12 сентябрес Махачкалди ад Кьухьды Джума-мездике гьыъыр ай мусурманашды Кьурбан-байрамас гюре кубыр. Гьади кубас люздибишик кине иштрак гьыъыр ай Дагъыстанад Кьухьды Рамазан Абдулатипова, ДР-дид муфтий, шейх Ахмад-хаджи Абдулаева, шариатдид гьы1лимдид доктор, Катарский ва Османский университетмыд профессор, шейх Мустафа Диб аль-Буга.
Хьурагине миди мездикед имам Идрис-хаджи Асадулаева нубарак гьыъыри сиенебишис Ид аль-адха байрам.
«Сиенебишила Кухьды (Всевышний) Аллагьара кьабыл гьыъый сиене ихьды йыхды гвалахбыр, садакьабыр (кьурбанбыр) ва багъыш гьыъый сифтед гунабыр. Гьеми шадды йыгъырма мусурманаше сагъул ваъара Сиенебишила Кьухьдынийис, гьанийды паймыс ва чалыш диъи джанда-йик1иа темиз дикис»,-гьухьури имамара.
Гьание гене ки хъухьури — Россиядид ва Дагъыстандид кьухьдыбише сиене суруулад гвалахбыр гьаъара а инамишдыбишис рагьа1т йиший хьур.
«Ихьды гьу1кимете гьыъыр а сиене раха1твалдыбыр, Элигъанийы инамишдыбише джуды диндид бырдж хъывын бадана.
Гьа гьунар йиъи ихьды Президент Владимир Владимирович Путинед, мысга ислам диндид сур халкьад Россиядик кине сиене дуьнйады ки. Гьа1зиз шуьбе, гьание ачыхды эфире, суалмыс джываб хъывылц1ара, гьухьури: «Россияди ислам гьа1ммише лаъ-хьуъ виъид виъий ва гьа виъий сабыйды бин российский гьу1киметед. Россияди гьу1киметед властере хывкьасды йиъи ихьды тарихди ад гьа1датдид ислам».
Гъийгъа ихьды республика гуджлине лаъ виъи социально-экономический ва диндид суруумыла. Гьа гвалах кьуле выгыргара ад и Дагъыстандид Кьухьды Рамазан Гаджимурадович Абдулатипов ва республикадид муфтий, шейх Ахмад-хаджи Абдулаев чалыш диъине — гьабыр ми шадды йыгъа ехьван миди сыт1а диъи.
Гьабишды гьу1мирмыс ху1ляхвалды, джандис сагъвалды, Сиенебишила Кьухьды Аллагьара гьыъый, гьабишис куьмег вий мидыла хъуъ ки Дагъыстандид джама1хтис хайир вын бадана; ихьды гьу1киметед халкьдис, инсанашис йыха йишин бадана, республика ки быч1кал вишин бадана, хъухьури мездикед имамара.
Гьадыла хъуъ сиенебише выъыр сыт1ад байрамад куб.
Къинады САИД