Выдж гьасад виъи МыхаIд
Гьа1ммише джу у йиз гъад бан,
Йок, нур кагъур ад Ц1ийлахъан.
Шагар, шербет Лалаъан — гьа1р са дердед дарман,
Выдж дурус кьурбан Мыха1д.
Ч1елбыр вахда рухьура ад,
Маха1ммедис арзума ад.
Гъара а-у банбыр гъад, банымыд арыди ад,
Виъий кьухьды дур гъад Мыха1д.
Гьеч гиджийкьыр къадри джившир,
К1аълады выдж экке йишир.
Гид джигида сип1ес дживч1ир,
Выды бын и йилдан, Мыха1д.
Хьедбыр, гьавабыр серинды,
Былахбыр мыкьды, серинды.
Джва1р сиене гьабишды, мыха1дыбышды,
Джандымыс вы хушды Мыха1д.
Кирхьид, рухьуд и Маха1ммед,
Выдж Мыха1 гьухуд йиъи гьелбет.
Мыха1д са кьухьды девлет, эккед бахт, берекет,
Виъи ихьды дженнет Мыха1д.
Е халкьдид, гьа ер ихьды,
Джу гъад дурус лап лейихды.
Адиш гьеч ма дуьнйады ма гьилине выкалды,
Вы лап къалакалды Мыха1д.
ЙикIиы гъадиш
Майданбыр а джва1р шилва1лид хыли лиед,
Быч1 ла1гъу1ре гьа1р джуредид ил иед.
Сафды темизды гьавымыд ил этиред,
Амма джус барабарды ма гьилига ер мисед.
Эккед район, джва1р сиенебыр мыха1быр,
Гьа1р мукъу1де ха джу1хьды къайде , гьадатбыр.
Гьа быныда ерли халкь виъи мыха1дыбыр,
Ад сиене миллетбыр диъи Мыха1дид абыр.
Йикьидана джус гьац1ара на ми ч1елбыр кихьир йиъид,
Алфавитбыр игъитхьусма ки йиъий гьа выдж кирхьид.
Хабар адиш гьеми а выдж эджел хъуд,
Бес гьанийды гьили а йидж джахьвабыр диъид, сихьид.
Гьанийихда йидж гьасад джухда мыкьды йик1 айдин,
Рухьуд, кирхьид джва1р ч1илмыхда гедыркьарайдин.
Мыха1нийды ч1илды къадри вац1арайдин,
К1ыб гьац1асий, выдж ашгара к1ыб йикисий.
Дериди ад гьа хьидмыд сес,
Амма дере мааки серес.
Дыхьыр а аъ сайирес дериди мезе беъэс.
Вы халисды меркез Мыха1д.
МыхаIдыбыр
Джва1р Мыха1 ад мыха1дыбыр,
Ва1 йик1ид сир урху1быр.
Гьадыла рухьура ва1хда,
Диъи ва1 йик1идадыбыр.
Балад му1къбыр а яхда,
Амма Мыха1д бала хъывгад.
Гьабыр са сынды лихьийнеки,
Викисдиш мыха1дыла багьад.
Мыха1дыбыр бала идды,
Шагар, ширин ч1илыла далгад.
Гьа са эккед бахт выдж ихьды,
Гьабышде джва1ршде выр ад.
Мыха1нийды ч1ел ваъабыр,
Гьа ч1илыла далгабыр.
Дикисдиш гьабишила гъа1ри,
Ари йик1идады мыха1дыбыр.
Джан мыха1дид шагар, ширин,
Ва1 гьа накьудид ерлиер.
Валлагь, тек са ва1 диъи,
Ермыд сывымыд иессиер.
Йик1идады мыха1дыбыр,
Диъи тек ру1х гьаъасдыбыр.
Ма гьилине гьеч гьасабыр,
Дикисдиш джва1ршик кидикабыр.
Ч1елбыр кихьид выдж Мыха1ды,
Гьамыхда нетидже ана.
Мыха1дид дур йик1иы урха1д,
Гьа1ммише ари йик1е ана.
Бахтыварахда
Ширинне лалга, гьей бахтывар,
Дикисды маъ мысна бизар,
Гьа1ммише гьаъ ва йыхды кар,
Гьа гьилига хьури хъикьаси,
Выды уьлихьде лухъузаси.
Хывкьасды маъ ва кьухьвалды,
Гьалысна мываъ ва писвалды,
Ваъ йыхвалды, лалгын дуьзды,
Йикихь выды йик1 темизды.
