Бербад вишид 22 июнь

img-TlNidX (1)

Залымды йыгъ шыв хьур хъибкьыр а?
Илсанашды шудаъ за1хле вихир а?
Вы йит1кьыйне, душман кал ес гьагвара
Да1вибыр, дыркьынбыр йик1иы хъу1гъу1ре,
Бербад вишид 22 июнь.Шыв залымна йибкьыр ай вы гьад сыда?
Да1ви хана душман йиркьыр ай гале,
Ватан – нине……
Игъипхьур халкь да1ви ваъас гьапхы1ри,
Бербад вишид 22 июнь.

Мыйц1ырахда гич1идхьыр а сенбыр,
Сен сыдыла пис руъура девирбыр,
Вы ки за1хле вихис руъура ха1р сыда,
Лехъет1есды гьа1л мабама илсанахда?
Бербад вишид 22 июнь.

Шудаъды фикирбыр мада йидж джукла?
Инамиш йич1есды выш и выдж гъийгъа?
Вы йип1кьыйне илсан маада ешере,
Вад гьавъыд гьа1забыр гьури хъу1гъу1ре,
Бербад вишид 22 июнь.

Немцад залымвалды йик1иы хъу1гъу1ре,
Шудаъ джу дыркьыдде гьалыс дац1ара,
Миллионбыр гьатхы1д кала каатхы1р ад,
Миллионбыр чуьлим сатыр ситчир ад
Бербад вишид 22 июнь.
Гьис иддей вы таарихмык ар суджулгад?
Халкьдид йик1иы лихьид дагъбыр кигъджилхьвад.
Сириебыр хъабхыр а са вы дже сатыр,
Улабакла нагъв ки къуру хъиджившир,
Бербад вишид 22 июнь.

Сахак кал йибкьыр вы накь кал гьатхы1р ай,
Ц1ай кийир дуьнйадик вулхьар саптыр ай,
Вагьисене йип1кьыд кала вы хъархы1ри,
Миллатбыр къирмиш даъара салтыри,
Бербад вишид 22 июнь.

Гьис иддей вы залымана гъавырхыр ад?
Гьа1р сада вуруъур за1хле гьапхы1р ад
Кьа1са дишир джигьилана джама1ха1т
Йик1ихда хъумадад шывга мадама?
Бербад вишид 22 июнь.

Ибырахьван йик1иы ар кихьир сатыр вад,
Юкьды сыда дыркьыд миллионбыр гъад,
Са инсаф, са ра1хим вахда джившир ад,
Гьаддухъунды илсан йикье гьавыр ад,
Бербад вишид 22 июнь.

Нинабашды улабыр рыкъы1 гъатыд,
Выг1лешихда сюсмешды йик1быр хъатыд,
Лышанчиймар са-сынуву лат1кьас джавуд,
Гьу1мирдыхьван кьат1а дыъыр дже сатыр,
Бербад вишид 22 июнь.

Хъыггад йик1быр сасынувыхда хъатыд вад,
Гьа1срат ана хъытгабыр кьат1 дыъыд вад,
Джегьил выг1ле мыхрымаа эгъет1ид вад,
Хьыле салтыр гьу1мирдыхьван дешере вад,
Бербад вишид 22-июнь

Дидабар, духре, ришиймар на шубе
Гуджехьвана кьат1 дыъыр салтыд вада,
Вышер, шудаъ дыркьыр кьа1сды джадац1ар вас
Миллионбыр гузат даъас гьавъыд вад,
Бербад вишид 22 июнь.

Духарыс дид гьац1ара джыъыр сатыр вад,
Дидис дух, рыш гьадгвас джадвыр салтыд вад,
Йикьидбайды гьац1ар джыъыр сатыд вад,
Кьырыбыр чуьлма ситчес сатыр вад,
Бербад вишид 22 июнь.

Лышан гъадбыр лышан гъана салтыд вад
Гюзет даъара гьу1мир лабт1а выъыд вад
Миллионбыр га1шер, мыкьар дыркьыд вад
Хыных-ч1инич1 залымна пыч дыъыр вад
Бербад вишид 22-июнь.

Гьа1р сада руъура гьа1заб вылц1ар вад,
Илсанашды йыхы1ныбыр ц1ин хъаъар вад,
Вы йип1кьыйне гьадухъун пис руъура,
Ц1ир вулхьара ад Дуьнйа йик1иы хъубгъу1ре,
Бербад вишид 22 июнь.

