18 мартас йишир а хибыд сен Крым Российская Федерациядик ара кухъувч1удаа хъуъ.
Крымский полуостров ва гьади ад дур-ун ад къала-шегьер Севастополь тарихди к1ыблаа хъуъ Россиядид эскерашды эбырдихьван джекьуля хъуъ у1ху1д ч1ир-ч1икбыр йиъи.
Тарихды ес сиенебишис гьац1ара, шууна англиедид, франциедид, турциедид эскереше балад вахтинди чалыш диъийди Крымский полуостров джуды хылихьде лювшус хьур.
Гьа йер к1ыблаа хъуъ сиенибишис выгара ай — гьади ад эскереше Черный дерйагьад ва Средиземный дерйагьад хьидыы ад сиени движение контролировать гьаъара. Гьамыъды вахтинди, гьухьухьна, гьади ад эскерешды связед локатармыра са ери духъунды дуьнйадид джыгабыр контроля хабкьыра а.
Мадды гьу1киметмыс гьаса йиъина йыгардиш. Гьадыла Россиядихьван Украина ч1ир ваъара, Турция ва мадды мисед гьу1киметбыр ара лахас чалыш диъи.
2014-ды сыда, Украинади ад националистер хьура хат1кьыр, НАТО-дис Крым джуды хыле лювшус йыгара ай джуды эскерешды база гьади сивхьис хьур. Россиядис гьа гвалах гьеч кьабыл диший, гьис хьурди ихьды гьу1киметед агьтиетдис лап балад четинвалдыбыр гьаса йишийне йикисий.
Гьади, Крымский полуострова, сыдырмыхьван ешемиш диъий балад хизанбыр урус ва мадды халкьмыд, эскерер диъид. Националистеше лап балад фашистешды зулум ваъас йыгара ай миди, да1ви ивир гьади ад халкьмыд арыма.
Гьадыла РФ-дид кьухьдыбише, Президент Владимир Владимирович Путинед ихтиярдихьван, Крымдид джама1хтид арыди референдум гыргас кюмег гьыъыри. Гьади баласды илсанаше гьухьури — джва1ршис йыгара Россиядихьван сыт1а дикис.
Гьадис гуьре, РФ-дид Президентере эгъеп1ири кьарар ми халкьдид мнение Россиядид Федеральный Собраниедире кьуле гыргаъ хьур, Россиядид депутаташе ки, сиенибыр сыт1а дишир, РФ-дид Президентед Кьарас т1аликьды «Ий» гьухьури!
18 мартас 2014 сыда Крым ва Севастополь кьабыл хъыъыри, эвельды тарихды йиъидкал, РФ-дид арыди ц1инды кьва1д субъект кал гьа1саба гьыъыр.
Баласты Запада ад гьу1киметмыс гьа гвалах кьабыл вишир диш, санкциебыр ва правокациебыр гьаъара, Луганскади ва Донецкади да1ви ивир.
Аммани ихьды гьу1киметере гъийгъа шывга ки гьаъара а ихьды халкьмыд, ихьды сиенебишды а1гьтиетвалды гене ки гуджли ваъара, гьис хьурди е-ва1 быш дишийне, гьади гене ки гьабыр дикиси чалыш маа ки ес гудж ваъас.
Гуджлид Россия секкинийис некьихьде ки гьувгур выгад диш, ихьды эскерешды гудж, ихьды халкьмыд савалды, Крым ва Севастополь ки кине, виъи ихьды а1гьтиетвалды ва ихьды сагъвалды.
Гьадыла е-ва1 гене ки гьухьур йыгара «Ааферин» йе удуху1д эскерешис ва ихьды ватан Россиядид кьухьдыбишис. Ехда ад тарихди гьа са ра1хъ виъи – гьа ра1хъ ки, хывкьыр, увуху1ре а!
Къинады Саид
