Тирджед ха1фтидид улджумад йыгъа Дагъыстандид Правительствадид Седри Абдулмуслим Абдулмуслимов йыхьыр ай Казбековский районди. Еринды лийкьыйне гьа йыхьыр ай Дылым мукъа1 ешемишды Аминат Абужанатовад хала. Гьанийды иесси ки — Айгуп Абужанатов, ва дух ки — Имам-Паша Абужанатов СВО-ди дыркьыр адбыр диъи.
Республикадид Премьер-министре Аминат Абужанатова ва гьанийды сиене хизынды ч1ел-гафбыр гъыъыри ва дыркьыр ад Йигитешихда ра1хмет сивыгыри. Абдулмуслим Абдулмуслимова гьухьури, выдж кьуле гине сиене лазимды суалмыд дерде дикиси, хьур.
Аминат Абужанатовада гьание гьухьури: «Зас гьац1ара, выды выг1лид не духарды йигитва1лид дур мысга таарихе адгасды, ва гьабишы сиене Россиядид миллитдид сагъул гъани виъи».
Джуду сураа Абдулмуслим Абдулмуслимова выри тангымыд куьмег.
Аминат Абужанатовара гьыъыри эккед сагъулбыр Абдулмуслим Абдулмуслимовас джуды хизындис хыл-худ йывхы1ри, хьур ва балад саламбыр хъывыри Дагъыстандид кьухьды Сергей Меликовыс рыдж джетинва1ле сарыртардиш, хьур, ха1ммыше лазим йиъид куьмегбыр гьаъара, хьур.
Генеки Аминат Абужанатовара сагъул-варулбыр гьыъыри Дагъыстандид кьухьдыбишис Казбековский районди темизды рагъад хьед йыгыри, хьур. «Гьа хьед ми са1гьа1тди 33 гьагъзыр инсындире рагъара а. Хьед йидкьыр а хьур, йе сиене балана шад-гуямиш диъи, эккед сагъул рухьура за сиене ихьды джама1хтид сураа», — гьухьури Аминат Абужанатовара.
Гьадыла саваенди Аминат Расуловнад к1аъдыбыйды духара Зулумхана ки иштрак гьаъара ани йиъи специальный военный операцияди.
Амината джу хыва1 лешур кьуле гыргара ани йиъи «В гостях у семьи героя»-хьур дур гъад проект. Гьади гьание кирхьере а эскерешды ешайишмыкла ва гьабишды нинабашикла, ришиймашикла, хизынмыкла, гьис хьурди сахьусды бала дерди-хаджалат ад араа гьабишды хизындис йиъи.
Зарема Исрафилова