Дагъыстанад Кьухьние оперативный иджлас выгыр

2

3 апрелес Дагъыстанад Кьухьды Рамазан Абдулатипова выгыд иджласа агъмиш гьыъыр гьабхы1д ха1фтидис йишид акьасабырмыд суалбыр.
Махачкалди Ирчи Казака кучиди гид базара вишид пожар республикадид Кьухьние ха1саб выъыр эккед трагедиене ка, гьадид бадана жываб выр йыгара нагьакьды илсанаше. «Ха1р базарахда анидиъи управляющий компаниебыр ва директорар, джываб вылц1ад гьади гвалах кьуле выгынихьван сыт1а савдымыд ермы ки макъыет дишир йыгад. Е шума иди гьама ад акьасабыр ягъа1дкал гьакьдире дюз-дюзгин хъаъас чалыш дишир, амма рази диширдиш гьади савда ваъад инсанар ки ва администрацие ки базарад. Йиъи, трагедия вишир а, ва йишид зиянмыс гюре кюмег хъывыр йыгара, сахьусды кьул, илсанаше, ешемишды гьади ад алверчийшыла ва джываб выр йыгад гьабишды имуществадид.
Контейнербыр гьутхьуд илсанар — диъи хьурагинды рабочиер, интеллегенция, му1къмады за1хметкешер, перестройкадид вахтинди чарасызна коммерсантар дишид. Гьабишды гвалахбыр ачыхана кьуле джыгыр базармыд иессийше гьыъыр ай джва1ршис йыгад режим. Республикадид бюджете гьа базарма руъура ай ц1амды-ц1ырык1ды тангабыр, аммани шууна йиширди ки, ху1киметере джуду функциебыр кьуле йыгыр йыгара. Гьадыла ми йыгъырма ваъас специальный комиссия РД-над Совет безопасносте, вац1ара ваъасды эккед базармыд гвалахад агьвалат», — гьухьур Рамазан Абдулатипова.
РД-над савдымыд ва промышленностед министр Юсуп Умавова джуду суруула ихтилат гьыъыр, йыгыд базармыд администрациемыхьван сыт1а иджласмыкла гьа суалмыд бадана, аммани гьади эгъет1ид предписаниемыс сасад геде убур йыхы1р адиший хьур.
Махачкалдид Кьухьды Муса Мусаевды хабардихьван, бегедене вылц1ара ква1ч1ус кюмег, гудже идхьуд, эккед зиянбыр йишид ц1ай китхьур илсанашис.
Гьадыла саваенди агъмиш выр ай агьвалат эккед машинмыд иессийшды неразивалдымыд, бала лаъ гьыъыр а хьур тарифбыр «Платон» системадид. Регионад Кьухьние гьухьур, гьади ки джуды джетинвалдыбыр а, йисхьурди «дальнобойщикер» — диъи диъид кар к1аъды бизнесед представителер, гьабишды гвалах бала лазимды виъи Дагъыстанас.
«Е чалыш дуруъура кюмег выс гьа экономикадид секторас ва мысга кьуле гыргас гьакьды-кьулды водителешды требованиебыр, амма фитнекарашды джубра дыхьыр йигардиш гьабишихда хъадацур, чалышды Дагъыстана да1ви-къал ивис хьур. Гьасад нагьакьды гвалахмыра вылц1ара зиян республикадис ки ва джва1ршис «дальнобойщикешис» ки. Эгер илсанаше налогбыр вылц1ара йишийне, яца ивере йишийне джухьды гвалах ва гвалах ваъара йишийне гьакьды-кьулна, е выр йыгара гьабишис ха1р йыгъа кюмег. Зы гьадид бадана ха1сил йишир ай ГИБДД Россиядид кьухьдыбишихьван, хайиш гьаъас хьур дагъыстанабишды «дальнобойщикеше» раха1тене джуьхьды грузбыр мидиъ-тиниъ йихин бадана. Генеки рухьура: е гюзет гьаъас сиене гьакьдид требованиебыр, ихьды гвалахара ягъа1д ва кюмег ки выси водителешис сиене суалмыд бадана»,- гьухьур Рамазан Абдулатипова.
РД-над Правительствадид вице-премьер Шамиль Исаева ихтилат гьыъыр, шыв гвалах выгыргара ади гьа суалад бадана. Выдж ха1сил йишир ай хьур эккед машинмыд иессийшихьван, агъмиш гьыъыр ай кьиметмыд суалбыр ки ва маддыбыр ки…
Гьа иджласа гьа йыгъа лаъ гет1ир ай балугъ хывкьынид отраслидид суалбыр ки.