Сечкимыд, налогмыд суалбыр агъмиш гьыъыр

20180228_000221

28 февралас Мыха1д райондид кьухьды Ибрагимов Ибрагим Гусейновиче джуду кабинете выгыр ай иджлас райондид му1къмыд сельсоветешихьван.Гьади агъмиш гьыъыр сечкимыд ва налогмыд суалбыр.
Сахьусды суалад бадана гьалгыд райондид депутаташды собраниед седри Артур Таиров. Гьание ихтилат гьыъыр, шыв гвалахбыр гьаъара ади йикисды 18 мартас ихьды ху1киметед кьухьнийды сечкимыд бадана, шыв ха1ле ади сечкимыс гыргара ад гьазырвалдыбыр.
Хьеликана райондид кьухьние джурана ха1р сельсоветеда хуткур, шыв гьыъыр ади ва шыв гьаъас мадади 18 мартас сечкибыр дюзгинне кьуле йыгын бадана.
Сечкибыр ха1р му1къа йилды идаради гыргасди, сес ивисдыбишды списокбыр дюз-дюзгин гьыъыр ама, сесбыр ийисды помещениеди ад-адишды, кабинабыр, ящикбыр, гъаъна йыхы1сды банербыр, халма йихисды яшик1быр, йа1кв йишин бадана джат1ур генераторбыр, компьютербыр, принтербыр электронный протоколмыс, огнетушительбыр – сиене мибыр йишир йыгара хьур вахтинди гьазыр сиене участокма.
Сечкибыр ад йыгъа ха1р са участока ун йишир йыгара музыкадид — гьа йыгъа байрам виъид гьац1ын бадана илсанашис. Баласды участокма (80%) ми гвалахбыр гьазыр йиъи хур, сельсоветешды ихтилатмыхьван.
Текды сасад джигима аниъий к1аъды джетинвалдыбыр – меселла, Горный магьалди (Цахур, Мишлеш) йа1кв джишихьвна, йикисдиш связь, Мишлеше вообще адиш секки связь. Принтермыс сасад джигима лазимды картриджбыр адиш, гьабыр ки дерде диъи ми йыгъыра лешус хъур.
Ха1р сечкимыд участока аниъи джываб высды илсан.
Сесбыр ахад йыгъа машинбыр джат1ургыйгы1н бадана сиене му1къма ра1къ-кьул дюз-дюзгин хъаъас хьур джетинды участокма ми йыгъырма ихтилат гьыъыр райондид ры1къмыд отделед кьухьние Ш. К. Абдулаева.
Хеликана далгыр ай налогмыкла. Мистед сыда 26 феврала йыхы1р шумуд % налогмыд ягъмиш гьыъыр ади ихтилат гьыъыр райондид Администрациедид экономический отделед кьухьды С.Ордуханова. Гьанийды ихтилатахьван, ягъмиш йишир а 140% налогмыд ерлид бюджете. Баласды налогбыр йыдкьыр ад йиъи илсанашис выд дуллухмыла, йисхьурди баласдыбишис шесды дуллухбыр мистед сыда хъывыр ай. Налогмыд бадана генеки гьалгыр межрайонный налоговый идарадид къуллухчи Таджидинов Рамазан.
Совещание бегьем вуруъуди райондид кьухьды Ибрагим Ибрагимова генеки хайиш гьыъыр сельсоветешда сечкибыр ки быт1рана кьуле йыгыр йыгара хьур ва налогбыр ки вахт-вахтинди ягъмиш гьаъара йыгара хьур.

Б. МЫХА1ДЫ