Гьад садаки гъы1лд хана выкьасды виъий вы,
Илсанас шадвалды хана выкьасды виъий вы,
Уьлкиди бегьем джишир ад колхозмыхда,
Гъивирхьас, габкъас выкьасды виъий вы
Бербад вишид 22 июнь.

Сыдык ар кид эн шадды ваз виъий вы,
Ч1ирид-ч1ыкад гагьды ваз виъий вы,
Быч1-быч1ихьван гьалгар-хъалгад вахт виъий,
Быч1иы супкьур бюльбюл валгад йыгъ йиъий,
Бербад вишид 22 июнь.

Гьа1ммише кал миллет ки гьа1забде ай,
Валхур ад уьлке арыда хъыгыр ай,
Гьалды йик1иы авгъу вишид да1ви гъай?
Халкьдид умуд къизил эскерешиы гъай,
Бербад вишид 22 июнь.

Цараше шудаъ уьлке га1шаа севир ай,
Миллатбыр джу да1вимык гьуъ гъат1ыр ай,
Вырды ч1иры миллатбыр пыч гьыъыр ай,
Джу гич1 революциедикла ваъарай,
Бербад вишид 22 июнь.

Выдж ки вишир илсанашис гьувгур ай,
Миллитмыс джуду гьа1заб вац1ыр ай,
Фагъыраше колхозад мал уьху1р ай,
Къуллухчиеш гьа1ммише кал улерей,
Бербад вишид 22 июнь.

Да1вимыла илсан безмиш йишир ай,
Фабрикабыр, заводбыр ц1инен хъаъарай,
Уьлкиди ар социализма сипхьир ай,
Халкь гвалахмык йыхан хьур кит1ир ай,
Бербад вишид 22 июнь.

Кулакар сибирде сидига даъарай,
Кенчиешды мал-мулк уху1с гьылц1арай,
Коммунизма ваъас, хьур, къилик рихырай,
Илсанашды магьа1шмыра джан лешур ай,
Бербад вишид 22 июнь.

Хьуды сыдыд планбыр кьулик гыргарай,
Уьлкидид ар ц1инен хал-лах хъаъарай,
Фабрикабыр заводбыр худа эхъейер
Са тегьердид илсан баше руъурай,
Бербад вишид 22-июнь.

Сталин ки динджен сукьур адиший,
Силагь, эскер магькам хъаар сукьур ай,
Генералар джура пыче дыъыда,
Гитлерехьван союз ваъар кихьыр ай,
Бербад вишид 22 июнь.

Гитлерехьван ц1амна дуст ки хъишир ай,
Уьлкидис ки бала за1гьмет биъир ай,
Польшадикла джусды пай ки хъывыс хьур
Латва, Литва, Эстон ари кивир ай,
Бербад вишид 22 июнь.

Шуда джура уьлке кьухьва выъыр ай,
Джухьван кине миллат бала вишир ай,
Миллат баше ваъас четин йишийне,
Ц1ам ваъасды чара т1ылаб ваъарай
Бербад вишид 22 июнь.

Выдж йикьийне – уьлке батмиш вишири,
Генсеква1ле гьаламатбыр лат1кьыри,
Диъид джуды сиъин за1гьматбыр пыч гьыъыр,
Эккед уьлке вирц1е выъыр саптыри,
Бербад вишид 22 июнь.

Кьухды шагьар гьаракатбыр гьаъара,
Дуьнйа ибра батмиш ваъас лакъыри,
Европаде да1виймыд джу лейир,
Саса уьлке батмиш ваъара ка1ч1ури,
Бербад вишид 22 июнь.

Сталинар ц1инды ярах гъейирдиш,
Куьнед силагь, эскер хыла сиггыр диш,
Ленинар кал сукьур хиялбыр гьаъарай,
Берлиндыхда тамагьбыр джу гьыъыр ай,
Бербад вишид 22 июнь.

Джубра тахсир Гитлерахда хъит1ир ай,
Ч1ел джавыъыр бейхабарна йиркьыр ай,
Договор ана, къушумбыр хана выдж
Бандит кала дагулана йиркьыр ай,
Бербад вишид 22 июнь.

