19 ноябрес Махачкала шегьерди кувч1ур ай РД-над сахьусды Республиканский театральный фестиваль-конкурс «Воспевшие Дагестан», арыди-джаргыди выгыр ад РД-над культурадид Министерстводире ва шиъирмыд театрара Рамазан Абдулатиповад кюмег кине.
Фестиваль торжественно ачых выъыр иштрак дишид гьади дагъыстандид театрмыд артистеше кьыле гьыъыр шиъир «Тебе, Поэзия, спасибо!», гьадыла хъуъ сыт1а дишидбишды улихьде гьалгыри Рамазан Абдулатипов.
«Гьакьвалды, быт1равалды, йыхвалды, хъыдгынвалды — шаиреше гьамыкла килхьире, рухьура илсанашды арабыр гъебле гьаъара. Дагъыстанди мысга ад виъий эккед культура къуну-къумшиехьван, мийманахьван хатир — ху1рмет ана, джуду ад гьа1дат-нубатбыр кьуле гыргара аъ-гъаъ диъине. Дагъыстандид ки россиский шиъирбыр ки мысга кетхудана ад йиъи, гьаса йишийне ихьды илсанар гьа юрушди эдир йыгара. Яхда бала гъеблид писателешды Союз а Магомед Ахмедов кьулу гъана. Гьадыла яхда фикир а, генеки дагъыстандид шааъирешды творчестводыхьван таныш даъас; миди фестивале республикади ад ха1р театрара сивхьиси джуду спектакль. Гьаса йишийне Дагъыстандыхда ад са ра1хъ виъи — ра1хъ культурадид»,- гьухьури регионад Кьухьние.
Мийманашды улихьде генеки гьалгыри конкурсад жюриед седри Виктор Малыгин: «Фестивалед девиз гъийгъа ки, мидыла хъуъ ки йикиси Александр Сергеевич Пушкинды ч1елбыр: «Когда народы, распри позабыв, в великую семью соединятся!…»
Фестиваль бала гъеблид вишир, гьис хьурди гьасад кивикад маа хъивикисдиш. Гьа ки эккед агъмишвалды виъи жюриед состава иштрак дишин».
Джуду суруула, Дагъыстандид театральный деятелешды Союзад седри Айгум Айгумова гьухьури: «Гъийгъа уфтанды байрам виъи, гьадире са артистешды йик1 лаъ гьыъыр адиш ва республикади ад сиене илсанашды ки лаъ йишир а. Ихьды бырдж йиъи – гьа гвалах кьуле выгын, шааъирер лаъ-хьуъ дыъын. Гьадыла асыллы викис ихьды культурадид лаъвалды».
Дагъыстандид халкьдид шааъир, шиъирмыд Театрадид кьухьды Магомед Ахмедова къутливалдыбыр гьыъыр гадкъабишис фестиваль ачых выъынис гюре. «Сахьусды кьухьды мийман йиъий Дагъыстанди шааъир, гьабыр мысга ху1рмет ана хабыр диъи. Ихьды фестивалере сыт1а гьаъара шааъирешды ад йыхды хиялбыр, ниятбыр, йыхды актерар, режиссерар, кьул-кьулик кине джуду гвалах вац1ад, гьадыла ихьды гьа1датбыр ки йик1ыыла утхасдиш»,- гьухьур гьание.
Конкурсный программа ачых выъыр ай Г. Цадасад дур гъад театрад Аварский музыкально-драматический спектаклехьван «Махмуд и Муи» (режиссер-Алисултан Батыров).
Гьа вечер лавурт1ад гедене Аварский театрас выр ай Республикадид театрад фестиваль – конкурс «Воспевшие Дагестан» иштракчиед диплом.
Мира Казиева