Административный советед заседание вишир ай

20160729_102259Ха1р вазырды ахирес, улуджумад йыгъа вуруъуд кал, 29 июлас ки вишир ай МР «Рутульский район»-дид администрациедид актовый зала административный советед заседание.
Гьа йыгъад гвалахад повесткади кийир ай кьва1д суал:
1. Навкьбыр, идарабыр, хусуси халбыр ху1киметед яц1а ийинид ва ху1киметед яц1а адишне гвалахмы гъабыр ц1ам дыъынид 6 вазырды арыди мистед 2016 сыдыд отчет.
2. Кальяльский сельсоветед кьухьнийды гвалахад отчет.
Гьа заседание выгыргара ай райондид Кьухьды Давуд Сулейманова.
Сахьусды суалад бадана гьалгыри райадминистрациедид экономический отделед гьакьды-кьульды специалист Салам Магомедрагимов.
Гьание джыка1не ихтилат гьыъыр ягъмиш дишибишис, шыв агьвалат виъиди районди сахьусды суалад бадана. Ихтилат гьыъыри, шууна выгыргара ади гьа гвалах ха1р сельсовете ва шыв джетинвалдыбыр руъурди гьа рыкъа1.
Хьеликана райондид Кьухьды Д. Сулейманова генеки ихтилат гьыъыр заседаниедид иштракчийшис, шудаъ лазимды йиъиди, шууна сахьусды кьул кьуле йыгыр йыгад йиъиди гьа суал. Сиене районма накьбыр, халбыр ху1киметед яц1а ахара а дирибашене, балана, амма ихьды Мыха1д районди гьалаки гьа суалара «буксоват» гьаъара маданиъи.
Сиене сельсоветмыс выр ай планбыр ки, ва вахт ки гьувга выъыр ай, шудаъ, мыс гьыъыр йыгарди накьумыд хал-лахад, идарамыд «зеленкабыр». Гьамыъ вахт мабдиш. Ха1фтидид арыди сиене сельсоветмыра бегьем гьыъыр джус хабар хъиви хьур.
20160729_102329Хьели районад кьухьние джурана люзде даъара хуткунбыр гъыъыр ха1р сельсоветед кьухьнийда, гьили ливкьыр ади гьа гвалах, шыв гьаъара ади ва мадади гьаъас.
Гьади далгыри Мыха1д сельсоветед седриед заместитель Идрис Султанаев, Муслахский сельсоветед седри Ахмед Гаджимусаев, Мишлешский сельсовет Рамазан Кубалыев, Къинед сельсоветед кьухьды Магомед Магомедов ва мадды сельсоветмыд кьухьдыбыр яки заместителер.
Сасад сельсоветма гьа гвалах бегьем выъыр ай, сасадма кьатыла выгыр ай ва сасадма бышене вирхьара ай гвалах.
15 июлала хьуъ дегишвалдыбыр йишир а — «зеленкабыр» мадиш, гьамыхъаъ инсанаше гьамыъ яц1а лешур йыгара навкь, хал-лахбыр ва идарабыр росреестрад выпискадыхьван. Гьадид бадана ягъмиш дишид юлдашешды улихьде гьалгыри Мурад Рагимов — райадминистрациедид юрист. Гьание гьыъыд дегишвалдымыд ихтилатбыр, гьакьасабыр е газетед хьурагинды 28-ды номера лийир урус ч1илыла.
Хели райфинотделед къуллухчи Лимунат Нажмудиновара ихтилат гьыъыри, шудаъ гъийгъад йыгъа йыхы1р ягъмиш йишир ади налогбыр, гьилды сельсовете шыв агьвалат ади.
Кьва1дхьусды суалад бадана гьалгыри Кальяльский сельсоветед кьухьды Гаджиев Ибадуллах Газратович.
Гьанийды выъыд гвалахад отчет ки ихьды гьатхы1д газетмы гъаниъи.
Генеки Ибадуллах Газратовиче йик1иы лихъийир джетинвалдыбыр Кусур му1къа бегьем дишды рыкъы1д, связед ва тукад линия гуджли хъывыъынид.

Б. Магомедов