Шиъирбыр, наIгьнибыр, теснифбыр, газелбыр, рубаибыр, бейтибыр

Кьа1сва1лид джигьилвалды

Валлагь, дустар, ашгара ваъаси ва1с,
Захда сувчуд кьа1сва1лид джигьилвалды,
Мигьман вишир а зас кьа1сва1лид йа1ква1с,
Са ухьданды кьа1сва1лид джигьилвалды.

Джыъыд, ла1джа1ч1убыр хъаъас йыгара,
Шукур, джендик йах1 кимабад гьац1ара,
Кьа1сва1лид хъа1лес йургъыя гъамара,
Умуд ки вак, кьа1сва1лид джигьилвалды.

Якьин, джигьилвалды виъий къизмишды,
Аман адиший зас хылаа ришбишды,
Гъамара хьва зы яц1аа луьтийишды,
Баракалла, кьа1сва1лид джигьилвалды.

Ит кине, дад кине ширин дуьнйадик,
Лезет кимабана улабад нурдик,
Умуд кине хыдылашды архыдик,
Сумувуруг, ка1сва1лид джигьилвалды.

Йикьиси хьур гич1ердиш, вас гич1 мываъ,
Хъыргад, сагь и зы, ва заа нагъвбыр самаъ,
Сагьана изды дженде дердбыр амаъ,
Ми виъи тек кьа1сва1лид джигьилвалды.

Кьа1се гьыъыр, бат1 кал са куше хаагъур,
Хыле ла1пшуре вышед къабаа сагъур,
Са быт1рад улабас йыгьа гьахъджагур,
Гьамы мыйыг — кьа1сва1лид джигьилвалды.

Зы дуьнйады миннет кине йиркьыд диш,
Мусурман, зы, йыгъ йыкьа1хъуъ йишид диш,
Гьинчире выд пайдыла хъуъ лузуд диш,
Пайдидаа маъ, кьа1сва1лид джигьилвалды.

Салам, Дагъыстан,
Ватан изды1

Салам Дагьыстан, Ватан изды1
Сывымыд йыкьа1 хушбахт йиъи зы.
Ха1р йа1ква1с ширинды дур гьа мизь.
Салам, Дагьыстан, Ватан изды!

Ара хывхад:
Банымыйк ламыс кимада,
Шамилды дур йик1е мада,
Йигитеше салам вылц1ара,
Салам Дагьыстан, Ватан изды!

Х1ар выды мукъа1, х1ар са-са ч1ел а,
Накьра, суннабыр рыхы1ре мел а,
Сарха1тбыр уху1р, Ватан диндже а,
Йаша Дагьыстан, Ватан изды!

Ара хывхад:
Душманар накъвуды йидкьыр ана,
Гьелек йишири намерд сывада,
Йик1иы гьамада Бот1лих, Ц1умада,
Йаша Дагьыстан, Ватан изды!
Ара хывхад:

Дагъыстанди
(Гьашыкь Сакит. Азербайджанала тарджума гьыъыд автор йиъи.)

Сывад кьулы йиз гъамадай,
Зы хъиркьыйне Дагъыстанди,
Шамил гьац1ад ра1хъбыр мадай,
Аслан сывхыд Дагъыстанди.

Виргъид емиш-т1ымыл миди,
Къизил балугь — Каспий хьидик,
Гъырчешды ма1гьдан-къайиди,
Свалар ешед Дагъыстанди.

Нинды Ватан, юкь сур дере,
Хат1ылмыда хы1б езере,
Куьчери, хъиъид ешере,
Хала хъиркьыд, Дагъыстанди.

Интизар
(Дагъыстандид президентед кумагдар, нинды на хынхыд дердимыд бадана, Ихрек мукъа1ды Интизар ханым Мамутаевас, ватандид Орден почета вынис гуьре къурмиш, банкете гьухьуд тост).

Ц1ийлахъанад сукьур ана гирвыды,
Ха1ляды хабар йибкьыри- лалезар!
Хъавац1ыри зас ширинды сес выды,
Йирек мукъа1ды мийрибан, Интизар.

Базган сывахда вешед сары билбил,
Мыкьды былахмыла ла1шуд быч1ид ил,
Дженнет агьлы риъи вы ее сартыд нин,
Уьлкуьдид хинимешды нин, Интизар.

Эккед джываб гъад виъи выды къулух,
Нинабашис ра1хъ вий, удуху1с рыш, дух,
Сен сыдыла дур элдис йиъи артух,
Дагъыстандид лейихды рыш, Интизар.

