьды шудаа урухуьс йиширдиш. Гьадыла рухьура, нин, дид ахъдылгаддиш, ва я гьабишис шыв хатир хъыъырди ки ихъийкьасдиш, гьадыла веда руъудийкама джан-гьа1зиз ваъ, ве выъыд ху1рмет вы1хьды хынимеше вес ки хъаваъас.
Мира Казиева
