Мыха1д хьыле

Мыха1д мукъу1д дере-тепе,
Самурара рыхы1ре лепе.
Йик1быр ухьды хьед кал ма1дды,
Йик1ис хъыдгад, Мыха1д хьыле.

Ве ц1ыхьыра ад ваз калды,
Виргъире вылц1ад нур калды.
Дженнетдид ху1риер диъи,
Йик1ис хъыдгад, Мыха1д хьыле.

Ламыс, гъиръят вехте ад,
Асланашды джурагьа1т ад.
Ихьды халкьдид ве йик1е ад,
Элдис хъыдгад, Мыха1д хьыле.

Гьа1р са кардид устадар диъи,
Выг1лешила артух диъи.
Хизындид паргарар диъи,
Йик1ис хъыдгад, Мыха1д хьыле.

Хьыле гьу1рмутдид пиялабыр,
Йик1е ад хиялбыр.
Къыхьа1 даъара кулхьватбыр,
Йик1ис хъыдгад, Мыха1д хьыле.

Академиешды гвалахбыр гьаъад,
Профессорашды дурубыр ад.
Нинды ч1ел китаба эвид,
Элдис хъыдгад, Мыха1д хьыле.

Магьа1лимар, духтурар, шаирар
Дамах виъи Мыха1д халкьдид.
Уьхьду дур Дагъыстанди а,
Йикис хъыдгад,Мыха1д хьыл.

Са Бийзат хьибыр Гюльджагьан,
Дунйадикла ваъара хабар.
Гьукьлии йидкьыд, улис гьагуд,
Илсанашис гьаъара азбар.

Индира, Вилает, Лимунат,
Миллитдис ваъара гьу1рмет.
Изды ч1елбыр ва1с аманат,
Йик1ис хъыдгад, Мыха1д хьыле!

Ватандихда
йик1 хъумада

Хар-хар вишир нагъв сувгъу1ре,
Йик1икла эбир кавгъу1ре,
Йиз гъад сывахда, банахда,
Джанде арзуман амаба,
Ватандихда йик1 хъумада.

Быч1 гъад майданбыр, къуджелбыр,
Набатад дад кид мирибыр,
Сывымы гъад гъырчешихда,
Дженде арзуман амада,
Ватандыхда йик1 хъумада

Гымыш калды былахмыхда,
Ха1м гьадхы1д лук1несмыхда,
Джанде арзуман амада,
Шейед – шуркуд ма1ниймыхда,
Ватандихда йик1 хъумада.

Кулхьутди йик1 гъад нинебыр,
Кьыхьи даъараъад веледбыр,
Асланад йик1 ад джигьилер,
Ва1хда арзуман амада,
Ватандыхда йик1 хъумада.

Мукъу1д кьа1сды, кьыхьнывыхда,
Вылц1ад угут, насагьа1тдыхда,
Джейран калды ришбишихда,
Джанде арзуман амада,
Ватандихда ул хъумаба.

Нинды, дидды сырымыхда,
Сыры лихьис быч1имыхда,
Йик1иы гъад таяхда-тушехда,
Джанде арзуман амада,
Ватандыхда ул хъумаба.

Ватан ширин виъи нинды,
Ве хъу1дюргъе ватандыхда,
Шудаъ гъарибва1ли адгырди,
Ватандыхда ул хъабгаси,
Джанде арзуман адгаси.

Ватандыхда ул хъумаба,
Хыди-хыных йик1е мада,
Рыгад рыш йик1иы гъамара,
Джанде арзуман амада,
Ватандыхда йик1 хъумада.

Гюльджагьаныс духрешыхда,
Дават ваъасды хыдылашихда,
Гъарибва1лиы гъад ришиймашихда,
Джанде арзуман адгаси,
Дуьнйадихда йик1 хъадгаси.

Ватандихда дешес ве

Гьеч садаки сымадырыхы1й гъурбутды,
Са йыгъ йыгъас ватандыхда дешес ве.
Ядашихьван гьу1мир пыч мываъ у1хьды,
Са йыгъ йикьас, ватандыхда дешес ве.

Йыхды йыгъа дуст-юлдаш бала йикис,
Яд илсанар гьухьуд ч1елбыр ух йикис.
Писды йыгъа гьеч са вышне агасдиш,
Са йыгъ йикьас, ватандихда дешес ве.

