САИД ГУСЕЙНОВ ШАИРЕД ЦIИНДЫ ШИЪИРБЫР

ХуIрметли газет кьыле гьаъад юлдашер!
ГьаадхыIд газета йе гьухьур ай, ми газетала хъуъ лийис, хьур, цIинды шиъирбыр ихьды Хьичады мыхаIбишды шаиред Саид Гусейновад. Гъийгъа йе лахара каIчIур гьанийды эскерешиклады шиъирбыр, йисхьурди бегеде виъи гъалиб дишинид йыгъад байрам, ва ми газет гьазыр гьаъади, йыбкьыр ай хабар, ихьды Хъылдады СВО-ди йикьид йигитес выр а хьур Герой Россиедид хаIдий. Гьадис гюре, шаир Саиде кихьид йиъи кьваIдхьусды шиъир «Фалфанад йигит».

ИХЬДЫ ЭСКЕР ГЬАIЗИЗДЫ

ДаIгьви виъи са руIх калды
Ывъыд джуду лата,
Йыхды, писды вурухаIре…
Малайикмар,
Эскер, выды гъуняа йиший,
ЦIид ялавма вы уIхуIре.

ХаIлмаа йыдкьыд алпандид цIид,
Джилы сипIид хьура лыкьнад,
Дурум выъыр быш йиширдиш,
ГичI выъырдиш себеб мыкьлад.

Вы руъур а даIгьвиди,
Ул ки, хыл ки
Вахда йиший каабедид,
Заалым даIгьве.
СигIыд хал диш мыкьды йыгъа,
ГаIчIус бабад кавалахьде,
Мимкин гирхьун даIгьвиди вы
Писды харад завалахьде.

ГьаIзиз эскер!
Вы руъур а даIгьвиди,
УIвухуIс, хьур, хизан, ватан,
Хыл ки леIшур джандыыла,
Къат-къат йишир як на эбир,
Руъус нинды кандыыла.

Вы ихтибар, умуд ихьды…
Луза, эскер, хьура джиндид,
Са бан,йилдан, титан ка,
ИйтIе джиндид улабырма,
ЧIиркIыд къаратин ка.

Вы руъур а, гьIзиз эскер,
Ялавмыд на тIирфанмыд,
Гуьллемыд на яманмыд,
Хьур лузас душманад,
УвухаIс хьур азадвалды
Бабыймашды маканмыд.

Вы руъур а даIгьвиди,
Мисал левуш, ва дарс леш
Гьунармыыла дидабашды,
Къейд гьыъыр ад ирдыдыхьван
ХаIр таарихед китабахьде.

Деръямыла, дангызмыла
Мидиъ диъи
Ихьды девлет накьв выгадбыр,
Ихьдыбише джваIр детир хьур,
Гьамыъ едаа гьакь йыгабыр.

Вы руъур а даIгьвиди,
МыкI выс мылвыцI дидабашды,
Ихьды ягълыд накьумыс,
Садугъ гьабыр – гьаIясызды
Гитлер сукьуд кьвакьумы.

Зур гъихь, цIай йыIх гьабишды
Бармакмыс на пайдахмыс,
Асар виший, утанмазар,
Гьыъыд угъраш гвалахмыс.

2
Улабыр ки, убрабыр ки,
ЙикI ки ваIхде хъу, эскерер,
Душманашды саъ майитмы
Лак на, тIанкь не, ту, эскерер.
Амаругъ ва мыгьыра гьад,
Хаавгъ дериди деринды.
Чакькьалашис, къаргъыймашис,
Ем йикеси ширинды,
Хьели хъикьа вы ниныхда,
ЙикI хъишир секинды.

Вы руъур а, гьаIзиз эскер,
Мимкин виъи,
Деръямыхьде кирхьун ки,
Юхурмыхьде гирхьун ки.
Шыв гьыъый йе? ДаIгьви виъи,
Быгаады йыгъ мааIлим диш,
Душманахьван угъраш и гьад,
Къан лехаIшур, заалым йиш.

Эджел ваIгъаIр йыркьыд ягъи
Ихьды багьад накьумы,
Луза хьура чIибкIыд ма1хв ка
Луркьур хагъв гьад йисды паIхв ка.
ЯгъиваIлис дживаб вий ва,
Хъиджикьасна яхда маа
Аъ ватандид ригиила,
ДжуIгъуIсды джвус йикIиыла
Дживаб вий ва лейихды
Маа абгасды тарихди!

3
Умуд нинды, бабад, эскер,
Вы руъур а, зурбад эскер,
УIлим не савашед
Лаварсар ад даIгьвиди.
Пай гьаъара эскерешис
ЧIидкIыд чIыкбыр
Нинды хылид лавашед,
ЙикI гъадыла Ватанды,
Ватан хъывгад инсынды
Вы руъур а даIгьвиди…
Вы руъур а даIгьвиди
Намыс, гъийрат уIхваIр а,
Тахсир, гунагь кидишды
Выды нинды наIкьвуды
Йыркьыдыла залым душман,
Лавашес ки гидишды.

