Октябред 22 хьусды йыгъа захда буюр выъыр ай Дагъыстандид хуIкиметед университедед, филологиедид факультетед деканатара, джухьды факультете кьуле выгыргара ад Дагъыстандид халкьмыд, нинды чIилмыд галды йыгъаик.Заа хабар ливкьа выъыри ихьды МыхаIды Исмаилова Эминат Ибрайимовнара. Гьад риъи Дагъыстандид гьыIлимдид академиедид, гьылимдид меркезед, чIилды, эдебиетдид ва инджисанагьаIтдид (искусстводид) институтад, гьыIлимдид кьухьдыбыйды сотрудница. Гьадыла саваенди, гьад риъи филологиедид факультетед, дагъыстандид чIилмыд кафедрадид доцент.Гьание гьади гыргара мыхаIды студентешды группади нинды чIилды дарсбыр.
Джуды вахтинди зы филологиедид факультете йыхьыйне, гьадид актовый залад фоеди Дагъыстандид баласды миллитмыд майданбыр тешкил гьыъыр ай. ХаIр майданад стендмыы сихьир ай джуды шаирешды на язычийшды китабыр, гьабишды портретбыр, джуды чIилылад журналбыр, халкьдид хылире гьаъад карбыр, эвелды къаб-къаджагъбыр ва мадды-мадды, халды гедишетди ишлег гьаъад джурба-джур гьакь-хаIсабыр. Гене, лаъна хаIсаба гьыъыр ад кардымыла гъайри, хаIрнийды майданаа йидкьыр ай джуды халкьдире гьазыр гьаъад улед-рагъад ямагбыр.МыхаIбишды майдан беземиш гьыъыр ай ихьды студентеше, Эминат Ибрайимовна кьулы гъана.
ХуIрметли газет кьыла гьаъад изды ватанагьалыер!
Зы гьади са кардыла бала неразине аргыри. ВаI фикир ваъ: Дагъыстандид, эн кьухьды, дур ад Университетед, филологиедид факультетед сахьусды курса ихьды районда анидиъи кьваIр рыш — са Йирек мукъаIды са ки ЦIахыIрады, гене кьваIр рыш анидиъи Хинады. Нинды чIел увухуIр выгара.Ихьды, мыхаIбишды чIилис хуIкиметед статус выдыла хъуъ, гьад чIел бала маIхкамна, мехьтебе дарс вылцIара хаIр выъыр йыгара. Бес гьал и гьади хинимешис дарсбыр высды, магьаIлимер джидшийне? Е, ваI, кьухьдыбише ки, ихьды, нинды чIилыла кьыле гьаъас, кихьис-кагъус хаIр гьыъыр йыгара, амаа е хьуйне, четин и хьур, гьад гвалахаик хыIв гивирхьир диш. Ихьды хынимеше мехьтебе урус чIилыла кьыле выъыныла савайинди, телевизора урус чIилылад программамыхда гадкъара, хъадапцура. Гьамыъ гьабищды хыле е вылцIара «Смартфон» рухьуд са бегьемды компьютер. Гьади, йыгъ-выш тIили ивтере, эйбеджерды уюнмыхьван мачхул диъи. Гьала мехьтебе джытхьыр ад хынимешис ки кине, телевизора гадкъара, урус чIел хаIр вишир, джваIр джухьван урусала далгара. Бес шууна хаIр викихь хынимешис нинды чIел, нинис джус, джуды чIел бегьем не джавацIадыла хъуъ, гьад чIилыла кихьис-кагъус, кьыле гьаъас джацIадыла хъуъ? Нинды чIел хаIр джаваъара, эхир нинды чIел арыда сувгуд миллет, дуьнйадид кьухьды миллитмыик кувчIур, дур ки кине гъаджадгыр лаабтIусды виъ, мадды гьадыхда эхир аддиш.
Дыкьа гьамыъ е, ваI гадкъаси майданмыла хъуъды нинды чIилмыд галды йыгъад программадыхда. Торжественный гьисседи, сегьнидыла бала ухьтанды, маIгьни ад гафбыр гьухьури факультетед декан Мазанаев Шахбан Абдулкадировиче, Дагъыстандид, нинды чIилмыд кафедрадид муьдир Багомедов Муса Расуловиче, Дагъыстандид миллетмыд ва Шеркь суруд (Востокад) эдебиетдид кафедрадид профессор Гаджи Гашарова ва мадды-мадды гьаIлимеше, Дагъыстандид шаиреше ва студентеше. Ми экед форум ад зала сукьур хъацуйне, бала агъатIур гьагвара — шууды заIхметбыр сихьир ади ихьды Университетед, филфакад, Дагъыстандид чIилмыд кафедрадире, профессораше не магьаIлимеше, нинды чIел увухуIр саптын бадана хъуъ хъудбишис.
Зы зала сукьур ай ихьды, Йирек мукъаIды, филфакад магьаIлим, профессор Джамалов Камал Эфендиевичехьван ва ЦахыIрады профессор Исаев Наби Гаджиевичехьван. Бала экед, марахлы суIхбет выгыри е ихьды мыхаIд чIилды гъийгъад везифадикла, адишды, гъеджеркьад дарсымыд китабырмыикла, шаирешикла, са чIилыхьван ихьды, мыхаIбишды медениетдикла ва инджесанагьаIтдикла (культура ва искусство)
Торжествестводид гьисседыла хъуъ, беслемиш вишири студентеше вылцIара ад кьухьды концертед программа. Гьади ихьды студентеше ки, ихьды шаирешды шиъирбыр кьыле гьыъыри.
Концерт бегьем йишидыла хъуъ, дагъыстандид чIилмыд кафедради джухьды магьаIлимешис не мигьманашис банкет тешкил гьыъыр ай. Миди ки элиф дыъыр ай са шумур дагъыстандид дур ад шаирер. Гьабише, хаIрние джуды, ми экед маджлисес кьимет выдыла хъуъ, джуды ярадыджылыгъбыр (шиъирбыр) кьыле гьыъыри. Нубат йидкьыр, зас гаф выйне, хуIрметли «МыхаIбишды хабарбыр» кьыле гьаъад изды ватанагьалыер, ваIс гичI мываъ, за ки ихьды банымыикла, сывымыикла, ихьды сывахъанашикла, ихьды гедишетдикла кьваIб чIел не са наIгьни банкете адбишис ашгара гьыъыри. «Салам Дагъыстан, Ватан изды» рухьуд, изды цIинды наIгьнияхда хъадацур, сиъинбише наIниес ва наIгьни рухьуд авторас, яни зас, йыхды кьиметбыр выри.
Гьад экед гвалах кьула выгыдбишис, чIилмыд галды йыгъ, экед праздник кафедрадис, профессорашис не магьаIлимешис, студентешис нубарак йикихь!
Белки едаа ки лагъуIд гьасад, нинды, дидабашды чIилды, экед галды йыгъ, ихьды МыхаI ки кьула гыргас, ИНШААЛЛАГЬ!
Шафи Амсари