Алчах душман хабарсызна йиркьыр ай,
Сапхыд халкьмыд кьули бомба сап1ыр ай,
Кьат1 йишид хыл джалладар кал хьуъ сигыр,
Дивизиябыр СССР-дыхда сиггыр ай,
Бербад вишид 22 июнь.

Испания кеъэкла батмиш выъыр ай,
Фашистешис ибырдид дад авкыр ай,
Джаллаташе кал йыхы1нед г1ал ачух гьыъыр,
Дуьнйа садад уьтмюш ваъас лакыр ай,
Бербад вишид 22 июнь.

Гъы1лдид йыгъ ий, вы йийц1ыр сен улихьде,
Халкь хъуна виъий джуду касибва1лихда,
Нагьа1сбыр хана йибкьыр ай вы галехда,
Хъачах кала выше мадан мыч1ахъана,
Бербад вишид 22 июнь.

Халкь ар йоква1д ахтар кавургъарай,
Кьачид халкь раха1тене сапхыр ай,
Гьавыде ар къаралтбыр гъургъара ай,
Йоква1д сакитвалды кюземиш ваъарай,
Бербад вишид 22 июнь.

Саргьа1тмыла къаралтибыр йирхьарай,
СССР-дид ч1иры джва1р ки эгъу1р,
Сапхыд халкьдис са хабар ки выъыр диш,
Бомбабыр кьулимы джуду сыхъыъыр ай,
Бербад вишид 22 июнь.

Айеропланмыра ха1лбыр ац1ыр ай,
Нац1урмаа меъ танкбыр кегъа1ч1ур ай,
Джаллатар кал фашистар ехдан суьлкюрай,
Йокв сиггадис Брест бомбит хъывыъыр ай,
Бербад вишид 22 июнь.

Сапхыд халкь геьзимен кигъийтхьури,
Шыв гьыъытде, выш йиъитдыхда гет1кьырдиш,
Выше мадан саргьа1тбыр батмиш хъаъыр,
Ц1ыц1ар кала немцар ахмиш дишири,
Бербад вишид 22 июнь.

Шимал-денизала Къара-денизас йыхы1р,
Сиъин саргъа1тбыр темизан батмиш гьыъыр,
Гитлеред къушимбыр уьлкий а1ч1урий,
Юкьды сыда шудаъ илсан йикьирий,
Бербад вишид 22 июнь.

Писды хабар илсанашис ивишири,
Илсан джура шудаъ гьа1зим гьыъыри,
Выг1лебыр да1види уьтмиш даъара,
Хьыле, хынимар дешере дишири,
Бербад вишид 22 июнь.
Дуьнйадид ки Кьухьды да1ви мид виъий,
Дуьнйа хылихда ваъар Гитлер чалыш ий,
Выдж леджейкьыд дуьйады ер саптыр диш,
Илсан джикьид са уьлкиди ки кетырдиш,
Бербад вишид 22 июнь.

Ватан-нине духре сыт1а дыъыри,
Азадвалды увуху1с сидигыри,
Ярахбыр выг1лешды хыле ар выйне,
Ч1укуд дылан хьылеше хыле лешури,
Бербад вишид 22 июнь.

Ха1ба1хъа1н, нехирхъан, фегьле не кенчи,
Шахтерар, духтурар, сиене ишчи
Дыгыр окопырма ари садгъури,
Немцаше ки кьулумы бомба сап1ыри,
Бербад вишид 22 июнь.

Душманахьван к1аъды, кьухьды гъа1ч1ури,
Йикьыныхда дагьа выш гахъаггыри.
Гетлерар илсанар гьасаб дыъыр диш,
Гьайдила гьаниера выш халкь гьыъырдиш,
Бербад вишид 22 июнь.

Уралда сихъигыр фабрикмыра, заводмыра
Да1видис сиргара йишир ярахбыр,
Джигьил ришбе не джигьил гадиер
Станокмыхда йыгъа-выше луьздюр ай,
Бербад вишид 22 июнь.

Миллионбыр трудовой фронтма дыхьыр,
Блиндажбыр, каналбыр шудаъ а1тхъу1ри,
Джигьил суьсмар, джигьил гадиер, ришбе
Шудаъ дыркьыри — джва1р гьалыс дац1ыри?
Бербад вишид 22 июнь.

