Мыха1бишды ч1илды суалбыр агъмиш гьыъыр Круглый стола

DSC_36698 декабрес 2016 сыда Дагъыстанад ху1киметед магьа1лимешды университетед конференц-зала выгыр ай Круглый стол хьуланды темадикла «Современные проблемы сохранения и развития рутульского языка»
Гьа Круглый столад гвалаха иштрак гьыъыр ай языковедеше, министерствамыд, ведомствамыд ва гьы1лимдид сообществадид къуллухчийше — ч1илды, литературадид ва искусствадид институдады ДНЦ РАНад, Дагъыстанад А. Тахо-Годид дур гъад педагогикадид научно-исследовательский Институтады, мыха1бишды шаиреше, нинды ч1илды институтма ад, мехьтебырма ад магьа1лимеше, халкьмыд организациемыд представителеше ва журналистеше.
Круглый столад организаторар диъий: «Дагъыстанад ху1киметед магьа1лимешды университет, Дагъыстан Республикадид Халкьдид палата, МР «Рутульский район».
Круглый столад гвалах беслемиш вишир мыха1бишды шаирешды шиъирмыхьван, кьыле гьыъыд нинды ч1илыла магьа1лимешды университете кьыле ваъад студент-ришбише. Гьа мероприятиедид модератор йиъий Казибеков Вагаб Галдиевич — член РД-над Халькьдид палатадид. Гьание хош-беш выъыдыла хъуъ иштракчийшис, сахьусды ч1ел выр Абдулаев Магомед Имрановичде — ректор ДГПУ, доктор юридических наук.
20161208_112844Магомед Имрановиче бала лазимдына, йыхдына хывкьыр ми мероприятие. Сиене Дагъыстана ад нинды ч1елмыд суалбыр агъмиш гьаъасды йиъи хьур джуьхьды университете гъийгъад калды Круглый стол выгыргара. Сахьусды гъийгъа агъмиш ваъара а мыха1бишды нинды ч1ел. Гьа ч1ел лаъ-хьуъ выгын бадана университете аниъи сиене гьакьасабыр — нинды ч1илды магьа1лимер, факультет. Гьазыр диъи хьур университетед кьухьдыбыр ачых ваъас мыха1бишды ч1илды кафедра ки, гьадыла джва1р гюзет даъара райондады мехьтеб лабт1убыр джуьхьды факультете ква1ч1ус хьур.
Эккед кьимет выдыла хъуъ ми выгыргара ад гвалахас, Дагъыстанад национальный политикадид министр Татьяна Гамалее гьухьур, Российский Федерациедид ху1киметед национальный политикадид Стратегие российский халкь гъигъе выъын, инсанашды савалды вишиныла саваенды виъи увуху1н ха1р са кьаъда Россияди ад нацие ки.
20161208_123304«Ч1ел — диб йиъи этнокультурный кодад. Гьад адгын бадана, лаъ-хьуъ йишин бадана балана герек руъура наука ки, гьа ч1ел мехьтебырма ха1р выъын ки ва джат1уд ч1илды яшайиш ки : литература лаъ гьыъын, нинды ч1илылады ки ва мадды ч1илы ругъа гьыъыр ад ки…», — гьухьур гьание.
Т. Гамалейды ч1илмыхьван, дагъыстанабишды ч1илмыд суалбыр мысга агъмиш гьаъара ад йиъи Дагъыстанад национальный политикадид министерствади, гьамыс балад убур рыхы1ре а хьур.
Ч1илды, литературадид ва искусствадид Г. Цадасад дур гъад ДНЦ РАНад институтад директор Магомед Ибрагимова таныш дыъыр ягъмишдишибыр институтара йыгыр ад исследованиемыхьван – 92% Махачкалдид мехьтебырмыд хынимешис вац1ардиш нинды ч1ел, яки ц1амна вац1ара а. М. Ибрагимовад ч1илмыхьван, Дагъыстана нинды ч1илмыд гьакьасаб бетер йиъи мадды регионмыхда гадкьыйне, гьасад гьакьасаб бегемиш диш гьа1лимешис ки гъийгъа.
Дагъыстанад педагогикадид А. А. Тахо-Годид дур гъад научно-исследовательский институтат директор Гамидуллах Магомедова мисед хабар выъыр круглый столад иштракчийшис, яни 1991 сыда ДНИИП-ра гьыъыр ай мыха1д ч1илды письменность мухадский диалектахьван, методикадид база ки гьазыр выъыр. Аммани мехьтебед нинды ч1илды китабыр агъахад мыха1д илсанар ц1ам диъи.
20161208_123246Гьа1лимед ч1илмыхьван, гьамыъкал сасадбише ялгъынмиш дуруъура дюзгинва1лиы литературный ч1илды кет1ир ад диалекта, чалыш диъи игъийис мехьтебед китабыр мадды диалектмыла. Гьасад гвалахмыра мышат вылц1ара Дагъыстанад ц1инды письменностед ч1елбыр лаъ-хьуъ гьаъас.
2008 сыда Дагъыстанад гьа1лимешды чалышва1лихьван кьылевыъынид Закона 5 статьяди гьыъыр ай дегишвалдыбыр дарсбыр мехьтебырма нинды чи1лыла йыгын бадана.
Г. Магомедова гьухьур, 3 сен йиъи нинды ч1илылад мехьтебед китабыр игъджиере ад — себеб Москвадид экспертиза багьа виъидыла.
Мыха1д мехьтебед директор Я. Таибова агъмиш гьыъыр суалбыр, мыха1д ч1илис таликьды — мехьтебырма гъийкьыд нинды ч1илды китаб адиш, гьазыр дыъыд магьа1лимер адиш хьур ва маддыбыр.
Гьади генеки мыха1д ч1илды суалбыр агъмиш гьаъара далгыри: Интизар Мамутаева – халкьдид деятель, Алисултан Алисултанов — дур-ун ад гьа1лим, Шафи Ибрагимов — мыхабишды шаир, Саид Сулейманов — Къинады шаир, Махач Вердиев-журналист, Неби Муфараджев – меценат ва маддыбыр.
Генеки гьасад Круглый стол выгыргас йыгара а Мыха1д сахьусды мехьтебе декабыред ахирес.
Педуниверситетед ректор Магомед Абдулаева Круглый столад иштракчийшис кьыле выъыр ай Азербайджанда сивыгыр ад ягъмиш дишибишды ва ректорад джуду дуруу ихьды мыха1бишды меценат Эфенди Исмиевды телеграмма. Гьади мисе киниъий:
Уважакмый Магомед Имранович!
Уважаемые друзья!
Сердечно приветствую участников и гостей форума от имени рутульцев Азербайджана и от себя лично.
В повестке дня — актуальные и востребованные временем вопросы сохранения и развития родного языка.
Благодаря широкому представительству и обсужднию проблем работа Круглого стола окажется успешной и внесет весомый вклад в развитие рутульского языка и культуры.
Искренне желаю Вам плодотворных дискуссий и всего самого доброго!
С уважением, Э. Исмиев

Б. МЫХА1ДЫ