31 январес Мыха1 райондид Административный Советед иджлас вишири. Гьа выгыр ай МР «Рутульский район»-дид Кьухьды Ибрагим Ибрагимова.
Гьади иштрак гьыъыр ай райондид кьухьнийды заместителеше, райондид идарамыд кьухьдыбише ва къуллухчийше, му1къмыд сельсоветеше, инсанашды ихтиярбыр у1ху1д идарамыд сотрудникеше ва маддыбише.
Гьади хьуъ гет1ир суалбыр:
1. Отчет Рутульский райондид ОМВД-дид начальник Артем Магомедовад шыв гвалахбыр гыъырди 2017 сыдыд арыди, нагьакьвалдыбыр ц1ам гьыъын бадана Рутульский районди.
Мидид сураа сифтене гьалгыри А. Магомедов, ва гьание ягъа1д кал гьыъыри кьыле джуды отчет ( гьа е мирдженед ихьды газета лиеси). Хьели минийис выри суалбыр райондид кьухьдыбише, суал выри гене ки «Рутульские новости» газетед редактора ки к1ыб-к1ыб джу гыргад гвалахмыкла хабар ваъ хьур джамаха1тдис газета, лийир гьасад хабарбыр.
Ми суалад сураа далгыри гене ки райондид прокурор Рафик Гаджикеримов ва райадминистрациедид кьухьнийды а1гьтиетмыд сураады заместитель Насир Раджабов. Мибише ки гыъыри балад хабарбыр Мыха1д райондид джамаха1тдид сагъвалид сураа шыв гвалахбыр гьаъарди.
Гьадид сураа гьалгыр ай гене ЦСОН идарадид директор Курбан Гусейнов ки, гене ки суалбыр выр ай райондид Кьухьние ва райадминистрациедид отдел кадрамыд кьухьды Кудрат Абеева.
Райондид прокурор Р. Гаджикеримова гьухьури — райадминистрацие гьупхьудид ва гьадис ц1ай кийид суалмыд следствиемыд гвалахбыр Махачкалди ад идарамыра кьуле гыргара а, гьадыла гьамыд сура шывга гьа1рзебыр вияъ хьури гьади, гац1ара гьыъыр адресбыр.
2-ды суал йиъий — райондид культурадид Управлениедид кьухьды Даниял Айвазовад отчет шыв гвалахбыр гьыъырди районди ад культурадид идарамыра 2017-ды сыда.
Д. Айвазова миди гьыъыри кьыле отчет, гьили миние сыдыд арыди гыъыд концертмыд, выставкамыд, презентациемыд, фестивальмыд ва мадды халкьдис гьагва гьыъыд культурный программамыд ихтилатбыр гьыъыри; гене ки — республикадид арыди йыгыд фестивальма дыхьыр гьыъыд «майданмыкла», гьили гьамыс выр ай эккед кьимет — Мыха1д райондид культурадид услас, зурначийшды зурбава1лис ва мадды гвалахмыс.
Миние гене ки культурадид идарамыд йисва1лид, шывга условиебыр адишва1лид, инструментбыр ва тукмык кырхы1д лазимды инструменбыр адишва1лид хабарбыр гьыъыри, мадды мисед четинвалдымыкла ки гьалгара.
Ми суалад сураа гене ки далгыри райондид библиотекамыд идарамыд директор Зерифе Магомедрагимова, кьухьды режисер Мирзабек Азизханов, Элды К1ат1ры1хъдид Дом культурадид директор ва райондид хореограф Михаил Гашимов ва къуллухчиер — Вилает Шахбанова, Эсбет Азизханова, Мустафа Рамазанов ва маддыбыр.
Балад суалбыр выр ай миди далгабишис райондид кьухьние ки.
3-ды суал ки йиъий — Къинед мукъу1д поселениедид кьухьды Магомед Магомедовад отчет шыв гвалахбыр гьыъырди 2017 сыда ва шыв планбыр ади 2018 сыда гьаъас хьур. М. Магомедова гыьыри кьыле отчет джухьды администрациедире гьыъыд гвалахмыд, йыхды джыгымыкла ки гьалгара, ва сасад джыгыма самокритика ки гьаъара. Гьание гьухьури — тук гыргад усбыр дегиш гыъыр йигара, хьед гыргад провод ц1инды йыгара, Дом культурадид зрительный залас ремонт ва библиотекадис капитальный ремонт йигара; ер-юртмыд ва халмыд ачута ийинид, налогмыд, детсад йыгадид, мобильный связед станцие адишва1лид ва мадды мисед суалбыр.
Ми суалад арыди далгыри Къинед мукъу1д депутаташды Маджлисед Седри Саид Сулейманов, Къинед мехьтебед директор Сакит Абдуллаев ва Дом культурадид къуллухчи Назханым Сулейманова.
Сиене далгыдбишис Ибрагим Гусейновиче ва маддыбише выр ай таликьды суалбыр.
Гьадыла хъуъ культурадид Управлениеди ва Къинед администрациеди йыгыд райондид комиссиедире гвалахмыд отчет хъывыри АС-тес райондид Кьухьнийды помощник Абдулвагаб Ахмедова. Гьание выри мидбишды гвалахмыс разива1лид къимет, сасад критикабыр ва советбыр, предложениебыр ки хъывыр, шыв — джухьды архивбыр усла йыгыр лазим иди ва шыв документбыр гьамыс кьабыл гьыъыр йигарди.
Райондид Кьухьды И. Ибрагимова гене ки минийис выр ай миди суалбыр.
Гьадыла хъуъ АС-ре выри миди хъывыд сиене отчетмыс положительный кьиметбыр.
Хьели райондид Кьухьние хъухьури мааки: е гене ки дикиси чалыш джамагьа1тдид арыди ад четинвалдыбыр хъуъ гьаъас, инсанашды яшайиш рагьа1т гьаъас; амма йыгъ-йыгъала е-ве гвалахмыд дисциплина, хыле хад ва улихьде гид гвалахмыд кьул-джыбыр выъыр йыгара, лазим ид кал гвалах выъыр.
Мидихьван ква1ч1уд ц1инды сыдыд сахьусды иджлас бегьем вишири.
Къинады Саид
