21 февралас Мыха1, культурадид зала вишир ай эккед сываб — мыха1бишды нинды ч1илды иджлас.
7 ноябрес 1999 сыда Юнескадире гьа йыгъ дестикь гьыъыр ай Дуьнйадид нинды ч1илды Йыгъ кал. Гьадис гюре Мыха1д райондид администрациедире выгыргара ад виъий гьа иджлас.
Гьади иштрак гьыъыр ай райондид Кьухьды И. Г. Ибрагимова, меркездады мийманаше: РД-над Общественный палатадид член, «Рутулы» хьур общественный фондад кьухьды В. Г. Казибекова, ДГПУ-ди гвалах ваъад доктор филологических наук, доцент М. О. Ибрагимовара, РИА «Дагестанад» корреспондент М. И. Вердиева, Мыха1д райондид идарамыд кьухьдыбише ва къуллухчийше, райондид шаиреше, мехьтебырмыд Мыха1д нинды ч1ел ха1р ваъад магьа1лимеше ва телебийше.
Иджлас кьуле выгыргара ад райондид администрациедид къуллухчи Салманова Индирара сахьусды ч1ел выр ай Мыха1д райондид Кьухьды Ибрагимов Ибрагим Гусейновичде. Гьание къутли выъыр иджласад иштракчийшис нинды ч1илды сываб, сагъул-варулбыр гьыъыр республикадид меркезда йидкьыр ад мийманашис, сиене ягъмишдишибишис, гьухьур, бала лазимды гвалах виъи гъийгъа выгыргара ад иджлас. Нинды ч1ел — илсындид кьультура виъи, гьадис убур йыхы1р йыгара мехьтебырма ки, хизынды ки ихьды ала лаъ диъибише гьа йик1иыла убха джывыъын бадана.
Генеки къутли выъыр нинды ч1илды сываб сиенебишис Вагаб Казибекова, ч1ел выйне, кьыле выъыр сивыгыр ад РД-над Общественный палатадире иджласад дуруу ва Мыха1д райондид Кьухьнийды дуруу Обращение.
Гьухьур, ми кьва1бхьусды эккед мероприятие виъи выгыргара ад нинды мыха1бишды ч1ел лаъ вишин бадана — сахьусды мисед иджлас выгыр ай Дагъыстанад педагогический университете. Хабар выъыр генеки ягъмишдишибишис — меркезди выъыр ай «Рутулы» хьур халкьдид фонд. Иншаллах, аниъи ниятбыр гьадис гюре кюмег выс хьур мыха1бишды шаирешис джу1хьды китабыр игъийис, ва мадды гвалахмыс, гыргара ад нинды ч1ел лаъ вишин бадана…
Хьели ч1ел выр ай Мариза Ибрагимовас. Гьание ихтилат гьыъыр, шыв гвалахбыр йыгыр ади мыха1бишды гьа1лимеше нинды ч1ел лаъ-хьуъ вишин бадана. Кьыле гьыъыр гьадис гюре гьыъыр адыхъунды диссертациебыр. Ачых ваъара а хьур магьа1лимешды университете мыха1бишды факультет. Уфтанна лалгыр мыха1д ч1илыла ягъмиш дишибишды улихьде.
Мыха1д музеед кьухьды Багаудин Гасанова ихтилат гьыъыр, шудаъ варлыд виъиди мыха1бишды ч1ел, гьа мааки лаъ-хьуъ вишин бадана ,халкь са вишир йыгара, сасыние са хат1кьыр йыгара хьур, сахьусды кьул гъаъ суруу гъад мыха1быр, джишийне гьабишикла йыргашды арыди йыргар дуруъура а, азербайджанабишды арыди — азербайджанабыр, йик1иыла убхур нинды ч1ел. Шад йиъи хьур выдж, мисед гвалахмыхьван мыха1бишды ч1ел лаъ-хьуъ хъывгасды наятбыр а хьур, ихьды уфтанды эвелды гьадатмыс убур хъырыхы1ре а хьур.
Генеки гьади далгыр Вердиев Махач — РИА «Дагестан» корреспондент, Б.Б. Магомедов — «Мыха1бишды ц1инды хабарбыр» газетед редактор, С. Г. Сулейманов — журналист.
Йыхана далгыр Мыха1д шаирер Шафи Ибрагимов ва Бийзат Султанаева.
Шафи-шура ихтилат гьыъыр, шудаъ зурбадбыр диъиди ихьды гьаадхы1д хьурагинды шаирер: Кюр-Раджаб, Нурахмед, Джамесеб, Гьаджи-Юсуф, Сакит ва маддыбыр.
Гъийгъа-быга гъаъ йык1ас хьур а Джамесебды китаб «Чугурад синбыр», ихтилат гьыъыр гьаъара ад урус ч1илы ругъа джуды шиъирмыкла Фазил Дашлае не Мамед Халилова, гьухьур генеки, хыдылахьванды мисала выгыр, «…Вас мыха1д ч1ел джавац1ара йишийне, вы мыха1шура ки диш» хьур.
Бийзат-ришире кьыле гьыъыр джу хит1ир ад нинды ч1иликла шиъирбыр, хайиш гьыъыр уву1х хьур нинды ч1ел.
Официальный гвалахбыр бегьем йишидаа, телебийше кьыле гьыъыр дур-ун ад шаирешды шиъирбыр, гьагва гьыъыр сценкабыр, нинды ч1илылады гьыъыр на1нибыр.
Б. Мыха1ды