Дид да1види, нин трудовой фронта
Йытхы1р, гьатхы1р — кьа1бе ад хыных аргыри,
Дин, нин дыркьык, к1аъды хыных га1шере
Бабушкахьван кине выджи ки хъикьири,
Бербад вишид 22 июнь.

Силагь, туп, дуфанг гъайкьыд джишин ки,
Самолетбыр, танкбыр ц1амды йишир ки,
Миллатмыд арыде гьу1рмет вишири,
Архасна душманас джываб хъывыри,
Бербад вишид 22 июнь.

Са винтовка хьибнувды хыле ар выри,
Танкмыхьван киджитхъас сидигыри,
Фашистеше джухьды оружиедид гудж
Къуруд илсанашис гьувга выъыри,
Бербад вишид 22 июнь.

Душман агъус секкинийис йыгар йишир диш,
Къулар дикис гьалысна хъыгардиший,
Джухда ад ягь илсанашиы гырга гьап1ыри,
Джва1р дыркьыр ки, анджах — таби дишир диш,
Бербад вишид 22 июнь.

Совет халкьдире гьунар гьагва гьап1ыри,
Джва1р дыркьыр, ватан азад выъыри,
Къулва1ле джыдхьыр, джва1р азадана дыркьыри,
Азадвалды джандыла лаъна хабкьыри,
Бербад вишид 22 июнь.

Гьидис выъыд виъий мид ва1ши да1ви?
Тарихма ари гьала джишид ка дарс,
Гитлерер сиъин дуьнйа джуду г1але авгъус
Выъыр ад виъий, выдж йикьис хьур гьад да1ви,
Бербад вишид 22 июнь.

Йешед йыгъ и хьур са сес игъипхьури выдж,
Мид сесед ундире дуьнйа гевхури,
Турук гихыр силагь, къушимбыр хана
Фашист йиркьыр ишды гваргык кихъури,
Бербад вишид 22 июнь.

Немец выше некьа ки ес гьагварай,
Илсанар диъилерад гьайван выдж виъий,
Джиды геч1иныра гьайван выдж виъий,
Гьарайбыр етере, шудаъ дешерей,
Бербад вишид 22 июнь.

Сталин гип1кьырдиш мид шыв йиъийде,
Гьакъийкъатне мид видж да1ви виъитде,
Арыди договор ана, йидж шууна йиъи
Гитлере джу да1ви шуна ваъара?
Бербад вишид 22 июнь.

Са рапад ц1ай калды вийий выдж да1ви,
Тарихмыс гьала ки гуджувгъу1д да1ви,
Сталин Москвади гиихьир сукьур ай,
Йиркьыд Гитлере джу йыхы1ын етарый,
Бербад вишид 22 июнь.

Къалыйен беъэре, фикир ваъарай,
Хьели сукьур приказбыр кирхьерей,
Къуруд эскерер хьуъ сидиргарай,
Хъуъ хъахыд чекистеше рыхы1рей,
Бербад вишид 22 июнь.

Москва лебшус Гитлер бала ликьури,
Йизир аткыр сигъийне к1ыбди хъахыри,
Сифде Ленинград блокадый ивири,
Хьели Сталинграддихдана сукури,
Бербад вишид 22 июнь.

Лешуд ч1ириймыкла немцар гъадгуйне,
Илсанашис ваъад джу зулум гьавгуйне,
К1аъды, кьухьды, хьыле, хынимар ки кине,
Партизанва1ле джва1р, дахыр, гьатхы1ри,
Бербад вишид 22 июнь.
Миллатбыр садишир джва1р шуба1 кала,
Душманар дишири тылыер кала,
Сталинад сесахда халкьбыр игъитхьур
Душманахьван дыкьыркьасна людуьрзерей,
Бербад вишид 22 июнь.

Гьар са илсанар к1аънура, кьухьнура,
Да1видис шудаъ за1гьмат биъири,
Луза джыъыр йигъа, выше заводбыр,
Шудаъды топ-туфанг джура сиггыри,
Бербад вишид 22 июнь.

Хьыле ки гьаннийыла хъуъ хъадгырдиш,
Душманаши леджекьыр ад йыгъ адиш,
Выше лий1ир дыхьыр душманашды кьулиы,
Шудаъды бомбабыр хьылеше ки сийтири,
Бербад вишид 22 июнь.