Гьа1ммише хьесым ачыхана,
Яхъ гьаъара ва шадана,
Гадкъабишис кийхьур тямагь,
Гьаргуй вы мааки уфтанна,
Адыхъаъ ки лап балана рикихь мааки артухана.
Кихьид г1илмыд вы бахтывар
Риш вы рази, мару1гъ бизар
Гьеч адиший гьидиклана хабар
Са инсан йиъи выдж бейхабар
Гьац1ыр кьуле йыгыри ми кар.
Дуьнйадид гьакь
Гьей хыди, гьа1зиз хыди,
Йыхды кар мысга йыхды и.
Гьеч Маха1ммед бат1ил маъ,
Мысга дюзне рухьуд и.
Вахт виъи, девран виъи,
Гьу1мир вылц1ад са виъи.
Мидиъ йидкьыр хъу1дире,
Тиниъ табата йиъи.
Яраб вас хабар амыйхь,
Гьили адихь, шыв гьаъардихь.
Шыв рухьурдихь, джус ун амыйхь,
Шудаъ йик1ис хъыгардихь.
Ма гьемен гьа выдж йиъи,
Дегиш-дуьгуьш йишид адиш.
Гьадийкьама джан кьурбан,
Йыхьыдыла хъуъ гьахъагвад диш.
Телесых ма1гъв, сабыр ваъ,
Аллагьахьде зыкыр гьаъ.
Гьа гьанийды гьакь йиъи,
Кьадар кьиймет джуда ха.
Гьа вахт йибкьыр тина мидиъ,
Гьалдана сашун йич1ид диш,
Амма дуьнйадыла тиниъ
Гьалнаки сашун йихид диш.
Рухьура вада, вы гьей инсан,
Ма1гъв вы сефил, перишан.
Гьа1лимдис вац1ыр йыгара
Ми дуьнйа адид гьакь диван.
ЙикI секин диш
Вас пай выр а, ари выды джанда а,
Не язычи диш, не къусучи диш, не джерра1гь.
Диндж руъудиш йик1, гьа1ммише гьа1зыбди а,
Кьабыл джыъыр а, кевлиндис гьеч диш селегь.
Йыхды, кьухьды устарар ки йидкьыр гьаадхы1ри.
Амма зы ки изды ч1илмыд устар и.
Джуьхьды дурбыр-унбыр сатыр хъаа1тхы1ри.
Маха1ммеде ми вес ваъад хабар виъи.
Шудаъ четин йиширде ки, четин и хьур гьухьусдиш,
Не гьалыхдана миннет выъыд диш, не ваъасдиш.
Не нефс гъалиб, не ки тама1гь артух гьыъыддиш.
Ламысдире гьеч кабгъурдиш, кьабыл гьаъардиш.
Маха1ммед, гьа выдж йиъи са фагъир, етим.
Ари джанда а балад дердбыр, джва1р дерин.
Къатриди а йик1, гьеч руъурдиш йидж секин.
Гьис идеки, гьидыла иди, елли гьац1ардиш.
Зас некьихьде гьаIян гьыъыр
Зы сахыр ана некьихьде гьагури,
Изды хъыгад йик1 гьеч хъахъджат1ур сукьур.
Ц1иял йишир, Мыха1д йик1иы либхьури.
Ахъа1бч1ура зы рыкъа1 Мыха1 хъу1гъу1с хьур.
Гьа1замды вахтбыр йиъий Мыха1 хъыджыхьыд,
Аъ ихьди ермыд, сывымыд тамаше джыъыд.
Лап сусатмиш йиъий джуды хьидыхда,
Ширин, шербет Лалаъанад дад джывыъыд.
Гьис гьадухъун балана выдж хъывгардихь?
Гьа1ммише Мыха1 ана йик1ис йигарай.
Сиъин дарманмыд дарман, джан Мыха1д.
Яраб зы гьухуд дженнет вы виъимихь.
Зы выды дух йиъи, вы ки изды нин.
За улаб лаъ лийид нагъв са гьу1мир ширин.
Джан зы гьухуд изды вы дагъма Мыха1д.
Дуьнйа ки вы виъи, аахир ки вы йикьин.
Ч1елбыр рухьуд вахда Маха1ммед выдж йиъи.
Мыха1д изды дамах на зы гуджли йиъи.
Выды дур йик1иы уху1н изды бырдж йиъи.
Мыха1бышды йик1ида вы местан Мыха1д
Валлагь, юкьсур выды бан йиъи.
Вы гъад ер-бына тамам са йилдан йиъи.
Гьади ешемишды бирдан мыха1дыбыр диъи.
Гьадыла и рухьуд, вы ихьды ватан Мыха1д.
Магомед Улилеев
