Къине агъмиш гьыъыр Гъалибдишид Йыгъ

20180508_094659

Ми йыгъырма, да1види Гъалибдишид Йыгъас таликьды мероприятиебыр йыгыр ай сиене районди ад му1къма. Йыгыр ай гьа Къинед му1къа1 ки.
Сагъат 10-дис му1къы1д кьухьдыбыр, сиени джамаха1т ва гьади ад гьу1киметед идарамыд къуллухчиер сыт1а дишири му1къу1д йыкьа1 ад кучиди. Хьура хакьыр плакатбыр ва да1видид ветеранашды шикильбыр, Россиядид ва ирды пайдахбыр хана, сунначийше макьамбыр ки рыхы1ре, гьадаа дыхы1ри мехьтебеде. Гьадид ма1гьлиди да1види дыркьыд йигитешис сихьид памятникеде йыгыри митинг, 9 Майес да1види Гъалибдишид Йыгъас таликьды.
Миди иштрак гьыъыр ай мисед юлдашеше, байрам нубарак гьаъара:
— Мыха1д райондид Кьухьнийды уполномоченный Шафи Абдуллаев;
— Къинед сельсоветед кьухьды Темран Джумаев;
— Къинед мехьтебед директор Сакит Абдуллаев;
— пограничникешды ва полициедид представителер;
— Мыха1д райондид Маджлисед депутат Саид Сулейманов;
— Лучекды сельсоветед седри Сафар Сафаров;
— му1къы1д кьа1сды-кьухьдыбыр, мехьтебед магьа1лимер, джегьилер ва маддыбыр.
20180508_100447

Гьади байрамад майдана къутливалдыбыр гьаъара юлдашер далгади, арыма кийир ай музыкальный ва шиъирбыр рухьуд номербыр. Гьабыр гьыъыр ай гьазыр Къинед му1къу1д мехьтебед магьа1лимеше ва телебийше.
Сифте доклад кьыле гыъыр ай гьа программадихьван мехьтебед магьа1лим Мирван Керимова. Гьадыла хъуъ программа выгыр ай мехьтебед директорад заместитель Майсарат Алиевара.
Сиени классма ад телебийше гьыъыр ай лап уфтанна кьыле 9 Майед Йыгъас таликьды шиъирбыр, джуьхьды хыле пайдахбыр ва шарбыр хана, хьура ки георгиевский лентабыр кет1кьур.
Миди джама1хдид улихьде Къинед му1къу1д сельсовет Темран Джумаева выри Грамотабыр ва танга райондид марафона гъами йишид Артем Халиловас ва гьади гени ки иштрак гьыъыд Вадим Магомедовас ва Ибрагим Рамазановас. Му1къу1д кьухьние выри Афганистанди да1види йишид ветеран Абдулазиз Абдулазизовас ки подарок.
Миди концертед программадик иштрак гьыъыр ай сыт1а дишид Арандады ва Лучекды артистеше, Къинады сунначийше.
Зарема Майсаровара миди гьыъыр ай на1ни «Дурна» («Журавли») Расул Гамзатовад ч1елмылад, Къинед шаиреше ки гьухьури гьади джуьхьды шиъирбыр.
Байрам му1къа1 выгыр ай лап гъеблир, шадана ва наха1ды йыхы1р, мук1быр шадвалдыбыр гьаъара иштракчийше.

Къинады Саид