Джигьил ришбе гуллимыхда идкыри,
Саъара ад бомбамыла гич1 джывыъыр,
Шудаъды яраллы эскерер хъидихирей,
Миллатбыр джура къутар хъат1арай,
Бербад вишид 22 июнь.

Ватан кьухь виъий, миллатбыр китхыр ай,
Гьа1р миллитдид джуду мырад са вишир ай,
Ари ха1ч1ур душман к1ыб батмиш гьаъас
К1ыбди да1ви лабт1а ваъас чалыш диъий,
Бербад вишид 22 июнь.

Гитлерахда фикир бала ч1ирид ай,
Кьухьды уьлке джуды арыди выъын пай,
Славян миллетбыр темизан гегъийдес
Арийцар дуьнйадид са1гьибар даъас,
Бербад вишид 22 июнь.

Россиядид багьад накьв-ч1ир гьагуйне,
Мисед кеф кид уьлке хыле йип1кьыйне,
Гитлер темизана кьула гъирхьур ай,
Урусар дыкьыркьара выдж ки ка1ч1ур ай,
Бербад вишид 22 июнь.

Аддухъунды миллатбыр ари ха1бч1урай,
Са хизан кал душманахьван гъа1бч1урай,
Дыркьынихда, сулгуьнихда гаджадкъыр,
К1ыбде душман тарг хъаъас хъитхьур ай,
Бербад вишид 22 июнь.

Да1видид таарихбыр йыхан гьац1ара,
Текрар хъыъын гьалыс лазим руъура?
Сиъин миллатмыд гьунармыкла кихьир а,
Бербад вишид 22 июнь.

Рутулар джва1р гьалыс лазим дишири?
Са гейкьад сагьиб джухда мыс кал йишири?
Хьибыр, юкьур геройер яхда дишийне,
Хьибыр джийшир, гьалыс ха1саб дишири?
Бербад вишид 22 июнь.

Киджихьир адгыр а ишды хьылешикла
Биъир ад за1гьметмыд, лет1ид гьа1забыр,
Шив зулумахьван гьам джва1р, гьам хынимер,
Баше дишир адде писды вахдинде,
Бербад вишид 22 июнь.

Ишды хьыле гьаннийыла хъуъ хъадгыр адиш,
За1гьматдыхьван, гьа1зыбдихьван диъи вердиш,
Ч1укуд дылан, яцмашды ч1уб хыле лешур,
Езелбыр, хъезелбыр джура гьаъара ай,
Бербад вишид 22 июнь.

Гъилаба ки лыъыр талхъ кид шаламар,
Йогъц1ур к1ук1ал сат1ур ад лыъыр выхынбыр,
Хыле хыных, йыкьа1а1 шала вихире,
Йоква1ла нахадийкьама гвалах ваъара дишир,
Бербад вишид 22 июнь.

Хьад йидкьыйне, лыйха1ре, езере дишир а,
Гъы1лд йидкьыйне еш, укь гьаъара дишир а,
Хумухд йидкьыхьван сум на укь йыкьа1хьван йихири,
Кьы1нне ратбыр, йыг1быр гьаъар дишири,
Бербад вишид 22 июнь.

Быгала на1хман йыг1быр гьаъара риде,
Вышед йоква1хьван сук, на1х вихири мыхде,
Халы, хизынды гъуьткесды вахт диший,
Некьихда темерзана джва1р адылгарай,
Бербад вишид 22 июнь.

Джийшир айдин гьад вахтинды зурбад хьыле,
Кьухьды шала леджебшурайдин йыкьа1,
Йыгъ, рат джыъыр джытхьыр айден руха1,
Га1шинире дыркьыр выший аргасды?
Бербад вишид 22 июнь.

Да1вие гьа1тхы1бишихда джва1р дешере,
Дыркьыдбишды кагъатбыр лехъебшура,
Эскерешис мыкь магъу1й хьур да1вия,
Сиг1ыд валыгмар ки джва1ршихда сиргара,
Бербад вишид 22 июнь.

Адиший нафут на кьел, ишбишка, сабын,
Са зулум вишир ай йоква1с ц1ай хъыъын,
Гидирк1ад ий йоква1с к1ыбде лаъ люздес,
Гьилды хала лаъ сифдене ц1ай лик1вас,
Бербад вишид 22 июнь.

