Ми бейдени Москвади национальностьмыд Хала йишир ай дагъыстандид джегьил шаир Тимур Раджабовад творчестводид вечер ва гьанийды шаирмыд сборникед презентация. Гьа шеирмыд китабад дур ки йиъи «Йикиси кьыле гьаъас» рухьуд (Можно читать).
Гьа1р са литераторас джуды творчествадид вечер виъи эккед гвалах джуду гьу1мирдик, гьадыхьван кине мидид себеб гени ки вишийне ц1инды шиъирмыд сборник.
Тимур Раджабовад гвалахбыр гьаса ки йишири — К1ыъды залад холла стола уу гъани йиъий гьади ц1инды, гьалаки краскамыд ил киджийтхьуд, китабыр «Кьыле гьаъас йикиси хьур» дур гъад.
Гьа вечер кьуле выгыргад шаир, критик, художник, на1нибыр гьаъад Россиядид писателешды Союзад член Ольга Никитинаре миди адбыр таныш дыъыри шаиред биографиедикван.
Тимур Раджабов гьухьуд йиъи 1976 сыда Буйнакск шегьерди. 19-уд сен йишид гедене, гьа куч1ури кьалам лювубшере — гьанийихда вишири шаирешды вдохновение. Ква1д сен литхьудаа, гьагуйне гьанийды ч1елмыд деринвалды, 1997 сыда джегьил шаир, эккед дур гъад шаир Расул Гамзатовад ч1ел хана, йыхьыри ва аа1чури Москвади ад Максим Горькийды дур гьад Литературадид института.
Гьади шаир Тимура гьа1вас гъана ваъарай кьыле, гьа1мише килхьерей шиъирбыр, ва хьели ки гьаъарай джурба джурад гвалахбыр.
Са вахтила гьанийихда вишири джуды кредо — «лазимдикла джалгыр суджукьус» хьур.
17-ды сыдыд арыди Тимур Раджабовара кихьири 300 шиъирбыр.
2006-ды сыда Махачкалыди «Эпоха» издательствади гъитхьури гьанийды шиъирмыд сборник «Озорное вино», йыхана кьабыл йишид обществадис ва джуды дусташис.
Гъийгъа шаиред ч1елбыр, гьанийды шиъирбыр лахара а дур-ун ад литературадид альманахмыы, журналмыы ва газетмыы — Россияди, Европади, США-ди: «День и ночь», «Московский комсомолец», «Семь искусств» ва маддымы.
«Тимурды шиъирбыр йиъи гьа1р са джурыдыра – патриотический, лирический, хынимешды усулмыд ки кине. Гьадыкван кине, гьабыр йиъи на1нибыр килхьебишис ки йыхды материал. Гьалаки гьабыр ани йиъи авторский усулдыре, минкир и гьабыр музыкально-академический джурадире ки йикис», — гьухьури гьади Дженнет Шамасаваре, Россиядид композиторашды Союзад член, РД-дид искусствадид Лайихды деятель.
Гьади лап эккед кьимет выри шаир Тимур Раджабовад Горькийды дур гъад Литературадид институтад ма1гьа1лим Сергей Арутюновара ки — гьа йиъи мидыла савайинди гене ки шаир, прозаик ва литературадид критик. Гьание йик1иы хъыгыри джегьил шаиред кьыле ваъад ва ц1инене шиъирбыр килхьед вахтбыр, ва агъмиш гьаъыри щаир Тимурды качествабыр выг1ыннийис ва эдемива1лис лайихдыбыр не.
Тимур Раджабов йиъи мисед шаирешды йыкьа1 дур ад премиямыд лауреат: Юсуп Хаппалаевды дур гъад (Махачкала, 2012 с.), «Серебряный стрелец» (Лос-Анжелес, 2007 с.), йукьды къатдид ки сиенероссиядид фестиваль-форумад «Часовые памяти» ва «Московские салюты» (2006 — 2012 сыдырма) дур гъад Москвадид правительствадид ихтиядихда ад.
Гьанийихда а 20-ла балад гъамивалды, россиядид ва дуьнядыд халкьмыд арымыд ба1сыма, гьадыхьван кине хабар выъыри шаир Александр Чистяковара. Гьа йиъи «Часовые памяти» дур гъад форумад кьухьды, Сиенероссиядид джегьил шаирешды ачухды фестиваль «Мцыри»-дид директор.
Лап йыххане шаиред творчестводид вечера адбыр рази дишир ай Расул Гамзатовад рыш Патимат Гамзатовад ч1елмы. Искусствовед ва Россиядид художестводид Академикедид член риъине, гьание сивхьири миди ад сиенибишды фагьам шыв йыхды ва актуальный виъиди ми ихьды джегьил шаирери килхьед шаирмыд ч1елмыд натиджа.
Гьа1р шаиред мырад виъи джуды ч1елбыр на1нимыкван агъмиш гьыъын, ва миди вечера талант ад къавалаше ки гьыъыри шаиред ч1ельмыкванды на1нибыр. Гьабыр диъий — Марат Фидель, Валерий Евдокимов, Елена Никитина, Владимир Медведев. Ольга Никитинере са шумуд на1ни гьыъыри авторад ц1инды «О самом важном»-хьур проектаклады.
Миди шиъирбыр кьыле гьыъыри Тимур Раджабовад юлдашеше-шаиреше Александр Антипова ва Ростовдаа дур гъана минийды творчестводид вечера йиркьыр ад Андрей Бочкова.
Джуды авторский вечераа кьыле гьыъыри шиъирбыр Тимур Раджабовара ки — зала адбише лап йыххыне фагьам сивхьир, хъадац1ыра ай гьанийды быт1рад ва деринды гафмыхда, гуджлине йик1иа йик1е руъуд.
Гьади ми уфтанды шаиред творчествадид вечера ай джегьил ихьды талант Тимур Раджабовад нин Зумруд ки, шаиред джуды риши ки хъуна.
Ми джибрады вахтинди Тимур Раджабовад шиъирбыр гени ки лийир ай дур-ун ад «День и Ночь» рухьуд литературадид журналаа. Гьадид кьухьды редактор Марина Саввиныхаре ки миди, кар гьац1ад устадара кал, выри кьимет гьу1рмет хывкьынис гуьре творчествадик кид илсанешды арыди, гьабишды арыди кине ки ихьды Дагъыстандид дур-ун ад джегьил шаир Тимур Раджабовас ки кине.
Къинады САИД
P.S. Ихьды редакциедид коллективере ки гьаъара ихьды шаир Тимур Раджабовас нубараг джуды ц1инды китабаб презентацие ва гьаъара джус арзуламиш гени ки эккед творчестводид лаъвалдыбыр.