Мыха1ды рыш, ливк1ур ад выды ха1дий,
Банымы у дааим ливк1ур выга1дий,
За1хметдис кьимет не орден выр ад и,
Орден мыхра лик1уд йигит, Интизар!

Йиз гьугъара а
(на1гьни)
Уула хумухдбыр хъидкьыр а,
Яр, вы суруда йиркьыр диш.
Вакла умудбыр кийтхьур а,
«Ий»,- рухьурдиш», “Ваъ»,- рухьурдиш.

Ара хывхад:
Хьыблихьван йиз гьугъара а,
Гыблихьван йиз гьугъара а,
Хъыргад, вы хабардар риш,
Изды йик1е гьугъара а.

Зас ва йик1иы гуьлег лихьир,
Яр, рыкьа,-хьуйне — йиркьыр диш.
Выды дурухда пир сивхьир —
Вы изды дуру йиркьыр диш.

Ара хывхад:
Дуьнйа сиъин гыблихьде ги,
Са ваа виргъид нур ситхьур а,
Джан бирян йишир ц1икде ги-
Са ра1хи1м вахда виширдиш.

Ара хывхад:
Мартахьван йиз гьугъара а,
Дердехьван йиз гьугъара а,
Сургас гич1ере вы рыкъа1,
Йик1 вахда лап гьурхьара а.

1.Хабардар диш (туьрк.)-бейхабарды, хабар адишды.
2. Бирян йшиин (туърк.)-гьутхьур, хаш-ка1ш йишин.

Саламат йиш,
банбыр, сывбыр
Саламат йиш, банбыр, сывбыр,
Дамбыр-хумухдид къизил гъад,
Гьугъал, выш-йо1кв йишир гьугъад,
Гихъийхьид, кьы1чид былахбыр.

Инсындид хьа1л укьук сувгуд,
Дамыд иесси — сирис гъад хъа1л,
Хьылеъэнес гьахъджабгуд ха1л,
Гъы1рчед шарак, гыблик кипхьуд.

Белки мимма зы маа хъу1гьу1д,
Сыва к1ат1ешихда хъацус,
Дусташды йыхвалды гьабцус,
Хъу1гъу1д арыди нагьв сувгъу1д.

Ха1ля виъид нац1урура,
Зада гьухьуси, — хвашгурди!
Хъиркьыр а,-хьур,- мукъа1 хыди,
Ац1аси хал яр-дустара.

Зы руъура — банбыр, сывбыр,
Дамбыр, хумухдид къизил гъад,
Дере, берекетдид ил ад,
Ц1инды кьирид, лидкьыд хьывбыр.

Са ки хумухдид даватбыр,
Былва1лихьван хьуъ геет1ир ад,
Наятбыр кьуле йыгыр ад,
Йик1иыла симий зы, банбыр!

Чугур
Зас кивхьир ад, гъивкьыд, гьаапхы1йне гъу1мир,
Ха1юхъ! Вы хадишне гъаапхы1ри, чугур,
Вырды хылаа хъапцуд йиъий зы, сукъур,
Выды ха1лмаады сес убра ад, чугур,
Банбыр еше гъаъара валгад, чугур.

Гьу1мирдид на1х диший зас вац1ыйне дад,
Чугур хала викихь ха1р мусурманад,
Гьадид сесере гьухъуси йик1е ад,
Йик1быр кирше гьаъара валгад, чугур,
Душманад хъу1ше валгара ад, чугур.

Джигьилешис вац1ардиш сесед лезет,
Вахьванды гьу1мир вишири зас дженнет,
Вы джавалгыд йыгъ руъурай зас хелвет,
Дынбыр ырхы1ди, ва быт1рад ришбишды,
Йик1 шад гъаъарай, садафбыр гъад, чугур.

Хыле луьвшур, шадды демаа выгыйне,
Гьуч1ды синиры тезенег йыгыйне,
Гыргырад сесбыр банымы са1ч1уйне,
Кьа1сдыбыр мук1ас гедере хад, чугур,
Гьашыкьада туй-маджлисди хад, чугур.

Шумуд диндирмиш гъыъыд йиъи алет,
Гьамыд ч1ел ха1р ваъара сивхъид за1хмет,
Гьац1ыри зас, выды сесек кий шербет,
Халычедид рангымы у гъад, чугур,
Сипхъур а вас ху1рмет капырад, чугур.

Ч1игъан, кларнет, пианино, гитара,
Шумды алетдид вац1ыри зас ара,
Халкъдид йик1 ла1шури туй, концерт ана,
Шафид хыле шадды йыгъа хад, чугур,
Дагулды нагъвбыр саъас вылц1ад, чугур.
1.Хелвет (туърк.)-выдж джухьван.текене аргын.
2. Диндирмиш (туърк.)-хъуъ кииръин, гъалга гьыъын.
3. Алет (туьрк.)-макьам рыхы1д ах1дадж. (муз.инструмент).

