21 июнес МР «Рутульский район»-дид кухьнийды кабинете вишир ай антитеррористический комиссиедид заседание.
Гьади иштрак гьаъас йдкьыр ай республикадид антитеррористический комиссиедид не национальный анититеррористический комитетед кьуллухчиер. Гьадыла саваенди гьади иштрак гьыъыр ай сес выъыр йыдкьыд районди ад силовой структурамыд къуллухчиер ки.
Йыдкьыд мийманашис хваш-беш выъыдыла хъуъ, сахьусды заседание ачых ваъара гьалгыри райондид кьухьды Давуд Амаевич Сулейманов. Гьание гьыъыри ихтилатбыр, шыв гвалах мидыла хьуъ выгырди ва ваъара ади гъийгъад йыгъа Мыха1д райондид анититеррористический комиссиядире, шыв гьаъас джишир ади.
Кьуле джыгыр ад суалбыр вахтинди ана бегьем гьаъ хьури райондид кьухьние ягъмиш дишир ад юлдашешде ва гьа гвалах выгыр йыгад къуллухчийшде.
«Сахьусды, ху1рметли юлдашер, еве хыл хыле выр, сыт1а гьыъыр йыгара гвалахбыр джигьилешды арыди, мехьтебырма ад хынимешды арыди гьаса, ала лаъ диъид ихьды веледбыр дюзды рыкъа1 дуруъусна. Са зада, я са комиссиедида гьа гвалахбыр арыди гыргас йикисдиш, гьа гвалах сиене джама1хтире выгыр йыгад виъи. Сахьусды кьул, магьа1лимеше, имамаше, сельсоветмыра, депутаташе ва дидабаше, нинабаше»,- гьухьур Давуд Сулейманова.
Ала йыдкьыр ад мийманашис 2015-2016 сыдырма выгыр ад райондид антитеррористический гвалах бегемиш вишир. Гьа рухьуд ихтилат диш, ихьды сиене йыха йиъи хьур — ихьды районди анидиъи 15 инсан нагьакьды, лазимсызды рыкъа1 ад, гьабыр анидиъи ихьды силовой структурамыд учета.
Гьасад инсанашды яц1 лаъ джишин бадана, йыгьа-выше гвалах выъыр йыгара, гьухьури сыт1а дишир ад инсанаше.
Гьади уфтанна гьалгыри райондид прокурор Рафик Гаджикеримов. «Балад гвалахбыр замха1т ц1ам выгадбыр йиъи, ама е гьамыхьде хы1в гивирхьердиш. Зы шума иди мехьтебырма йыхьыри. За гьади фагьам гьыъыри изолента гъадишды шунурбыр, гъаъ суруу адишды лампочка, кьат йишир ад заборбыр, ва мадды гьасад к1аъды кьуле джыгыр ад гвалахбыр. Гьамыс я бала манут выгардиш, я вахт, гьа гвалахбыр раха1тене гьаъас йикисдыбыр йиъи, амани гьаъардиш»,- гьухьур гьание.
Хынимешды безопасностед не досугад суалмыс балана убыр йыхы1р йыгара хьур гьухьури мадды гьади далгыд юлдашеше ки.
Генеки гьа заседаниеди далгыри районди кьухьнийды заместитель Насир Раджабов, и.о. полициедид кьухьды Альберт Сурхаев, райондид кылевыъынид кьухьды Ферман Ахмедбеков ва мадды юлдашер.
Гьадыхьван сыт1а бегьем вишир заседаниедид гвалах.
А. Ибрагимов
