Гьатхы1д гьа1фтиди Мыха1 райадминистрациедид актовый зала вишир ай май вазырды Административный Советед (АС) иджлас.
Гьа выгыр ай МР «Рутульский район»-дид Кьухьды Ибрагим Ибрагимова.
Гьади гене ки иштрак гьыъыр ай райондид административный советек кидбише ва мадды сиене райондид идарамыд кухьдыбише, мехьтебырмыд директораше, му1къмыд сельсоветеше, депутаташе ва маддыбише.
АС-тед заседаниеди хьуъ гехьетир агъмиш гьыъыр ай хьуланды суалбыр:
1. Шыв услахьван гыргара ади районди гьазырвалдыбыр гьу1киметед экзаменбыр (ОГЭ ва ЕГЭ ) мистед сыда дюзгинне арыди-джаргыди йыгын бадана ва шыв ц1инвалдыбыр ади гьади;
2. «Сельсовет Амсарский» муниципалитетед кьухьныйды отчет 2016-ды сыда гьыъыд гвалахмыд ва гьанийды 2017 сыда выгыргара ад ва выгыргасы гвалахмыд планбыр;
3. Райондид администрациедид ва сельсоветмыд иформациедид ва информационный технологиямыд сферадид суалбыр;
4. Маддыбыр.
Хьурагине гьалгыри районид кьухьды И. Ибрагимов. Гьание выри иштракчийшис салам ва агьмиш гьыъыри сасад лазимды организационный суалбыр.
Гьанийыла хъуъ повесткадид сахьусды суалад сура эккед доклад гьыъыр гьалгыри райондид кьылебырмыд Управлениедид начальник Рамазан Афраимов. Гьание миди адбишис гьац1ара гьыъыри сиене районди йыгыд, гьаъара ад ва гьаъасды гвалахбыр гьу1къимет сахьусды меселе — ОГЭ ва ЕГЭ хъывын бадана.
Р. Афраимовад ч1елмыхьван, районди сиене суруулад суалбыр лазим йиъид кал гьа1зыр йиъи гьа гвалахбыр кьуле гыргас хьур. Гьадыла хъуъ гьание хъывыри дживабыр сиене миди джус выд суалмыс.
Сахьусды суалад бадана далгыри генеки райондид кьухьды ва районди экзаменбыр хъывысды пунктад сиене джавабкарар. Са ч1илыхьван, Мыха1д районди сиене карбыр ягъа1д кал гьазыр йиъи гьу1киметед экзаменбыр хъывыс.
2-ды суалад сура гьалгыри СП «Сельсовет Амсарский» муниципалитетед кьухьды Суракат Курбанов.
Миние кьыле гьыъыри отчет, шыв гвалахбыр гьаъарди Амсар ва Кала му1къма илсанашды яшайиш йыха йишин бадана. Гьади налогмыд, ер-йуртмыд актуализация гьаъадид, алверчиер ачута ледшус чалыш диъидид, джамаха1тдис хьед йыгадид, вахбыр усла хъыгыр, ва мадды месэлебыр. Гьа отчетад сура далгыр ай гьа му1къма ад къуллухчиер, райондид прокурор, райондид кьухьды, статуправлениедид кьухьды ва маддыбыр.
Гьади арыди йыгыд ва йыгыр лазим йиъид гвалахмыкла генеки далгыри мадды юлдашер ки.
3-ды суалад сураа лалгыри Мыха1д райадминистрациедид информациедид суалмыд ведущий къуллухчи Мадина Махсубова.
Гьание лап балана критиковать гьыъыри райондид сельсоветмыд администрациедид ва мадды идарамыд гвалахбыр информационный технологиемыд сураа. Гьание гьухьури — 131-ды Федеральный Закондире ягьа1ре а сиене гьаъад гвалахбыр джуды сайтма лихьаъ хьур, джамаха1тдис гьац1ый ва гьагуй хьур, аммани гъийгъа са сайтере гьа гвалах ваъара адиш.
Гене ки гьа суалад сура далгыр ай балад кьухьдыбыр, райондид прокурор ки кине. Гьадыла сиене сельсоветешис ва маддыбишис хъывыр а миди вахт 1-ды июла йыкьамаъ сиене таликьды идарама сайтмыра гвалах выъын бадана.
Миди, ми сиене гьухьуд суалмыд отчетмыс джуды сурады мнениебыр ва замечаниебыр вылц1ара, гьалгыри райондид прокурор Рафик Гаджикеримов. Гьание гьухьури — сиене кьухьдыбише закондире ягъа1д кал гьыъыр йыгара джуды гвалахбыр ва гьабыр сайтмаа инсанашис гьагур йыгара, гьаса джишийне гьадихда закондид санкциебыр ад йиъи.
Административный Советед иджлас бегьем ваъара, гьалгыри райондид кьухьды Ибрагим Ибрагимов. Гьание требовать гыъыри сиене кьухьдыбишда джуьхьды гвалахбыр, сиене суруулад дисциплинабыр лаъ хъаъ, йыха хъаъ хьур. Гьаса джишийне, гьухьури гьание, административный ва мадды гьакьбыр эгъет1ес хьури гвалахбыр кьуле джыгадбишды бадана.
Райондид административный Советере выри гьа йыгъа агъмиш гьыъыд суалмыс кьимет.
Хьели МР «Рутульский район»-дид кьухьды Ибрагим Ибрагимова выри Благодарственный письмабыр районди «Шыв гьа1л и, къумши?» ва Гъалибдишид Йыгъад байрамбыр гыргади йыхана иштрак гьыъыд, къуллухчиешис. Гьабишик кини йиъий ихьды редакциедид работник Саид Сулейманов ки.
Къинады САИД
