Гъийгъа, 4 ноябрес, Дагъыстана, сиене Россияди ка, агъмиш выъыр байрам халкьмыд сава1лид Йыгъас гюре. Минтингбыр, концертбыр гьа йыгъа Дагъыстанад Кьухьды Рамазан Абдулатипов йыркьыд Кизилюрт шегьерди ки йишир ай.
Шегьерди абишды улихьде къутливалдыбыр гьаъади, Рамазан Абдулатипова гьухьур, гъийгъа юкьсура дуънйады джетинды агьвалат ади, дагъыстанабыр мааки са дишир йыгара ихьды РФ-дид Президент Владимир Путинехьван ва сыт1а чалыш дуруъура ихьды республика бадана. «Районмыд ва шегьермыд администрациемыд бырдж – савалды вишин халкьмыд, гюзет гьыъын инсанашис йыгад гвалахбыр, лаъ йыгын культура, кьылевыъын ва гьабишды яшайиш. Бес гьа байрамад натийдже — халкьмыд сава1лид Йыгъад, Россиядид Президентед ниятахьван, сиене инсанар ари сана дишин. сиене халкьдид яшайиш лаъ йишин джуьхьды чалышва1лихьван. Ва ихьды чалышвалдымыд себеб виъи республикади яшайиш йыха гьыъын. Гъийгъа дагъыстанабишис гичь мабдиш, 3 сен хьурагине адкалды. Гьадыла саваенди сиъинбишис гьагвара а, шууды йыхды дегишвалдыбыр руъура ади кьылевыъынид системади. Шесне ки, мисте ки Дагъыстанас сагъулад кагъатбыр сигыр ай Российский Федерациедид Кьухьдыбише ЕГЭ йыхана выгыдыла», — гьухьур Рамазан Абдулатипова.
Сентябрес йишид РД-над Халкьдид Маджлисед сечкимыкла гьалгади, Рамазан Абдулатипова гьухьур, сахьусды хыл йиъи 25 сыдыд арыди иджлас ц1ине выъыр ад ц1инды инсанар кет1ир; иджласа гьагвара бала дишир а хьыле ки. «Гьаса гьыъыд йиъи, сиене инсанаше иштрак гьыъын бадана дагъыстанабишды гьу1мирди. Сагьусды хыл йиъи республикади джигьилешды иджлас выъыр ад. Мидыла хьуъды джетинвалдымыхда гаджадкьыр е йыгъ-йыгъала лаъ диъи. Дагъыстан, хьурагине 57 ера гъад социально-экономический развитиедид сураа, гъийгъа выхьыр а 17 ера. Промышленностед развитиедид сураа ихьды регион Россияди сахьусды регионмык кинивиъи.
Гьыъымы ледкьыр люздир йыгардиш. Заводбыр ихьды гъилы ликийир йыгара, гьамык кине химический завод ки, ад гвалахбыр модернизировать гьыъыр йыгара ва игъийир йыгара вахтиндире ягъа1д товарбыр. Приоритете аниъи сельский хозяйствадид гвалахбыр ки. Е сиъинбише хыл хыле выр савалды выъыр йыгара лаъ-хьуъ дишин бадана. Россиядид Президентес дагъыстанабише лап эккене доверять гьаъара – 93 процент. Ва е ха1р йыгъа гвалах выъыр йыгара инсанар бадана, гьа процентбыр мысга эккедбыр йишин бадана.
Амма инсанар ки гъара люздир йыгардиш, гьа1рние джуда руъуд гьыъыр йыгара ихьды республика бадана. Дагъыстанабыр – халкь виъи, мысга йыхана кьыле ваъад ва гвалах ваъад. За изды гьу1мир сивирхьере а Дагъыстана порядок йишин бадана. Чалыш йикис, ихьды инсанашис гиджич1ин бадана ва сыные са джыхы1н бадана. Е са халкь вишир йыгара, яхда йыхды результатбыр йишин бадана. Россиядид халкьмыд савалды вишийне Владимир Путин кьуле гине, са душманад кар гъадиш!»
Республикадид Кьухьние йик1иыла убха выъырдиш гъийгъа републикади ад джетинды месъэле ки – инсанашихда темизды хьед йишин, гьухьур, гьадис гюре лазимды сиене гвалахбыр кьуле гыргара аниъи.
«Йыхды яшайиш йишир йикис порядок, порядок йишир – безопасность викис. Гьа сахьусды лаъ хъуд гвалах виъи. Ешемиш викихь дагъыстанабишды савалды! Сахъ виший российский савалды! Сагъ йиший ихьды национальный лидер — Владимир Владимирович Путин! Саъ-шад викий ихьды уфтанды халкь!»,- гьухьур Рамазан Абдулатипова.
