Кишды йыгъа, 28 июлас, Мыха1д районди йыркьыр ай РД-над национальный политикадид Министр Татьяна Владимировна Гамалей. Райондид кьухьнийды кабинете гьание кьабыл дыъыр Мыха1д райондид илсанар, хъарацур гьабишды къавгъу-дердимыхда, гьыъыр хуткунбыр, суьхьбетбыр.Гьади иштрак гьыъыр генеки РД-над Халкьдид Маджлисед депутат Сулейманов Давуд Амаевиче, райондид кьухьнийды заместитель Кулиев Арсен Амраховиче, ерлид телевидениедире, журналистеше ва маддыбише.
Сахьусды Татьяна Владимировнара кьабыл гьыъыр райондид Общественный палатадид седри Акимов Надир Курбанович. Гьание жалоб гьыъыр Махачкалди Энгельса кучиди луза гьаъара ад квартирный халмыд бадана. Гьади договорахьван лешур ад ва танга ки выд кьва1б квартира луза гьыъыр, гвалахбыр бегьем гьаъас йик1иы гъадиш хьур. Гьасад агьвалат анивиъи балад дольшикешды Дагъыстана, гьадыла хайиш гьыъыр гьа суалас убур йы1х хьур республикадире.
Гьанийла хъуъ министрехьван ха1сил ришир райондид хьылешды общественный советед седри Индира Рагимовна Салманова.
Гьание Министред улихьде лаъ гет1ир райондид хьылешды къавгъу-дердибыр – гвалахмы гъадишвалды, оптимизиция ва гьадыхьван сыт1а баласды хизанбыр районда а1гъа1ч1ун. Биъир замха1т багъда-быстана руъуд ма1хсил, ер-емиш илсанашда масак выс руъура адиш, ербыр адиш гьабыр высды. Мыха1 адиш гъийкьыд хьед — я рагъасды (мысга т1алхъыр а хьур), я ма1хсилес гьагъусды.
Афтандил Абдуризакова (инвалид йиъид ll группа) кюмег ягъьир джу гъилы ливир ад балгъумашды «Потий» хьур малый предприятиедис. Шумаиди выдж обращаться йишир хьур Минсельхоза, амма миддийкьма са кюмег адиш хьур.
Гьадыла хъуъ Министре кьабыл гьыъыр Мыха1д музеед директор Гасанов Багаувдин Курбанисмаилович. Хьурагине районди йыркьыйне ки Татьяна Гамалей таныш ришир ай Б. Гасановахьван ва гьание выъыд музеехьван. Гьадыла директора гьаъара ад гвалахмы эккене рази риъий ва хабар виъий гьанийды мидыла хъуъ ки гьаъас йик1иы гъад гвалахмыкла.
Багаувдине хайиш гьыъыр республикадида тангымыд кюмег ви хьур «Сад камней» хьур музеед проект кьуле гыргас. Ер гьадис гьазыр выъыр а (1 гектар). Ха1р кьваб эвелды памятник йиъи, гьадыла гъарадыбыр дуруъура районди гьабыр гъаъ йихис чалыш диъи хьур. Тирджеким ки 24 эвелды кьваб Азербайджана вихире ана хахъакьыр ай. Эгер гьа проект кьуле йыгыхьвна, гьасад музей викис Россияди сахьусды. Гьа кьвабырмык киниъи сиене Кавказад ва сиене динмыд тарих. Гьадид бадана Багаувдин ха1сил йишир ай республикадид Врио Кьухьды В.Васильевахьван. Республикадид Кьухьние А. Карибова тапширмиш гьыъыр ай, кюмег выр гьа суал кьуле йыгын бадана. Амма мидийкьама са сес-самыр кидиш, гьухьур Б.Гасанова. Министре кюмег генеки выс хьур ридж ха1сил ришир Карибовахьван.
Мыха1д райондид ЦСОН идарадид директор Курбан Гусейнова лаъ гет1ир районди гвалахбыр адишва1лид агьвалатад суалбыр. Хайиш гьаъара хьур республикадид кьухьдыбишда районди ц1ам гвалахад ербыр ачых гьаъ хьур.
Управление культурадид кьухьды Даниял Айвазова лаъ гет1ир районди ад культурадид халмыд агьвалатад, гьамыс капремонт йыгара хьур, музыкальный инвентарь ва мебель йыгара хьур. Адиш хьур культурадихда гвалахад машин. Сиене сыт1а районди гъийгъа а 29 культурадид хал (филиалбыр), ва 29 библиотека ки. Гьама гвалах ваъара а 140 илсындире. Гьадыла джетин йиъи машин адишне балад гвалахбыр кьуле гыргас гьамыд.
Нельсон Султанова (Мыха1д кьва1бхьусды мехьтебед директор) генеки министрес йик1иы лихъивир 2008 сыдала хъуъ ц1инды ваъара лувзур ад мехьтеб. Илсанашды приемала хъуъ Татьяна Гамалей директорахьван сыт1ана Давуд Амаевич ки хъуна рыхьыр ай гаркьас гьа мехьтебяхда.
Гьадыла хъуъ министр рыхьыр ай Цахур му1къа1 гьади ад эвелды мездикехьван таныш рикис…
Б. МыхаIды