Гьатхы1д йыгъбыр-сенбыр йик1иы хъикьаси,
Йик1иы йидкьыдухъун джанде эзер ихьеси.
Йиркьыд-хъиркьыновда ватан хубкаси,
Са йыгъ йикьас, ватандыхда дешес ве.

Йик1иы йыкьас нинды-дидды хал на лах,
Йик1иы хъидикьаси хыди не хыных.
Йик1 гьулхьар адгаси шухда-ришихда,
Са йыгъ йикьас, ватандыхда дешес ве.

Гюльджагьаныс руъур у1хьды хаджалат,
Вац1ара зас гъарибва1лид а1гьвалат.
Васи ваъара — ватандыхда хъуьдюргъин,
Изды ч1елбыр салтари вес аманат.

Йик1 хъадгас

Ц1ыдды виргъихда,
Нур ад вазырыхда,
Литх1уд быч1имыхда,
Изды йик1 хъадгаси.

Гьадхыд сывымыхда,
Гъургъад гъы1решихда,
Шейед-шуркуд маниймыхда,
Изды йик1 хъадгаси.

Ихьды илсындыхда,
Ширинды мизихда,
Ваъад ху1рмитдыхда,
Изды йик1 хъадгаси.

Дидыхда, шухда,
Ниныхда, ришихда,
Рышахда, духарыхда,
Ихьды йик1 хъадгаси.

Дават ваъасды духарыхда,
Сус рикисды рышехда,
Лет1къасды мырыддыхда,
Ихьды йик1 хъадгаси.

Виригъ гъад ха1лихда,
Ха1ле ад ха1диймыхда,
Быч1имыд илдыхда,
Ихьды йик1 хъадгаси.

Гюлджагьаныс дуьнйадыхда,
Да1ви-къал джившиныхда,
Арий гьу1рмат вишиныхда,
Изды бала йик1 хъадгаси.

Манибыр – хулбыр

Выш йидкьыри мыч1ахъды,
Ваз йибкьыр ха1лды йыкьа1.
Дердер гъамар лершур а,
Умуд кидиш вы хъикьасды.

Ваз йибкьыр а пашмална,
Йыгъ йидкьыр а душманна.
Рурхьур шуьба1шды дердер,
Гьушне гийкьас диш гьа1лахда.

Ха1дей виъий, ваз виъий,
Хъыгад йиъий, ваз виъий.
Зы йик1иыла самарых,
Ве изды улид йакв диъий.

Га1шене убул вешере,
Нин рикьид хынимер дешер.
Ха1рды саса литхьури,
Йик1 едед риши решер.

Самурад къирахди ха,
Са зы текна хала а.
Ц1айкал лирк1ур, йик1 т1улкьар,
Хынимешыхда ул хъуна.

Рикьега уна хъидыкьый,
Рурхъага хьума хъидыкьый.
Ил ана лехъджедкьыйне,
Кирхьига сыры хъидикьый.

Билбил мабдиш, багъ мадиш,
Быч1 литхьурад багъ мадиш.
Быч1 сеч1ур билбил ливчид,
Виран йишир багъ мадиш.

Хьед йидкьыр йизбыр лугъур,
Хуляхды вышбыр йидкьыр.
Шадвалды гьуджувгуд гьу1мир,
Саджархыр йик1иы хъибкьыр.

Эберар ац1ыр ад йик1,
Эзермыра гьутхьур ад йик1.
Ширин-шербет аджыгыр,
Фитнимыра гьутхьур ад йик1.

Хьесыма гъа лы1хды хал,
Бала киркар рышес хар.
Изды пашмалды йикис,
Выгырдиш вад чара хал.

Дерде-тепе ругъургъас,
Самур кал зы ларырсас.
Улабыр вес кьурбан и,
Зы улаб дишне ругъургъас.

Вы виригъ виъи, зы ваз,
Йик1иы гъамарамы вас.
Межлум ка зы ругъургъас,
Лейли ка вяхта рурхьас.

Джан изды багъдис кьурбан,
Йиркьыд мийманас кьурбан.
Йик1е арзуман мадад,
Бый быхахды кьурбан.

Вы рыш гьилады риъи,
Йик1е яра ад риъи.
Улабала хъарац1ар,
Вы ихьты джейран риъи.

Пашмал риъи, зы пашмал,
Хуркад адиш — гьис пашмал.
Дуьнйады гъамай яраб,
Дердер рурхьур ад зы кал?

