19 декабрес Дагъыстанад Правительствадид Седри Абдусамад Гамидов, РД-над Правительствадид Седриед Сахьусды заместитель Анатолий Карибовахьван ва регионад здравоохранениедид министр Танка Ибрагимовахьван сыт1а таныш йишир ай гволахмыхьван Махачкалды гьаъара ад Перинатальный центра.
Объект проверка гьаъад арыди подрядный идарадид къуллухчийшихьван агъмиш гьыъыр сиене гьаъара ад гвалахмыд а1хвалатбыр. Ад суалбыр агъмиш гьаъади, вахтинды кьабыл гьыъыннид центр, Абдусамад Гамидова гволахбыр гьаъад устарашда хайиш гьыъыр к1ыбди бегьем гьаъ хьур аъсурууды гволахбыр быт1рана, кьул-кьулик кине, вахтиндире ягъа1д ка.
«Гъийгъад йыгъа гволахбыр медецинский центрад, кьабыл гьыъыр йигад декабред аахира йикьама, кьуле йыгыр а 99%. Миди гьамыъмадана сихьир а вахтиндире ягъа1д оборудованиебыр, гьис хьурди центр йикис сахьусды лаъ хъуд Дагъыстана. Аммани, ихьды суруула эккед макъыетвалды анахъунгадики, гьалаки мада сасад неразивалдыбыр: сасад джигима фанарбыр адиш, сасад джигима кранбыр гъадиш, ва мадды лазимды карбыр; амани устараше, хы1ва1 халкьара ихьды хайишбыр, йыгъа ва выше гволах ваъара. Ми бегьем руъуд арыди гьабыр мааки йыхана чалыш дишир йигара, е ки ихьды суруула гуджли ваъас макъыетвалды ва чалыш дикис шунага гьувга выъыр ад вахтинди кьабыл гьыъын бадана объект.
Лазимды сиене инструкциебыр подрядчикес за выр а, гьамык кине ваъ хьур сменамыд график, йыгъа-выше гволах выъын бадана, гьис хьурди аъна халма йокв ки а, сигъын ки, гволахбыр луза маъ хьур, гьаъара ад гволахбыр ма1хкамна гьаъ хьур; гьабыр лейих йишир йигара сиене нормамыс ва стандартмыс», — гьухур гакъыр бегьем руъуди премьер-министре.
Йик1иы лахъахара, Перинотальный центр 150 ер ад луза гьаъара ад йиъи ху1киметед программадыхьван Дагъыстан Республикадид здравоохранениедид 2011-2016 сыдырмыд арыди модернезация кьуле выгыргад.
Гьа гволахбыр кьуле гыргара ад йиъии тангымыхьван, сиргара ад Федеральный обязательный медицинадид страхованиедид фондад бюджета республикадид бюджетед тангамыхьван сыт1а.
Мира Казиева