Ялав сапхъаI, юхбыр луза
Хъыъыр хъикьа халыхда.
Вы хъиркьыр, хьур,
Гуьней, къузай бычIид йикис,
НаIгьни йыкьас гIалыхда.
Садакьабыр пай гьаъара,
АгъаIлиес хьура лирхьуд,
АIхъаIвхьвасдиш бахт нинды,
МуIкъуIд кьухьды маIхлиди
Бахт абишды яцIа ирхьур.

4
Ихьды эскер – ихьды панагь,
Вы руъур а даIгьвиди…
ГичI выъыр ва, ыIхыIхьна вы
Окопырма, фарыма,
Душманад хыл выкьаси ваа
Уула, аала, барымаа.
Хьура гьирхьур векIегь йиш…
Йигитала душманас ки,
Гуьллидис ки гичIере.
Йигитешис векIегьды
ДаIгьви муIтIуIгъ вичIере.

Нинабашды нагьв на хъаIл
Душманашы сагъур хъикьа,
Бабара ка лаIгьнет, гьайиб
Душманашы лагъур хъикьа.
Душманад хаш, бармак, пайдах
МыкIмыхьде ва хагъур хъикьа,
Ва гьабишды фенд не фитне
Джухьды кафна агъур хъикьа.
Ватандис джан выбишды
Сырымы нагъв сувгъур хъикьа.
Лышынды кид
Тыфанг хыле быш мываъ
Душманахда мабад гьуIмир,
Мабад гьуIмир хуш мываъ.

5
Ихьды далы – ихьды эскер!
ДаIгьви эккед, даIгьви писды,
Гуьлле вугъад саваш виъи,
Вы савашед сагьиб йиш,
Аджыгъ ана гъалиб йиш.
ГичIенийды вы тай маIгъв,
Къаст, ният ки яваш ид.

РыкъыI ул гъад, йикIыы хыл гъад,
Ниныхда вы сагъна хъикьа, сагъна хъикьа.
Миди вы лап герек и,
Сываа гьухуд эркек и.

Дама нахчир,
Сываа марал гъабгый, хьур,
Хуюма кьир, лаха цIай,
ХаIле виригъ абгый хьур.
Айвана ки сус на хыдле гъадгый, хьур,
Руъур а вы даIгьвиди,
УIвуIхвес, хьур, диде гивхьид
МаIгькам бине тевлидид.

Амыкла лап бытIрадбыр
Садакьабыр, тIаратIбыр
Йе йихер а зияратмы,
Ихьды солдат,
Вы нинихда хъаргый, хьур.
Инсан джигад душман къумаа
Лаш-лаш йишир гъаргый, хьур.
Иншааллагь.

Фалфанад йигит
Изды дуст йишид, Хъылдады Магамеджанов Камилды йигит йишид дух, полковник Магьа1мед-Алис бахш гьаъара ми шиъир.

Кьухьды Фалфан деридид
Турамиш вы йишид бэIлмаа
Мерд йигитне хъыхьыри вы…
ХаIдий вишир хъикьас хаIлма.

Юзиагъна къадам лихьир
Ахиратад сурухда,
Гьаюф, шууна йихес йе вы
КъаIн мычIахъды сырыхда?

Ягъиере кьатI выъыр раIхъ…
Гуьллидыда, капырада,
Йекла кьатI вы йичIесдиш.
Выды хьаIле ивесдиш аIхъ,
Ихьды тайфа
Улуьмаала гичIед диш.

ЙикIис хъыгад выды къамат,
Йигитвалы йе гьаламат.
Накьвумыхьде руъусдиш вы,
Мара ехьван сагъ-саламат.

Йе вас панагь гьаIр сурухъла…
Выды зурбад дурухда
Зурбад гьуьмбет сихьис йе,
Дур наIгьнима кихьис йе.

Йигитвалды шаксызды,
Кьул саъ джившид душманас,
Пайгъампарас ухшер ад,
Йишид элдид къаншара.

Йыхды нинды дагъди гьухуд
Дух ихьды на фалфандид
Шууна ихьир ваI, инсанар,
Мисед йигит кафана?

Джуду и хьур кьин гьаъар а
ГьаIр са шура, ришире,
Халкь бадана джан серф гьыъыд
Ес чешнене дарс йишири.

Ваа хыл выгыд са душман ки
Сатасдиш, шу, йе сагъна.
Некьикла ки вы гьаргвар ес
Теккеды гъад чирагъ на.
(Текке — хъылдабишды Зиярат и)

Хъылдабишды кьулуу эккед
Даим выды ва нур сатыр,
Гьеч йикIыыла уджурхасды
Тарихма ки дур сатыр.

Са нинды ваъ, са дидды ваъ,
Сиъинбишды дух йишир а
Сыр ки выды БычIид йишир,
Быч1ымыхла тух джишир а.

Икрам вас и, вас и икрам,
Ситхьур сиъин кьвакьумыы.
Шукур Аллагь, мисед Йигит
Выд Самурад накьвумыс!

Б. МЫХАIДЫ