Административный Советед иджлас

20180531_115322

31 майес Мыха1 вишир ай МР «Рутульский район»-дид Административный Советед иджлас.
Гьа выгыр ай МР «Рутульский район»-дид Кьухьды Ибрагим Ибрагимова. Гьади гьыъыр ай иштрак райондид прокурора, райондид идарамыд къуллухчийше, мехьтебырмыд директораше, му1къмыд сельсоветеше, депутаташе ва маддыбише. Хьурагине райондид Кьухьние кьыле гьыъыри иджласад повестка.
Гьадыла хъуъ Ибрагим Гусейновиче выри джуьхьды сураады Благодарственный письмобыр, журналистешис, ваъара ад гвалахас эккед сагъул — ГБУ РД «Рутульские новости» газетед корреспондент Саид Сулеймановас ва райадминистрациедид информационный центрад оператор-режиссер Насир Юсуфовас.
Гьадыла хъуъ повесткадид планак кид кал, суалмыд сураа далгыри хьуланды юлдашер.
20180531_100459

1. Сахьусды суалад сура – отчет райондид администрациедид комиссиядид шыв гвалахбыр гьыъырди антикорупционный гвалахмыд сураа райондид ва му1къмыд идарамыра. Гьадид бадана гьалгыр ай райондид кьухьнийды помощник Абдулвагаб Ахмедов. Гьание джуды отчет хъывыдаа хъуъ, райондид прокурор Рафик Гаджикеримова, райондид Кьухьды Ибрагим Ибрагимова ва мадды миди ад юлдашеше выри гьанийис балад суалбыр.
Ми суалад арыдик кине гьалгыри миди райадминистрациедид кадровый службадид кьухьды Кудрат Абеев ки. Гьание ки миди гьухьури, сасад руководителеше вахтинди доходмыд декларациябыр ва мадды отчетбыр, кьул–кьулик кине, лазим йиъид кал хъывылц1ардиш. Гьадыла, мисе йиъид гедене, шыв штрафбыр ва санкциебыр закондире лирхьерди руководителешы ва идарамы, йик1иы лихъийири гьание. Хьели Кудрат Султановиче хъывыри джывабыр джус залаа выд суалмыс.
Гьади гени ки гьалгыр ай райадминистрациедид юрист Мурад Рагимов. Гьание ки сасад юридический процедурабыр ч1ирине гьаъадид ва гьадыла судара ки гьадис протест вылц1адид ва мадды себебырмыд суалбыр агъмиш гьыъыри.
Кьва1дхьусды суал йиъий — отчет Йирекдыбишды сельсоветед 2017-ды сыда ва ми йиъид 2018-ды сыда выгыд гвалахмыд.
Суалас гюре гьалгыри, гьади выхьыд комиссиедид отчет кьыле гьаъара, райондид кьухьнийды помощник Абдулвагаб Ахмедов.
Хьели миди гьалгыри Йирекдыбишды сельсовет Талиф Раджабов. Гьание кьыле гьыъыри отчет, ва гьадыла хъуъ хъывыри джавабыр миди ад кьухьдыбише джуьс гьывыд суалмыс.
Йирекды му1къу1д агьвалат вац1ара ваъара, гени ки далгыр ай, мехьтебед директор, хынимешды садикед заведующая, ветеринарный участокад кьухьды, культурадид Центрад директор ва мадды джывабкар илсанар. (сельсоветед отчет йе лийеси ми бейдене йыкьасды газетмы).
Сиени агъмиш гьыъыд суалмыс Административный Советере выри лазимды кьимет.
Гьадыла хъуъ агъмиш гьыъыр ай мадды райондид илсанашды яшайышес таликьды суалбыр.
Миди 2018-ды сыдыд 2-ды полугодиедид подпискамыд сура гьалгыр ай «Рутульские новости» газетед кьухьды редактор Б. Магомедов. Гьа суалад сураа райондид кьухьние гьухьури — сиенибише выр йыгара куьмег подпискамыд кампаниедис, кьулы луьдзир.
Гьадыхьван Административный Советед май вазырды иджлас бегьем вишири.

Къинады Саид