Хъемереш риши

Бахсызна вы дуьнйады лирхьури,
Темизене вы гьурбутда сирхьури.
Дур сус риъи, вы ядахда гирхьури,
Дад бала виъи, хъемереш риши.

Бына-башдан бахсызна ай кьухьды риши,
Сиене кар Аллагьада — хъемереш риши.
Эвелды гихьид хал выды гийтхьури,
Эвелды кульфутдихда хъемереш риши.Дамам гьаъ ва дамамаъ,
Улаба нагъв самаваъ.
Сиене кар Аллагъада йиъи,
Рыкьа гене дамамаъ.

Шу йикьикан кьыхьды дерде кирхьури,
Дух гьагукан вы лап выкьла кирхьури.
Дуст ешере душманар лап шад дишири,
Дух душман гьыъыри, хъемереш риши.

Дамамаъ ва дамамаъ,
Улаба нагъв самаваъ.
Дух вас душман йикисдиш,
Рыкьа гене дамамаъ.

Ришиймар дешед хьур быркьа1 дишири,
Дидыс на ниныс дух ягъи йишири.
Джухда диъид духре кьухьа дишири,
Невеймар кьухьа даъ, хъемереш рыш.

Дамамаъ ве дамамаъ,
Улаба нагъв самаваъ.
Невеймар хъухьа даъара,
Рыкьа гене дамамаъ.

Курда фитне ипхьур дух хыла гьархы1р.
Невеймар фахъана сус хала хъа1рхы1р,
Хала ад кардыхда суса хыл хъыйхы1р,
Хъа1тхы1д кардыхда хъемереш риши.

Дамамаъ ве дамамаъ,
Улаба нагъв самаваъ.
Хала хъа1тхы1д кардыхда,
Рыкьа гене дамамаъ.

Изды ришис мид дердекла вишири дерьягь,
Хынимешды выкьлыла дид игъийир, валлагь.
Гьакь гьакьара гыргаъ, гьай а1зиз Аллагь,
Ришбишис ул йыпхы1р, хъемереш риши.
Дамамаъ ве дамамаъ,
Улаба нагъв самаваъ.
Сиене кар Аллахьада,
Рыкьа гене дамамаъ.

Курда фитне гъипхьур, дух хала хъиркьыр,
Дидда рухсат лешур, сус хала хъыргыр.
Хъа1рхы1д кьву1нды невийхъаъ, кьва1р хъиткьыри,
Гьамыъ ва йа1хъ гьаъ, хъемереш риши.

Дамамаъ ве дамамаъ,
Улаба нагьв самаваъ.
Сиене кар Аллагьад и,
Рыкъа гене дамамаъ.

Гъарибвалды

Зы лирхьури гъарибва1лиы,
Магьа1т1ал риъи бахсызва1лиы.
Шукур Йинчид сава1лис,
Бахтсызвалды гьинне ваъас.

Гьатхыд сываа лерч1урий,
Быч1 гъад дыла серч1ури.
Са быч1иы гуямиш ришири,
Ватандыла зы гъа1рч1ури.

Сус ришир курда гъаргур,
Рыкъа1 Азраиль а1ч1ури.
Са мискинад джан лешури,
Къаргъыш лешур гьинна гьаъас.

Кьыле гьап1ыри за1хметдыхьван,
Хьыв илесдиш тюметдыхьван.
Гьу1мир лабт1ур джахьудыхьван,
Гьалакды йик1 гьинне гьаъас.

Ха1л утхур дуьнйа вешеру,
Дердере деръягь лебшури.
Йик1иы йит1кьыхьван заа йит1кьыбыр,
Ха1ля малаик ешере.

Йинчире зас выри дамам,
Джан сукъур лат1ури къадам.
Рикьин канди вухьуй ватан,
Хыди хынимар дешесды, арасура йик1 ешесды.

Ришиймашила гъариб ришир,
Ришис, шугус ришир мийман.
Ватанды вахда пай амабдиш,
Рыкьа вадде гьаъ не дамам.

Йинчире зас выри сабыр,
Субга джыъыр изды абыр.
Йик1иы гыдыргыр зый дидебыр,
Сабыр джакьыр мад шываъас.

(Джилухурабишды лугъат)
Гюльджагьан Бабалаева,
с. Джилихур.