«Наша партия — Дагестан»-хьур лозунг хад республикадид агитбригада 13 сентябрес ха1сил вишир Казбековский райондид активехьван.
Дылым мукъа1 ад райондид культурадид актовый зала вишид гьадис гюре мероприятиеди иштрак гыъыри администрациедид кьухьдыбише ва къуллухчийше, районди ад идарамыд кьухьдыбише ва къуллухчийше, магьа1лимеше ва духтураше, Казбековский райондады мадды ва шегьерма, юкьсура хъидкьыд. Гьадыла саваенди, иштрак гыъыбишик кинидиъий районди ад джигьилешды организациемыд, аксакъалашды Советед, Халкьдид палатадид представителер, дур ад спортсменер ва маддыбыр.
Иджласад президиума кий Дагъыстанад Кухьнийды Казбековский районди сечкимыд сураа Уполномоченный, РД-над транспортад, энергетикадид ва связед министр Сайгидпаша Умаханов, РД-над Кьухнийды ва Правительствадид внутренний политикадид Управлениедид специалист Абдула Абдумуталимов, Казбековский райондид Кьухьды Гаджимурад Мусаев, Хасавюрт шегьердид Кьухьды Зайнудин Окмазов ва маддыбыр.
Ягъмиш дишид юлдашешде Гаджимурад Мусаева мисе гьухури: «Удуху1ме ваъара «Наша партия-Дагестан»-хьур агитбригададис. Сахьусды хыл йиъи ихьды республикадид Кьухьнийды инициативадыхьван выгыргара ад мисед гвалах инсанашихьван, ва гьа лап дюзды гвалах виъи. Е са дишир йыгыр йыгара дюзды, ачыхды сечкибыр. Умуд ваъара за, казбековцыйше мистед сыда йыхана иштрак гьаъас хьур сечкима, кьуле гыргара гьадис гюре джуьхьды гражданский долг, кет1ес хьур гьабише йыхды депутатар».
«Шад йиъи гьадгуйне са зала ягъмиш дишир ад ихьды райондады дур-ун ад мийманар!
Гьа рухьуд ч1ел виъи, сечкимыра е ари даъара. Сечкима иштрак гьыъын ихьды бырдж йиъи, амма выш керъэсды ва1с гьац1ара, выш йыхды йиъиди.
Умуд а, сечкибыр районди йикис гьакьна-кьулна, дюзгинне ва шадана», — гьухьур Сайгидпаша Умаханова.
«Ихьды цель — хайиш гьыъын сечкима иштрак гьаъ хьур. Агитбригада балад районма выхьыр, ихтилатбыр гьыъыр балад инсанашихьван. Баладбише рухьура, ми сыдырма яшайиш гьагвара йыха йишир а стабильность ва безопасностед сураа. Хайиш гьаъара, фикир йыхана выъыр сес вияъ хьур, йисхьурди ихьды ха1р сесала асыллы йиъи ихьды быгады яшайиш ки»,- гьухьур агитациедид десантад кухьды Садык Касимова.
«Ассамблея народов России» Дагъыстанад регионад общероссийский халкьдид организациедид отделениедид седри Зикрула Ильясова хайиш гьыъыр сечкима иштрак гьаъ хьур ва сес ки ви хьур йыхдыбишис, вирзир Казбековский райондид джамаха1т, инсанашды йигитвалды, гьабишды Ватан хъывгынвалды.
Ухьтанна гьалгыри Хасавюрт шегьердид МВД-дид ветеранашды Советед седри Зайбодин Омаров: «Ес дыгара гъакьаллы, кьыле выъыд, гвалах лювхъуьд инсанар, леч1усды кюмег выс райондид кьухьнийды Гаджимурад Мусаевад гвалахас, гьание гьаъара ад ми сыдырма лазимды, йыхды дегишвалдымыс».
Дюзды сечкибыр йыгыр йыгара хьур далгыри партиемыд кандидатар, самовыдвиженцыер, спортсменер ки. 2012 сыдыд Олимпийский играмыд чемпионас дзюдода Мансур Исаевас выр ай джуды мукъа1 ад участокад джуду дуруу накьудид документбыр.
Казбековский районди выхьыд агитбригадади иштрак гьыъыр ай ихьды газетед, «Нур» газетед журналистеше ки.
А. Ибрагимов.