Шаир-гьашыкь Джамесеб
Хъыгад шаир гьухуд йыгъал сен йишид юбилеес…
Шаир, гьашыкь сывымыд абыр виъи,
Мыха1бишды абыр виъи, Джамесеб.
Мукъу1д, гимид берекет сабыр виъи.
Эсирдид виъи вы сабыр, Джамесеб.

Чапраа гъад халкьдихда йигит йишид и,
Куьр Раджаб калды шаирер дишид и,
Ха1р са кесиб выдж джус хан, шах йишид и,
Гьад халкьдид виъи вы абыр, Джамесеб.

Выды «Шала бармакада» хай дамах,
Илсан дарды йыгъа гьаъарай уях,
«Хьибды быч1ихда» ешере ай къуччах,
Вы халкьдид йиъий улабыр, Джамесеб.

Мыха1д ч1ел, йыгъ йо1кв гьаджагур виъий кьит,
«Месий» Ибрамды лампышк1а кал ивкьид,
Лезги, туьрк ч1илды былва1лик лап кивт1ид,
Ачых гьыъыд ч1илис ракбыр, Джамесеб.

Кремлидид сегьниди а1гъа1ч1уд и,
Ст1ал Суьлейманды дунди а1ч1уд и,
Вы, саз хана, — Изды халкь, — хьур, сукьуд и,
Халкьдид йиъи выды гафбыр, Джамесеб.

Вас гич1 мываъ, выды рыкъа1 Сакитды,
Газел, шейир, на1гьнибыр а Юсифды,
Ун ама вас «Бахтаварад» Сакитды?
Убра мада выды «Быч1быр», Джамесеб.

Мардиш, вы кал, гьийгъа яхда Гьа1лирза,
Шу йиркьыр а, мигьманна — Агъариза,
Дават а, шад виъи Айдынды хизан,
Муштулугъ вас — туед абыр, Джамесеб.

Вы дуьнйады лиркьыд йишир а веш сен,
Вы элдис йик1иы гъа мыддам, герексен,
Мыха1дире гьарай лювшур сересен,
Юбилей тешкил выъыр а, Джамесеб!

Йили а вы, НураIмаIд?
Хуткухьуна йиз гьамадад сывадаа,
Дух йиъи вы мыха1шурад, Нура1ма1д,
Вас сипхьуд ра1хъ хупкухьуна е вадаа,
Ц1ийлахъан лу1вк1а выъыр ад, Нураа1ма1д,

Диде, кьулы йыкьасды йыгь гьац1ара.
Четинвалды выъыри вас ашгара,
Выш гимадана сиргарай адараа,
Кид вац1ыйхь хьур хьидид, хьывад, Нура1ма1д.

Са дереджеды вы вахьван лийкьыйне,
Джыбра далы хъудишва1лик гийкьыйне
Ха1лалды за1хмитдид ха1дий ливк1уйне,
Душман джац1ыд, вас джыбра ад, Нура1ма1д.

Кьыле выъын раха1тене сипхьур диш,
Шегьер вац1ыр вы явана ругъур диш,
Дуст-ашныеда хырыда сукьур диш,
Гъийгьа халда хырыда ад, Нура1ма1д.

Са мусурманад кьулы йыгь йидкьыд
Дуьнйадикла бегьем умуд кийпхьуйне,
Къанатбыр кине лихъийчис джишийне,
Нурдик руъура Кьурундид, Нура1ма1д.

Мыха1д банбыр, былахбыр йик1иы гьана,
Мыха1шура йиъи хьур яхда ана,
Вертолетбыр Йыгъахда сагьур ана,
Вац1ара выды йик1е ад, Нура1ма1д.

Русланыхьван люъуд хьыв йик1иы гъай вас,
Халкьдис къуллух ваъасдид вас ай ха1вас,
Хьа1лды йишири каафирешды нахьвас,
Шыв йыгь йиъи гьийгъа ва гьад, Нура1ма1д?

Гьац1ыр адиш — вышдихь, яраб, гьад душман?
Валлагь, сипхьура гьабишис «Шах-хирман»,
Ихьды хыле ки хадиш дердес дарман,
Йинчис вац1ыйхь вы ад зиндан, Нура1ма1д.

Шафид гаф виъи — ад диш миди закун,
Йишир диш халкьдид рыкъа1 къайда-къанун,
Кийпхьуйхь душманад, иман адишды тум,
Алха1мдулиллагь йик1е ад, Нура1ма1д!