Ми джыбрады вахтинде аа-уу дуьнйади лап джетин, агъыра вишир а терроризмадихьванды меселе. Миди-тини ад террористешды ва экстремистешды группабыр сыт1а руъур а ва гьаммыд гудж ки йыгъ-йыгъала лаъ виъи.
Ихьды Россия гьу1киметере 2015 сыда кувч1ури ми дуьнйади ад терроризмадид у1ги лешус хьур Сириядид ва Иракдид накьвымы сыт1а вишид ИГИЛ хьур террористешды гьу1киметехьван (гьадис РФ-дид закондихьван запрет лихьир ад и). РФ-дид эскерешды гьавыди ад ва дерйагьа гъад къушунмыхьван гъийгъади йыкьамаъ выгыргара а да1ви. Миди ихьды эскерешды гудж лаъ вуруъура гьагуйне, Запада ад гьу1киметмыра ки миди джуды эскерер сидыгыри. Амма, гадкьыйне, гьабишды ният йиъи Россиядид гудж аа-уу дуьнйади лап хьуъ сидживгас хьур. ИГИЛ-дис йарахбыр вылц1ара, ха1р даъас эскерер-инструкторар сидиргара гьади, уджузна террористешда нафуд лебшура гьабишис танга вылц1ара, ми Западад гьу1киметмыра ва гьади ад баласты гьа1рабашды гьукиметмыра ки ми террористешды «къуес» (яма) вылц1ара нафас.
Миди-тини переговорбыр гыргара, вахт ливире, маа ки ИГИЛ-ес куьмег хъаъара Россиядихьван «куьмег» гьаъад Западара. Гьабишис йыгара а джама1хтире керъид кьухьды Сириедид тарг гьыъыр, джус йыгад калды сагъус. Гьадыла, ми гвалахмыхда гадкьыд гедене, ес гьагвара — Ирак ди да1ви ивир, гъийгъад йыгъаа йы1хы1р инсан йикьири а; Ливиядид уфтанды усул тарг выъыр, да1ви а; Сирияди да1ви ивир, инсанашис гьаджабгуд мысибатбыр мадиш… Гьала ки са Египет гьу1киметед эскереше ми «лы1хды у1лим» джухьды ераа йаваш выъыр а.
Лап четинды усул ивир а Европади ки, да1видила дахыд джамаха1тбыр гьади дыгыр, гьабишды йы1кьа1 террористер ки кедир.
Франциеди, Германиеди, Бельгиеди ва мадды мисед, джер джус а1сла1гьды, сабырды джыга и хьур ад, гьу1киметма террористешды к1ап1албыр йишир а ва терактбыр руъура а…
Мисе йишид гедене, йыххана фикир выъыр, гадкъыйне, Америкадид ва Англиедид мырад виъи джва1ршила гъайри сиене дуьнйады йы1х-йикь, да1ви-къал, га1ш-мыкь вишин. Гьаса йишид гедене гьа мадды гьу1киметбыр лап аады к1араа йикьаси ва джула ассылы йикиси хьур.
Ми джухьды «лы1хды» гвалахбыр кьуле гыргас джикисды и са Россиядире джва1р йаваш дыъыхьна. Гьадыла гъийгъа РФ-дид аа-уу сиене саргьа1тди силхьере а ц1инды йарахбыр ва эскерешды баазабыр, дерйагьа ва гьавыди йыгъ-выш гы1йгъа1ре а къушинбыр.
Гьадыла е-ва1 сиенебише ми лап четинды меселеди ихьды гьу1киметед кьухьдыбишды, РФ-дид Президент Владимир Путинед кьулы гъана гыргад гвалахбыр эскерер ва гьабишды ярахбыр гуджли хъыъын бадана, савалды выъыр, мысга разва1лихьван агъмиш гьыъыр йыгара.
Ехда мадды ра1хъ адиш — гьаса джишихьвна, миди ки да1ви-къал викис ди виъи.
Гьадыла гьа1р хизындире, гьа1р са инсындире джуды йыхды быгады йыгъ, а1сла1гьвалды выганнахъун, ми сахьусды суалас фагьам сивхьир, уях дишир йыгара.
Терроризмадыхда не бейдебыр дуруъуд диш, не хыдиймар дуруъуд диш, не дин-иман вуруъуд диш — гьа виъи «лы1хды» у1лим !
Къинады САИД