Са ма1хьа1ъад ху1р вишийне сынувхда,
Сиен мукъу1ра виъилерей выдж ар кине,
Илсанад арыди вишир ад ху1рмет,
Душмана у йыхы1н гъана дишир а,
Бербад вишид 22 июнь.

Са хьыв ваъ, гьа1р кар кьитне йишир ай,
Нафут, кьел, сабын гьалды улис гьагварай,
Лемпемысна гарджбыр лик1ва гьаъарай,
Хьумара илсанар быркьа1 даъарай,
Бербад вишид 22 июнь.

Улед, рагъад кьитне йишир ад кале,
Лаъад валгыхда ки ма1хтадж дишир ай,
Хьыле, ришбе, джигьилды сюсмер кине
Гьа1р кардыхда шудаъ ма1хтадж дишир ай,
Бербад вишид 22 июнь.

Гьадис ки хьылеше чара гьувгарай,
Выше сипкьыр дин, дыбыч1быр гьаъарай,
Дынбыр т1укур, джикла ухурбыр гьаъарай,
Яхурмы къеденбыр хырхар дишир ай.
Бербад вишид 22 июнь.

Гьад къеденмыд ухунбыр лаъадий,
Гьа1дилды джан ц1ире кал гьутхьа гьаъадий,
Чахъвара хьур лихь йыбхы1р ай джандикла,
Йыхы1нбыр гъитхьуд давам джаваъады,
Бербад вишид 22 июнь.

Ры1хъыхьван валыгмар ки силкьарай,
Йыхын ч1ит1к1ыр, усуу ки джва1р гъулкарай,
Гьаддухъун гьа1забыр джу лат1ийне
Гъийгъа гьалысга йик1иы гъамадамай,
Бербад вишид 22 июнь.

Выше сахас хъы1римы гьалда руъурай,
Шум кал джандис ч1итар рыхы1ра,
Шиташе, лихьеше варагъыр эбыр,
Илсанад дженде ар шивий амадад?
Бербад вишид 22 июнь.

Накьв ад джиле ыъыр бат1быр, хъы1рбыр,
Литайира джандак гьутхьа гьаъарай,
Литади уу йыбхы1р брезент ч1ип1кыд,
Кьва1б т1или калды хиц1 ки джис йыпхы1р а,
Бербад вишид 22 июнь.

Дава-дарман джва1р гьалыс ий гьац1ар ад?
Духтур выш кар итде гьалыс гьац1ад ий?
Га1шере, мыкьара иситма ваъара
Шудаъды илсанар гьалак дишир ай?
Бербад вишид 22 июнь.

Юкьды сыда хьылеш гузат дыъыр ад,
Намус, гъиръят, абыр, гъая увуху1р ад,
Выг1ле, духре, шуба1, дидабар гюзет даъара,
Быркьа1 дишир джубраа джубра ки хъатхы1р а,
Бербад вишид 22 июнь.

Гьа1р кубахда сажда задда гьаъара,
Аллагьада ра1гьим, инсаф ягъа1ра,
Ватандис джанбыр курбан гьыъыдбишис
Ахирас джаннетдид макам вагъяра,
Бербад вишид 22 июнь.

Йинчире ра1хмат выъый фагъирашис,
Дуьнйадихда йик1 хъумадан хъа1а1дхы1бишис,
Аллагьара дуьнйады джус джавыр пай
Кьва1д къатна хъивийий сиенбишис ахирас,
Бербад вишид 22 июнь.

Сагъ дыъый Аллагьар хъыдгад джва1р хьыле,
Гьадгуйне йик1ире ваъар джус дзер-дзер,
Гьа1ммишене саптый джуда хад дамах,
Къисмат выъый гьа1ммише джус йыхды тах,
Бербад вишид 22 июнь.

Дыркьыдбишде Аллагьара ра1хмат выъый,
Гьа1забдимыхда гахъыр джаннат вийий,
Мадад кульхьутдимыс ки Аллагьара
Бахт, берекет, сагъды джан на йик1 вийий,
Бербад вищид 22 июнь.

Залымды йыгъ, таарихма ар вы сугуй!
Вы калды йыгъ Аллагьара гуъ хъымыъый,
Ха1м ар вырыгъ ц1ыдана выкьый,
Бахтыварар на илсанар баше диший,
Бербад вишид 22 июнь.

Забыдин Пидуров,
с. Цудик