Быч1имыс хар йывхы1ри,
Быстанас хар йывхы1ри.
Къарг адиш кьурбан ваъас,
Изды джан кьурбан гьаъас.

Йик1иы гъамадиш ч1елбыр,
Улаба лихьир т1алабыр.
Азраил аман хъивий,
Джанде амада ч1елбыр.

Шу йикьир лы1хды лаъар,
Нин-ришире лы1хды лаъар.
Багъди билбил викьийне,
Быч1имыр лы1хды лаъар.

Шилды укь литхьуд сывбыр,
Йиз лихьир гьатхыд сывбыр.
Гьис хъиджишид йыхы1на,
Кьел савъыр гьутхьуд сывбыр.

Быч1 гъадишды багъ йигайш,
Гъубагъ гъадишды быч1 йигайш.
Быч1мы билбил гъадишды,
Дуьнйадид лезет выгайиш.

Дагъыстанад гьатхыд сывбыр,
Тепиймы йиз гъад сывбыр.
Изды йик1иы дагъ лихьир,
Са ва1 вешны са дагъбыр.

Изды Лучек

Кьу1нды лец1урды арий ад,
Хьибды дерийид арий ад.
Рихьды миллетдихьван гьу1рмат ад,
Изды ватан, изды Лучек.

Вах гьа1бхыр ра1хъбыр адишды,
Йыгъ йишин гьа1р хала мийман адишды.
Суфра ачыхна йик1быр пакды.
Изды ватан, изды Лучек.

Ху1рмютдид меркез виъи вы,
Мийман шадды виъи вы.
Вахда а бахт не берекет,
Изды ватан, изды Лучек.

Лучекды джама1хтихда,
Езед ч1ирбыр, дамбыр яхда.
Хинахъ-Гале гъад суьрюбыр,
Укь сахад кьуцувбыр, къуджалбыр.

Лучек му1къ дур-ун ад виъи,
Кьыле выъыбишды дур ад виъи.
Джегьилер джурат абыр диъи,
Изды ватан, изды Лучек.

Да1гьви гьатхы1р джигьлер,
Дишири гуджлид джигьлер.
Дурбыр джухьды кихьир мада,
Йигиташды ватан вы, Лучек.

Гюльджагьаныс вы йик1иы гъа,
Ва1хта ра1хмет сивиргара.
Памятника быч1быр лилхьер а,
Вы изды йик1, изды Лучек.

Бала лейих и

Дуьнйадис ваз-виригъ,
Ч1ирис-ч1ыкыс махьв.
Инсанас ху1рмет-муху1бет,
Бала лейих виъи.

Джегьилешис джурагьа1т,
Хьылешис абыр, ха1я.
Рышес-ламыс, гъиръят,
Бала лейих виъи.

Багъманчиес — багъ,
Быч1имыс — билбил.
Билблес — мани,
Бала лейих виъи.

Кьа1снавыс — идды накь,
Ц1ай кид сивг1ыд лах.
Бегеде хад кьа1б,
Бала лейих виъи.

Хьадис — яц, дылан,
Дылынды — ц1инды магъ.
Язел ваъад устад,
Бала лейих виъи.

За1хметчиес — гвалах,
Тембелес — акъа1ды накь.
Некьа гьаргвад кеф,
Бала лейих йиъи.

Гимыс — насагьа1т,
Выъын — меслягьа1т.
Фитне джывыъын,
Бала лейих йиъи.

Мездикес — дибир,
Дибирес — кьуръан.
Ва1дий кыъын азан,
Бала лейих йиъи.

Магьа1лимас — тербие вын,
Кихьис, кагъун гьаъас ха1р гъыъын.
Хынимеше — убур хъацун,
Бала лейих йиъи.

Шафис — йывха1с саз,
Суьсмешис — ваъас наз.
Ришбишис — дамах,
Бала лейих йиъи.

Солдатас — саргьа1т,
Увуху1н ватан.
Изды Дагъыстан,
Бала лейих йиъи.

Сафарыс гвалах гьукьле выгын,
Дюзвалды выъын.
Мукъу1 дур-нур хъыгын,
Бала лейих йиъи.

Гюльджагьаныс — кихьин,
Дюзва1ля лалгын.
Угут-насагьа1т вын,
Бала лейих йиъи.

Рамазанова
Гюльджагьан,
Лучеклады