23 августас Дагъыстанад Правительствадид Седри Абдусамад Гамидова гьыъыр ай иштрак РФ-дид Правительствадид вице-премьер Ольга Голодец выгыр ад видеосеминарад совещаниеди. Гьа совещание выгыр ад виъий, шууна гьазыр йиъиди гьац1ара гьаъас хьур ц1инды кьылевыъынид сыдыс мехьтебыр.
Россиядид Правительствадид полпредере гьухьури, ху1кийметед мехьтебыр 90% гьазыр и хынимер кьабыл даъас. Гьадыла саваенди, Ольга Голодеце йик1иы лихьийири, 1 сентябрес сиене мехьтебырмы макьыет дишир йигара, терактбыр джишин бадана. «Сахьусды еве убур йыхы1р йыгара хынимешды безопасностес». Хабар выъыр, мисте сахьусды сен йиъи Россиядид регионма ад детдомады хынимер дуруъусды йиъид сиене хынимешик кине са мехьтебырма, Ольга Голодеце гьухьури, гьа лап уфтанды кар йиъи детдома ад хынимер ки ва гьабышды яшайиш ки хизынди ад ка руъура а гедене. «Изды фикирдыхьван, сиене регионбыр гьа1зыр йикис гьа гвалах кьуле выгыргас, ихьды хынимеше, ха1р са багьанадыхьван детдомырма ад, фикир выъын бадана ихьды ху1кимете сиене хынимер сакал диъи хьур», — гьухьур гьание.
Дагъыстанди 1 сентябрес мистед сыда джуду ракбыр ачых гьаъаси 2700-ды мехьтебырмыра, садикмыра мадды кьылевыъынид идарамыра. Гьадыла саваенды, ачых гьаъас йыгара а 8 детсад, сиене сыт1ана 825-ды хынхыс ер викисды. Генеки 2000 ер анивиъи ху1кийметед дишды джигима.
Йик1иы лихъиес йигара, ихьды республикади анивиъи 1487 мехьтеб, гьади кьыле ваъара а 374000 хынхыра. Мистед сен лабт1ума бегьем ваъаси генеки 9 мехьтеб, гьадики кьабыл даъас йикиси 3964 хыных. 1 сентября йикьама ачых гьыъыр ц1инды объектбыр, абгасдиш хьиб смена са мехьтебе, кьылеваъад сен лабт1ума генеки юкьды мехьтебе.

Мира Казиева