6 июлес Махачкалди Джума-мездике Дагъыстанад Кьухьды Рамазан Абдулатипова джама1хтихьван сыт1а выъыр куб Салят-уль-ид Рамадан вазырды сивбыр лат1унис гюре.
Кубас дуруъудбишде гьание гьухьур, уху1р йыгара йыхды карбыр, Рамадан вазыра йишид.
«Гьа1р инсанара уху1р йыгара джу выдж, хизан, Дагъыстан, Россия. Эгер Дагъыстана дишихьвна дюзды динди ад мусурманар, сиене умма, ху1кимет, кьухьдыбыр сагъ-саламат, йыха дикис. Е сиене мусурманар диъи, гьабишик кине сиене ху1киметед гвалахмы гъабыр ки, ва гьыъыр йыгад гвалахбыр ки ес гьагва гьыъыр а Кьурундире, гьадыхьван сыт1а ихьды ху1киметед Конституциядире. Яхда ха1рнийда, са гъаъ кеджейир, аниъи бырдж Элигъанийды ва ху1киметед улихьде»,- гьухьур гьание.
Генеки Дагъыстанад Кьухние гьухьур, нургъад Ураза-байрам, сынийда сынийис багъыш гьаъас вылц1ад ва мусурманар ари даъад, викис мысга Дагъыстанад халкьбыр ари даъад на ихьды республика йыгъ-йыгъала лаъ-хьуъ вишин бадана, быт1рана вишин бадана. Рамазан Абдулатипова гьади гьухьуд кал, гъийгъа ху1киметере эккед кюмег вылц1ара а диндис.
«Вылц1адбыйды ес ху1киметере, е уху1р йыгара. Ху1киметере балана хыл вырыхы1ре диндис. Аммани дин ки ху1киметед эдимива1лид ассыл-насыл виъи.
Ислам дагъыстанабишды республикадид эдимива1лид бин йиъи. Е сиене — мусурманар диъи, гьабишик ху1киметед кьухьды гвалахмы гъабыр ки кине. Ва мусурманашис лейих йиъид кал е бырджли диъи йыхана гвалах ваъас ихьды республика бадана ва ихьды ху1кимет бадана, кьуле гыргас суалбыр, сирхьед ихьды хьура ху1киметере»,- гьухьур Р. Абдулатипова.
Гьание генеки йик1иы лихийир, диндид духовенство ва власть ари хана сыт1а чалыш йишир йыгара тарг гьаъас экстремистский гвалахбыр.
«Гъийгъа 10 гьагъзыра балад инсанар анидиъи яц1а умуд гъадишды, ч1ирид рыкъа1 адбырна. Гьаса йишир йыгардиш. Дюзды рыкъа1 хъидыкьас йыгабыр хъыдгыр йыгара. Гьа бырдж са йиъи ху1киметед не ва диндид. Сиене сыт1а, хыл-хыле выр чалыш дишийне, йикис Дагъыстан дюзгин хъаваъас. Амма зас гьухьус йыгара, ми сыдырма дагъыстанабишды умма гуджли вишин бадана гьаса ари хана балад гвалахбыр кьуле йыгыр ай. Е бырджли диъи да1ви выгыргас ихьды республика ц1ине, темиз къившин бадана. Гъийгъа миди ана, мездике, е са диъи, ва гьа савалды едаа хырыда джившир йыгара мидыла хъуъ ки. Генеки ва1с гъутли викий диндид-имындид байрам. Уду1х ве ва1, хизанбыр, Дагъыстан, Россия»,- гьухьур республикадид Кьухьние.
Перевод Б. Магомедова
